Read Silimo 2 Timotius 2 Bible Online

2 Timotius 2 - Silimo bible

2 Timotius 2

¹Timotius nomlogo yo. Nis Kristus Yesus emin hwedik oruakma, Allah ebabut op en woknentasu aʼge ai pam hede hurlesogo wolomup o.

²An en wene aphwami esan enilem moʼgulhegismu wegen aʼge ano, hat en is aphwami logon enede heʼberik aʼge en is logon moʼgulontogu lemagoluk, enebam pomup o.

³Ap weim obogwi aʼge onuelak eniak hologo weim obogulat, di obotut yu obotut hil hil obogwi ʼgelaʼge, hat en Yesus Kristus iak hologo, di obotut yu obotut hasulat, hepe mosogoat taga lomup o.

⁴Is ap weim obogwi aʼge ai, onuelak ʼgain onogola enagai houwagoluk, weim obogulat, di aʼge yu aʼge o pam aʼge eberak erlakma enat obogwi ai o.

⁵Ye, mesik e, sa omut oruak sa omut erlak pungtak lagalat, ap yoʼgo enebasu aʼge en, “Disogo tu o,” oluk oso aʼge iak hologo lagai erlak holuk, “Omut aga aʼge, ap yuat o,” oluk, oʼgo ʼgare-ʼgare ʼgelaʼge ʼbuktak onobogwi aʼge ai ʼbuktak onobo mia o. We, iak hologo lagai holugat ʼbuktak onobo yo.

⁶Ye, mesik e, aphwami logon eniabuk worugulat, owi yorogulat set hoposogo togwi aʼge ai, ebe hurle agoam, onuʼgwarek naduk noʼgwi ai o.

⁷Wene an en moʼgulhegis aʼge ai, hede eberise lomma, nonue ʼgain Onuk Logo aʼge en ʼberlegat seʼgeksogo moʼgulhom aʼge oruak ai en, ebam eberise lomup o.

⁸An op wene moʼgulentil nese legi ai re, Yesus Kristus, at Daud en dogoʼgwe aʼgeat ebe werigisema, Allah en elalugaptegei wene ai, hede eberak modok wolomup o.

⁹An op wene asogo moʼgulentil nosoma, is aphwami logon en, is logon wiak togwi aʼge tagonobo ʼgelaʼge, an di obotut yu obotut taknobogulat, neʼgik herle worogulat, togwi aʼgeat de, Allah iak ai herle hettu mia o. We, herle hebeligat oruak ai o.

¹⁰Ai en e, is aphwami logon Allah en poligenebesi aʼge, Kristus Yesus emin hwediktak poma re, enebe delenebiselat, enelaluk op modok welemagoluk, obabenebasulat, tuagoluk e, an asogo wiagapnobogukhweat, nepe mosogo welegi ai o.

¹¹Wene disogo oluk ogwi yu re, demat o, Nis at emin warege aʼge holuk, at emin nenelaluk modok wolomulat o.

¹²Nis nenepe mosogo wolomul holuk, aphwami at eragam ʼguarik welema aʼge ai, nis emin enat tenentarok wolomul o. Nis en e, “Yesus nonue erlak o,” oluk, at ebe modok ukpul holuk e, at en e, “Is an nosi erlagat o,” oluk, uknonobouwayat o.

¹³Aʼge re, at uʼgwarek en, “An nebabut naduk welegi aʼge ai erlak o, oluk muat meneniso erlak ai en, nis at ebam loʼboktak wolomul erlak holuk, at en nis nenebam modok loʼboktagat welago yo,” oluk ogwi ai demat o.

¹⁴Wene moʼgulhegis aʼge ai ʼberlegat is logon onogola ebesogo moʼgulentasu lomup o. Moʼgulentasulat, we, eniak aʼge pagerat wene sorok ogwi ai Allah il pam enesaʼgo opsogo werise lomup o. Asogo sorok ogwi ai pam, op ema erlak o. We, is logon enesaʼgo holuarik, wiak emayat o.

¹⁵Allah en e, “Hat an nebaget op taga legen,” oluk, moʼgulhemagoluk e, hannisogoat taga lomup o. Is logon di aʼge yu aʼge tuagoluk yoʼgo onobogwiam e, opsogo togulat, eneʼgerli erlaksogo togwi ai ʼgelaʼge, hat en dem wene aiat hegitsogo moʼgulentasu lomup o.

