Read Silimo 1 Timotius 2 Bible Online

1 Timotius 2 - Silimo bible

1 Timotius 2

¹An en wene mesik logo aʼge yu Allah eiyagai enesaʼgo werinogoluk moʼgulheik. Nis aphwami enemin op lioksogo welat e, Allah erliktogulat, aphwami enebaget hegitsogo togulom aʼge togu lomogoluk e, aphwami ʼberlegat enebaget emin, ʼgain ononuk logo aʼge enebaget emin, is logon ononuk oruak aʼge welat tennentarok welagai aʼge ai, enebe ʼberlek enebaget emin, seʼban ogulat e, Allah yoʼgo pogulat, ʼgonu moʼgulogulat, hau worogulat togu lemagoluk enesaʼgo werise lomup o.

³At Allah delnenebiso aʼge ano ede en epasulat e, “Di aphwami yu aphwami ʼberlegat delenebiselat e, dem wene dokhumsogo enaluk emagoluk moʼgulentasulat, tu aʼge o,” oluk ede agai epasu ai en e, his asogo ogu lorogup holuk e, obat o.

⁵Allah ebe mesigarat o. Ye, Allah emin nis aphwami emin ʼburl heisogo welat laʼbulnenebiso aʼge ap ebe Yesus Kristus ai mesigarat o.

⁶At Kristus aphwami ʼberlegat wiak togu lege ai pam herle wusogo tennentarok oruakma herle hebilogo delnenebigoluk uʼgwarek epenenat, “Nebe watnobuak o,” oluk waga ai pam, Allah ogola en e, “Aphwami ʼberlegat delonobu o,” oluk epasu aʼge ai, enagat emagoluk hegitsogo enagat aga ai o.

⁷Asogo epasu ai en, at en e, “Hat en dem wene ai aphwami oʼborl oʼgwe aʼge en demat oluk enede opoluk wouwagoluk, moʼgulentil denaga lomup,” oluk, an yoʼgo noboluk peraknobou wagama, moʼgulentil denaga legi ai o. Asogo egi ai demat egi o. Niak esei egi erlak o.

⁸Ye, o di owi yu owi seʼban ogulat, is ap en e, eneʼgik en logon wiak tu erlak, onolot het om erlak, wene sorok ogwi erlak, degelak modok welat, seʼban ogu lemagoluk, moʼgulonto oluk nogola nagai epegirik en moʼgulhegis ai o.

⁹Ai ʼgelaʼge, is hwami re, enasu sualogulat, melei wantogwi ʼgelaʼge emas aʼge wantogulat, eileʼbani wantogwi ʼgelaʼge mutiara wantogulat, sum oʼgo lok aʼge ʼbuktogulat, tu modok mia o. We, enil haʼbuksogo welat, enalli aʼge selangsogo wo aʼgeat wogu lemagoluk moʼgulentagun en moʼgulhegis ai o.

¹⁰Enalli aʼge wo ʼgelaʼge re, enebabut Allah eiyagai aʼge en welat tu hegitsogoat, is logon opsogoat lerontogu lemak o.

¹¹Is eniak erlaksogoat welat, wene moʼgulontogwiam, enesaʼgo hologoat welemak o.

¹²Is hwami en e, ap eneragam ʼgelaʼge welat onoboluk, “Di tip, yu tip,” oluk moʼgulontogulat, wene moʼgulontogulat, ogu lemano oluk an en wene ʼbalise legi ai o. Is e, we, eniak erlaksogoat wolom o.

¹³Allah en e, Adam naduk walhesirik en, pobuk hwe Hawa walhesi ai en, eniak erlagat wolom egi ai o.

¹⁴Ai ʼgelaʼgeat, Iblis en e, Adam naduk lalegei puk. We, hwe ai naduk lalegeimu re, Allah iak sagalogo wiak tegei ai o.

¹⁵Asogo aʼgeat de, is hwami enede Allah pam heʼberik poluk e, enebe Allah paget poluk degelak welat, aphwami logon enedeabonobogulat, enil haʼbuksogo togulat, togu lemagoluk e, malik dagonobogukhwe, Allah en delonobuayat o.