Read Silimo 1 Timotius 3 Bible Online

1 Timotius 3 - Silimo bible

1 Timotius 3

¹Wene yu, demat aʼge ik o. Is logon onogola en opogulat e, “An Allah eiyagai ʼgwelagentarok welle o,” oluk, onogola en epegesa holuk e, ai re, op modok aʼgeat enagai en epegesa ai o.

²Ai en e, ap Allah eiyagai ʼgwelagentarok welemagoluk, enebabut e, yu ʼgelaʼge edigonobo yo. Aphwami logon en, “At wiak,” oluk wene ebam pogwi erlak aʼge holuk, ugwe mesigat aʼge holuk, wiak tuagoluk ede ʼgagalogwiam dok wogo pogwi ʼgelaʼge wogo pasu aʼge holuk, ede modok oruak aʼge holuk, tu aʼge hegitsogo tago aʼge holuk, ap ʼbok eneperlak aʼge wagaiam wogenebiso aʼge holuk, wene seʼgeksogo moʼgulentasu aʼge holuk,

³anggur aʼbosu enede ʼbalago aʼge loksogo naru erlak aʼge holuk, ebabut olot het perleneat om erlakma en, enago op lioksogo welago aʼge holuk, ogola en uang aʼbigat nagai epasu erlak aʼge holuk,

⁴uʼgwarek eiyagai aʼge nak degelogo tenentarok oruakma re, at eiyagai en enaik eragam welat hau doʼgoksogo worogulat, iak osoam hologo togulat, togwi aʼge holuk, enebabut ategenik aʼge holugat, Allah eiyagai ʼgwelagentarok wolom o.

⁵At ap mesik en uʼgwarek eiyagai opsogo degelogo pegentarok wolom eperlak holuk e, Allah eiyagai noʼgosogo ʼgwelagentarok wolom epegep. Mia o.

⁶Ap mesik Allah iak ʼgerat wasu aʼge edikpogwiam, Allah eiyagai ʼgwelagentarok welat, uʼgwarek en erlikhorloma re, Allah en Iblis wene ebam pesi ʼgelaʼge, asogoat wene ebam po ai en e, Allah eiyagai ʼgwelagentarok welemagoluk edikpo mia o.

⁷Ye, ap Allah eiyagai ʼgwelagentarok wolom aʼge ai, is aphwami oʼborl oʼgwe aʼge en obok wiak ʼbalogwi aʼge edikpouwa holuk e, at ebe onogola en mi-miarak poluk enebirenileʼgen ʼgwelagontogulat, ʼbaik ʼgume pogwiam wathasu ʼgelaʼge, Iblis en ede ʼgi-ʼgagal ebe tenak pasulat tuano oluk, obok op ogwi aʼge holugat edikpo yo.

⁸Ai ʼgelaʼge re, Allah eiyagai aʼge lerontogu lemagoluk e, enebabut yu ebelerak aʼge edigonobo yo. Enede hweriogo oruak aʼge holuk, enemage ʼbiren agosogo ogwi erlak aʼge holuk, anggur aʼbosu enede ʼbalago aʼge loksogo nasu erlak aʼge holuk, uang, di aʼge yu aʼge, op aʼge, “An nak nebam wellep e,” opogwi erlak aʼge holuk, edigonobo yo.

⁹Mesik e, wene, Allah ogola hisogoat welagarik en selakma pesi wene ano, onogola poluk, “An wene nebam erlak nogola selak welegi o,” oluk, wene ai ningsogo tenak welagai aʼge holuk edigonobo yo.

¹⁰Is ap ai owan edigonobo erlak welat enebabut naduk ʼbalogulomma re, aphwami logon en, “At wiak,” oluk, wene enebam pogwi erlakma en degelak welagai aʼge holuk, enak aʼge pobirak onoboluk e, Allah eiyagai aʼge logon lerontogu lemagoluk, edigonobogulom o.

¹¹Ai ʼgelaʼge re, is ai onugwami enede hweriogo welat onobok wiak ʼbalil noʼgwi erlak aʼge holuk, wiak tuagoluk enede ʼgagalogwiam dok wogo pogwi aʼge wogo pogwi ʼgelaʼge holuk, enebabut ningtak aʼge holuk, enebabut ai ʼgelaʼge holuk, onogunlak lerontogwi aʼge welemagoluk edigonobo yo.

¹²Is ap Allah eiyagai aʼge logon lerontogwi aʼge wolom ai re, onugwami mesigat wogo welat, eneiyagai emin, onosi emin, opsogo degelogo tenentarok welagai aʼge holugat edigonobo yo.

¹³Is en Allah eiyagai logon opsogo lerontogwiam e, Allah eiyagai en onobok op ogulat hau doʼgoksogo waronobogu lema o. Asogo ogwiam, is en e, wene nenede Kristus Yesus ebam heʼberik pogu lege wene ai paget, onogorlok erlaksogoat ʼbaksogo moʼgulontogu lema o.

¹⁴An perlene hentau weigoluk nede epasularat de, owan wom erlak weleik holuk, nis Allah eiyagai enemin welat nenebabut togulom aʼge haluk emagoluk wene yu ʼberlegat pelal wokho heʼbek perakpou wegi ai o. O re, o waʼgi pam en dum pam ningsogo welago ai ʼgelaʼge, nis Allah elaluk modok welago aʼge eiyagai odoktugu lege ai pam e, Allah iak dem wene ningsogo tenak welege ai o.

¹⁶Wene ai, nis Allah eragam welat demat oluk opogu lege wene hisogo welaga aʼge Allah enat ʼbaksogo selakma pesimu, “Wene ai logo yo,” oluk ʼbaksogo ogu lege. Ai re, At Kristus ebe abat selakma aga o. At Allah Arogun en, “At Kristus ai demat,” oluk selakma pesi o. Is malaikat Allah en yoʼgo ʼbelagonobou wago aʼge enil hegesa o. Osi en at taga laga wene ano di aphwami yu aphwami oʼborl oʼgwe aʼge moʼgulentil legesa o. Aphwami o di owi yu owi aʼge enebe aʼbik en, “At ebe demat o,” oluk, enede at ebam heʼberik pegesa o. Allah en ʼbogorl pam erliktogwi modok welagaimu woluk ligagama welago yo. Ye, wene ai re, at Allah enat selakma pesimu ʼbaksogo ogu lege o.