¹⁶Aʼge re, is aphwami logon en dem wene ai erlakmayat, we ʼburlat, erlak ema aʼge paget ogwi ai, ukpoluk ʼgwi-ʼgwani lasu lomup o. Is ai asogo ogulat, Allah ebe ukpoluk hegil hegil ʼbok lebagaiat o.

¹⁷Wene dem wene erlakmayat moʼgulontogwi aʼge ai, aphwami yebil dugenebisoam, ebema agalat lok lok lasu ai ʼgelaʼge, is ai eniak asogoat ogwi ai pam is logon loksogoat wiagabonobogwi ai o. Ap Himeneus Filetus eʼbirek asogo togulat,

¹⁸dem wene ukpoluk ʼgwi-ʼgwani lebagalat, is en e, “Allah en aphwami werak aʼge enelalugabonobua oluk obok egei ano arat agama yu i o,” oluk, is logon moʼgulontogwiam, enede Allah ebam heʼberik oruak aʼge wiagabonobogwi ai o.

¹⁹Aʼge re, Allah en o waʼgi ʼgelaʼge dalegei aʼge ningtak modok welema ai pam pelal disogo oluk wogo oruak ai, “Nonue ʼgain Onuk Logo aʼge uʼgwarek eiyagai poligenebesi aʼge ai enebe aluk o,” [1] oluk egei. Ye, wene mesik e, “Is logon en e, An nebe nonue ʼgain Onuk Logo aʼge orat o, oluk, ogwi aʼge, Wiak tu nenebit o, oluk ukpoluk ʼgwi-ʼgwani ʼbok laga lemak o,” oluk egeimu pelal wokho oruak ai o.

²⁰O lok werik aʼge ogola re, di aʼge yu aʼge emas aʼge emin, perak aʼge emin, heleʼgik aʼge oʼgo aʼbik ai aʼge nak welago puk. We, e aʼge emin, ʼgwiang aʼge emin, heleʼgik aʼge ogo welago aiat o. Op aʼge tuogoluk holuk e, op aʼgeat wogulat, yogunat aʼge tuogoluk holuk e, yogunat aʼge wogulat, togwi ai o.

²¹Ai ʼgelaʼge re, sa uʼgwarek en wiak togwi aʼge ai hosogo ukpoluk, ebe Allah paget poluk oruakma, at enat di aʼge yu aʼge op aʼge nak tik epasu holuk e, “Arat op o,” oluk, yoʼgo pouwa ai o.

²²Ai en e, hat e, is ap souwe aʼge en enebam aganhan agoam wiak togwi aʼge ai ukpoluk, hweiye lasu lomup o. Is aphwami logon enede mesigat op welat nonue ʼgain Onuk Logo aʼge yoʼgo pogwi aʼge ai enemin laʼbulogo wolomup o. Eneminat hegitsogo tagalat, hede Allah ebam heʼberik welat, aphwami enebe enedesogo welat, aphwami enemin lioksogo welat, togwi ai aʼgeat motluk lasu lomup o.

²³Asogo tagalat, is aphwami ado enede ebesik aʼge en wene eneperlak welat, wene ʼbalogwi ai ologun pam e, is-is emin weim ʼgelaʼge obogwi ai, enemin tu erlakma en ukpasu lomup o.

²⁴At ap sa en nonue ʼgain Onuk Logo aʼge paget tagalat e, asogo tu puk o. We, aphwami ʼberlegat ebabut lioksogo enemin wolom o. Epe mosogo welat, aphwami wene opsogo moʼgulentasulom o.

²⁵Asogo moʼgulentasuam e, is aphwami logon en e, at iak sebeluogoluk togwiam, at en iak lioksogoat enesaʼgo weriselom o. Asogo enesaʼgo werisoam, is wiak togwi aʼge ukpoluk, dem wene ai wouwagoluk, Allah en enede ʼgagalua ya? erlak a, oluk enesaʼgo werisolom o.

²⁶Asogo enesaʼgo werisoam, is enebabut heberlemarik, at Iblis ogola epasu aʼge togu lemagoluk enebe ʼbaik ʼgume pam ʼgotnok oso ʼgelaʼge gotnok egesa aʼgeat de, Allah en hebilogo lebikpouwayat o.