Read Silimo 1 Timotius 4 Bible Online

1 Timotius 4 - Silimo bible

1 Timotius 4

¹Allah Arogun en wene ʼbaksogoat moʼgulnentasulat e, “O ologun pam, aphwami logon Allah iak demat oluk opogwi aʼge en, wene ai, Nenebit o, oluk ukpoluk e, Iblis osi nelak onobogwi aʼge eneragam ʼgoluk, wene is en moʼgulontogwi wene ai tenak poluk togu lema o.

²Togulat e, aphwami eneʼgik senap agoam, no tenak pege hwe, oluk ogwi ai ʼgelaʼge, is ai enede horl agalat e, Yu wiak tigema hegi o. Yu op tigema hegi o, oluk opo erlakma en yogunat togu lema o. Asogo togulat, enepenen enat lal-ʼbaltak onobogu lema ani o.

³Is en wene ogulat e, Hwami modok wogonobogup, ogulat, Di aʼge yu aʼge noʼgwi aʼge eba, mesik yu re, asua o. Noʼgu lorogup erlak, ogulat, ogu lema o,” oluk, Allah Arogun en moʼgulnentesi aʼgeat hegitsogo ogwi ai o. Aʼgeat de, noʼgwi aʼge ai, Allah en nis nenede at ebam heʼberik welat, dem wene ai pobi tul holuk e, hau wusogo noʼgu lemagoluk walhesi aʼge paget ogwi ai o.

⁴Di aʼge yu aʼge Allah en walhesi aʼge ai op nak o. Seʼban ogwiam Allah iak ai pam obap pasu oluk, “Yu wiak aʼge,” oluk ukpo erlakma enat, Allah hau wusogo noʼgulom nak o.

⁶Wene op wene nenede Allah pam heʼberik pogu lege aʼge ano moʼgulhogu legema re, hat en wegentik hegitsogo taga legen ai pam hebe yoʼgulagalat e, wene yogodak moʼgulhegis ai nenarilak nonorokhwi Allah eiyagai aʼge logon moʼgulentasu lomup o. Asogo moʼgulentasu lorogun holuk e, hat Kristus Yesus eragam welat, at ebaget opsogo taga lorogun ai o.

⁷Aphwami en nonung wene ebe wene erlak ebele pagerat de, eniak esei we ʼburlat ʼbeloʼgogwi aʼge ai ukpogu lomup o. Ukpoluk, Allah eragam welat togwi aʼge aiat henannisogo moʼgulise lomup o.

⁸Aphwami enebe paget enemep elaluksogo oluk yabuk enannisogo togwi ai re, yogodak ya lodu paget wei nak op ʼgelaʼge togwi o. Aʼgeat de, nenede paget e, Allah eragam welat, at iabuk wogu lomulmu, at Allah en e, “Yogodak henelaluk welegep aʼge paget emin, pobuk henelaluk modok wolorogup aʼge paget emin, op modok ema o,” oluk, obok moʼgulnentesi ai demat o.

⁹Holuk, wene ai nenedemu en dokhumsogo wo yo.

¹⁰Allah ebe re, di aphwami yu aphwami ʼberlegat delnenebiso aʼge welago aʼgeat de, logo ʼgelaʼge re, nis nenede at ebam heʼberik pogu lege aʼge delnenebiso ai en, nenede at elaluk modok welago aʼge pam heʼberik poluk, at ebaget nenebit erlaksogoat, nenannisogo togu lege o.

¹¹Wene ai ʼberlegat aphwami logon en hegitsogo togu lemagoluk moʼgulontogulat, enesaʼgo worogulat, togu lomup o.

¹²Hat hebe owan souwe welegen ai en, is aphwami logon en mi-miarak hobo mia o. Hebe souweat welat, aphwami logon enede Allah ebam heʼberik oruak aʼge en hat hebabut wouwagoluk, hiak hegitsogo moʼgulentasulat, hebabut hegitsogo tagalat, aphwami hedeabenebasulat, hede Kristus ebam heʼberik welat, wiak tu erlakma en hil haʼbuksogo welat, taga lomup o.

¹³An nebe owan wom erlak oruakhwe re, Allah iak pelal wogo aʼge aiat is logon enesaʼgo holuagoluk, onuk moʼguliselat, enesaʼgo weriselat, moʼgulentasulat, taga lomup o.

¹⁴Hat hebaget page enat is ap Allah eiyagai tenentarok welagai aʼge en eneʼgik haʼgul sebelogukhwe, is ap Allah iak moʼgulontogwi aʼge en disogo egesa ai, “Hat pobuk disogo taga lorogun,” oluk, moʼgulhegisa hegitsogo, Allah ebabut op en nenebabut loʼbok woknentasu aʼge ano hat wokhesi aʼge ai pam tu erlakma en hebakhenne ukpagun o.

¹⁵Is aphwami ʼberlek en hat hebabut ʼbalogulat e, “At Timotius naduk op taga lagarik yogodak op modogat tago yo,” oluk enak aʼge pobi hobuagoluk, wene moʼgulhegis aʼge ai ʼberlegat hedemu poluk tago modogat wolomup o.

¹⁶Asogo tagalat, huʼgwarek paget emin, is aphwami logon moʼgulentasu legen aʼge enebaget emin, hebabut heberlogo wolomup o. Heberlogo welat, hede ʼbugom erlakma en, ai aʼgeat tago modok wolomup o. Asogo taga lorogun holuk e, huʼgwarek en hebe deliselat, aphwami logon hiak hologwi aʼge enebe delenebiselat, togun ani o.