Read Silimo 1 Timotius 5 Bible Online

1 Timotius 5 - Silimo bible

1 Timotius 5

¹Hat en, ap enarlue aʼge holuk e, hiak uareksogo moʼgulonto erlakma en, we, haiklak ʼgelaʼge hiak sakhosogoat enesaʼgo werise lomup. Ye, ap souwe aʼge ai re, harilak ʼgelaʼge enemin welat,

²hwami enarlue aʼge ai re, hialak ʼgelaʼge enemin welat, hwelani dogum aʼge ai re, hogulani ʼgelaʼgeat, hede wiak aʼge eberu erlakma en hil haʼbuksogo enemin welat, tagalat e, enesaʼgo opsogo werise lomup o.

³Ye, hwami sugwe aphwami is aʼge en leronto aʼge erlakma enematek oruak aʼge holugat, hau doʼgoksogo waronobogu lomup o.

⁴Asogo aʼgeat de, is hwami sugwe aʼge ai enemalik, eneʼbialak en dogoʼgwe aʼge logon oruak holuk e, is ai enat, “Nis nenebe edip mesigat en dogo aʼge,” oluk, is en tu aʼge moʼguluak o. Ai re, at Allah ogola en e, “An neragam welat, enaiklak en yoʼgulonobogu legesa ʼgelaʼge, oʼgo is naduk opsogo lerontogulom o,” oluk ogola agai epasu ai en e, asogoat lerontogu lemak o.

⁵Aʼge re, hwami sugwe demat aphwami is edip aʼge erlakma enemategat welat re, “Allah enat letnontouwa,” oluk, enede at ebam heʼberik poluk, hup erlige yoʼgo pogulat, ʼgonu ogulat, ogwi modok welagai o.

⁶Aʼge re, is hwami sugwe aʼge logon is enagai aʼge, yogunat togwi aʼge ai, enebe enelaluk welagai aʼgeat de, werak aʼge ʼgelaʼge oruak o.

⁷Hwami sugwe ai enebaget, is logon en wene enebam po erlakma en op welemagoluk, wene aiat enesaʼgo opsogo werise lomup o.

⁸Is ap logon en Allah iak demat oluk wegesarik welarat de, onuʼgwarek eneiyagai aiat logo onoboluk lerontogulat, aphwami is edip aʼge holuk ado pema eneminat lerontogulat, togwi erlak holuk e, Allah iak ukpoluk libegesa aʼge ʼgelaʼgeat oruak o. Is aphwami oʼborl oʼgwe aʼge en wene wo erlak welat, wiak weiyat ʼgelaʼge togwi aʼgeat de, is ai wene wegesarik en aphwami is aʼge lerontogwi erlak ai en, wiak loksogoat togwi o.

⁹Is hwami sugwe aʼge Allah eiyagai aʼge en lerontogu lemagoluk ononuk ʼbalogup holuk e, enebe dagegesa hwerli en umur 60 tahun owan om erlak aʼge re, ononuk ʼbalogup no yo. We, umur 60 tahun arat aga aʼge holuk nak, ononuk ʼbalu o. Aʼge re, onogunlak mesigat nak wogo oruakma sugwe enebegesa aʼge holuk nak ononuk ʼbalu o.

¹⁰Is aphwami logon en is hwami sugwe aʼge ai onobok ogulat e, “Is enebabut op togwi o,” oluk ogwi aʼge holuk, ononuk ʼbalu o. Op togwi ai re, onuʼgwarek enemalik opsogo yoʼgulonobogulat, ap ʼbok wagaiam enebe opsogo wogonobogulat, Allah eiyagai logon onoyuk petne emeronobogulat, is logon eneseget oruakma lerontogulat, agauwa mesik mo u erlakma en di paget yu paget lerontogwi modok welat, togwi aʼge holuk, ononuk ʼbalu o.

¹¹Is hwami sugwe owan dogum aʼge ai, Kristus emin hwedik oruak aʼgeat de, ukpoluk, enebam aganhan en enede sebelu mia ʼgelaʼge omma, ap mesik wo ai en e, ononuk ʼbalogun o.

¹²Is ai sugwe onobogwiam, is en e, “Nis nenebabut Kristus paget nak nenil haʼbuksogo togu lomul o,” oluk ogulat en, pobuk asogo tu erlakma en ukpogwi holuk, onuʼgwarek en wene enebam pagathorlouwa ai o.

