Read Silimo 2 Timotius 1 Bible Online

2 Timotius 1 - Silimo bible

2 Timotius 1

¹Timotius nomlogo nede hwedik aʼge o. Allah en e, “His Kristus Yesus emin hwedik oruakma henelalugaphenebiso,” oluk, obok moʼgulnentesi aʼge ai, an Paulus en moʼgulentil denaga lemagoluk, ede epesi ano pam Kristus Yesus en yoʼgo noboluk peraknobou wagama, yema welat wene yu pelal wokho heʼbek perakpou wegi ai o. Nenaik Allah emin, nonue ʼgain Onuk Logo aʼge Kristus Yesus emin, eʼbirek enebabut op ano en, op aʼge wokhogulat, edeaphobogulat, hede haʼbugaphobogulat, togu lemak o.

³An neʼbalak Allah eragam welat, onuʼgwarek enede mesigat opsogo welat, at ebaget togulat, erliktogulat, togu legesa ʼgelaʼge, an asogoat tagalat e, hat hebam modok eberagat, hat hebaget hup erlige seʼban oso modogat welat, Allah hau werise legi o.

⁴Hat nge tigen ano en, neʼbirek sarlok tultik, hede op agoam, opsogo nogola nagai haigoluk, “Neʼbirek sarlok tolu e,” oluk, hebam eberak welegi o.

⁵Welat, hede Allah pam demat heʼberik welegen oluk nede eberagat welegi o. Naduk heʼbia Lois emin, hia Eunike emin, enede Allah ebam heʼberik welegesa ʼgelaʼge, hat hede asogoat welegen oluk pobi hebise legiat o.

⁶Asogo hede heʼberik welegen ai en e, an en neʼgik haʼgul sebelhasuam, at Allah ebabut op en, “Hat disogo taga lomup o,” oluk hebabut wokhesi aʼge ai, odouk hererim hasu ʼgelaʼge, hogola aganhan erinogoluk hede ʼgagalogo moʼgulhegis o.

⁷Allah en nenebabut woknentasu ai re, nonogorloksogo welemagoluk woknentasu puk. We, nenannisogo welat, aphwami logon nenedesogo welat, nenede sebelak welat, togu lemagoluk woknentasu ai o.

⁸Ai en e, nonue ʼgain Onuk Logo aʼge obok aphwami logon moʼgulonto re, heʼgerli erlaksogo ʼbaksogoat moʼgulentasulat, ye, an at ebagerat neʼgik herle wusogo nebegesema welegi yu paget, heʼgerli erlak halongsogo welat, taga lomup o. Asogo eselat, aphwami mu aʼge en op wene ai paget, di obotut yu obotut taknonobogukhweat, an Allah anni pam welegi ʼgelaʼgeat, hepe mosogo wolomup o.

⁹At Allah en nenebe delnenebiselat, at uʼgwarek eiyagai emagoluk yoʼgo nenebasulat, tegei ai re, nis en mesik tige pam yoʼgo nenebesi puk. At e, Allah ebabut op en, naduk di aʼge yu aʼge owan walho erlak welat, pobuk Kristus Yesus tua ano pam en obapnenebiogoluk, uʼgwarek ede opoluk yoʼgo nebesi ai o.

¹⁰Asogo epesi aʼge hisogo oruakma, pobuk Kristus Yesus delnenebiso aʼge ebe selakma aga ai pam enagat aga ai o. At iak op wene ai pam, waragai edip ai mabenap pasulat, warom erlakma en nenelaluk modok wolomul aʼge ai, selakma pasulat, tegei o.

¹¹Asogo tegeitik, an op wene aiat ʼbeliʼgiselat, moʼgulentasulat, til nese lemagoluk yoʼgo noboluk peraknobou wagama nese legi ai o.

¹²Asogo peraknobou wagama nese legi ai en, aphwami en di obotut yu obotut taknobogukhweat de, nede ebe naluk aʼge pam e, heʼberik welegi, oluk neʼgerli om erlakma en, nede ʼbuksogo welegi o. At en e, “An en aʼge yu tenniarok wolomup o. Tenniarok oruakma re, hwerli an nebeat weik o,” oluk, nebam poluk yoʼgo nebesi aʼge ai, uʼgwarek anni pam elirat tenniarok welema o, oluk nogola en pobirak pasu legi o.

¹³Wene an en moʼgulhegismu wegen aʼge ano, an nebabut wik-wok, nis Kristus Yesus emin hwedik welat, nenede at ebam heʼberik pogulat, aphwami logon nenedeabonobogulat, togu lege ʼgelaʼge tagalat, hogola en e, “Obapnenebiso aʼge wene ebe yuat o,” oluk, ningsogo tenak poluk moʼgulentasu lomup o.

¹⁴At Allah en e, “Wene op aʼge ai aphwami logon en wiagap pouwano oluk, opsogo tenniarok wolomup o,” oluk, nenebam pesi aʼge ai, at Arogun nonogola pesimu oruak aʼge ai anni pam opsogo tenak wolomup o.

¹⁵Is aphwami o propinsi Asia da ya aʼge ebano enebe ʼberlegat an uknoboluk ʼbogulogo lebagalat, at Figelus emin, Hermogenes emin, eminat ʼbogoligisa ai, hat halugat welegen o.

¹⁶Asogo aʼgeat de, at Onesiforus eiyagai enemin nak e, nin hwedik nan hwedik, nede opsogo nede sebelu wagai ai, nonue ʼgain Onuk logo aʼge en edesogo tenentarok welemak o. An neʼgik herle werak oruakma neʼbek wom eʼgerli erlaksogoat,

¹⁷o kota Roma wagarik e, perleneat hin woknebise lagarik, nebe horonobou waga ai o.

¹⁸Nonue ʼgain Onuk Logo aʼge ebabut op en hegitsogo tua ai erlige, at Onesiforus ai ebe ede emak o. At pageat e, o Efesus welat, an loksogo letniasu laga ano, hat dokhumsogo halugat o.