¹³Asogo togulat, enebabut e, eneʼgik tenho pukmu en, o daʼgoluk noʼgwi o. Asogo noʼgulat e, logon modok wiak togwi o. Eniak moʼgo-moʼgo wiak ogulat is mu aʼge onowene aʼgeat daloʼbok ogulat, wene logon u puk aʼge mu aʼge ogulat, il noʼgwi ai o.

¹⁴Holuk e, is hwami sugwe aʼge logon ʼgwi-ʼgwani Iblis eʼberlik legesa ai en, is logon nis Allah eiyagai enemin il ʼbelak aʼge ʼgelaʼge en nonobok wiak ʼbalugumuno oluk, is hwami sugwe dogum aʼge ai, onogunlak loʼbok wogonoboluk e, enemalik dakho opsogo degelogo tenentarok welemagoluk egi ai o.

¹⁶Aʼge re, hwe mesik ede Allah pam heʼberik welago aʼge ia mesik sugwe aʼge oruak holuk, Allah eiyagai ʼberlegat enebam seget emano oluk, at enat lethasulom o. Asogo lethasukhwe, is Allah eiyagai ʼberlek en e, hwami sugwe aʼge logon aphwami is edip aʼge en lerontogwi erlak aʼge holuk, lerontogulom o.

¹⁷Allah en disogo egeimu pelal wokho pogulat e, “Aphwami en wam sapi oyuk en gandum agap lul wusogo eʼgen wouwagoluk poluk e, eʼgen logon nouwano oluk emde herle hettu re, mia o. Logon nouwagoluk ukpogu lomup o,” [1] oluk egeimu, pelal wokho pegesa ai. Ye, mesik e, “Aphwami yabuk di paget yu paget togwiam, eneʼgik oʼgo wogontogulom o,” oluk egeimu pelal wokho pegesayat. Ai en e, ap Allah eiyagai opsogo tenentarok welagai aʼge ai, is Allah eiyagai ʼberlek en, “Eneʼgik oʼgo arat lerentige o,” oluk opo erlakma en, logon eminat ebam louksogo lerontogulom o. Asogo togulat, logo ʼgelaʼge re, is logon Allah iak enannisogo ʼbeloʼgogulat, moʼgulontogulat, togwi aʼge ai, hau doʼgoksogoat lerontogulom o.

¹⁹Aphwami logon en e, “At Allah eiyagai tenentarok oruak aʼge ano wiak tegeimu o,” oluk, wene ebam pouwogoluk togumu, enebe ʼbiren a, henagan a, enil dokhumsogo hogwi aʼge en, “Demat o,” oluk ogwi holugat, wene ebam po yo. Ye, asogo ogwi erlak holuk, wene ebam po mia o.

²⁰Is logon onogorlok emagoluk, is demat wiak tigisa aʼge, aphwami enil pamat eneʼgerli wusogo enesaʼgo opsogo worogu lomup o.

²¹Wene moʼgulhegis aʼge ai, hat en e, aphwami logon holukhwema enebasulat, logon hoʼborlma enebasulat, tu erlakma en hegitsogo moʼgulentasu lomup o, oluk Allah emin, Kristus Yesus emin, enilemat, malaikat Allah en poligenebesirik yoʼgo ʼbelagonobou wago aʼge emin, enil pamat moʼgulhegis ai o.

²²Aphwami logon Allah paget togu lemagoluk, perleneat enaʼgul sebelonobogu lorogup o. Ye, is logon wiak togwiam enemin tu erlakma en hil haʼbuksogo wolomup o.

²³Ou yen nin hwedik nan hwedik hanni erlak ago ano en hogum paget ik nak nasu lorogun o. We, anggur eʼgen aʼbosu wei logon emin nasu lomubat o.

²⁴Is logon wiak togwi aʼge ai wene enebam pogulat, noʼgorlogulat, togumu eba owan lo erlakmayat de, selakma ago ai o. Ye, is logon wiak togwi aʼge sebelak wolomtik en pobuk selakma ema aʼge oruak o.

²⁵Ai ʼgelaʼgeat, is logon op togwi aʼge perleneat selakma ago ai o. Is logon asogo op togumu hisogo modok welema erlak o. We, selakma emayat o.