Read Silimo 2 Timotius 4 Bible Online

2 Timotius 4 - Silimo bible

2 Timotius 4

¹At Kristus Yesus ebe pobuk ʼgwiangma selakmasogoat wemarik e, aphwami nenebe nenelaluk welege aʼge emin, waregesa aʼge emin, ʼberlegat wene nenebam pasulat, noʼgorliselat, tua o. Pasu lemarik, di aphwami yu aphwami ʼberlegat eragam onoboluk at ebe ʼgain welema ai en, an en, nenaik Allah emin, Yesus emin, eʼbirek enil pam, hat en dem wene aphwami moʼgulentasu lorogun en e, hesaʼgo wusogo moʼgulheik o. Aphwami op wene moʼgulentasuam holu enagai oruakhwe emin, enebit oruakhwe emin, holuagoluk wene ai ningsogo moʼgulentasu lomup o. Hogola ʼbuk om erlakma en moʼgulentasulat e, wiak togwiam hiak ʼbaksogo moʼgulentasulat, enesaʼgo weriselat, enede ago wusogo moʼgulentasulat, taga lomup o.

³Pobuk, is aphwami en dem wene enesaʼgo dokhumsogo hologwi erlak welat, wene we aʼge enesaʼgo holu enagai en, moʼgulontogu lemagoluk is logon enebe aʼbigat yoʼgo onoboluk, odogonobua ai o.

⁴Is ai dem wene ai ogwiam enesaʼgo dopno holuk, nonung ʼbeloʼgogwi wene ai ʼbeloʼgogwiam nak e, enesaʼgo dainsogo hologu lema ani o.

⁵Is asogo togukhweat de, hat e, di aʼge yu aʼge paget hebabut heberlak welat, hebam di obotut yu obotut hasulat, hepe mosogoat wolomup o. Op wene moʼgulentil noʼgwi aʼge aiat logo poluk e, Allah en, “Disogo lerentasu lomup o,” oluk, yoʼgo hebesi aʼge ai mesik ukpo erlakma en hegitsogo taga lomup o.

⁶Aphwami en an nebe Allah paget nemep namogo watnobua ano arat horok lau waga o. Asogo watnobumu, an nebe naik eʼbek lo hegirat agama welegi o.

⁷Sa omut oruak, sa omut erlak, pungtak lagai ʼgelaʼge, an nede Allah pam heʼberik modok welat, at ebaget nannisogoat op til waga legirik e, hwerli pam arat lau wegi o.

⁸Aphwami onomut walhogwiam, onomut aʼbik aʼge oʼgo op aʼge wogontogwi ʼgelaʼge, an nebe arat lasuam, nonue ʼgain Onuk Logo aʼge en e, wene nenebam pasulat, noʼgorliselat, hegitsogo tua ai erlige, at en e, “Hat hegitsogoat taga legenma o,” oluk, oʼgo op aʼge mesik woknema aʼge oruak o. Aʼge re, an nak woknema puk. Is logon onogola en e, “Yesus welep e,” oluk, enagai en yetharok welagai aʼge ogo ʼberlegat nenemin woknontouwayat o.

⁹At Demas ano ʼgwiangma aʼge yema agai en, an uknoboluk o Tesalonika ʼbok lagama o. Ye, at Kreskes, o Galatia lasulat, Titus o Dalmatia lasulat, tigisema re, at Lukas nak nemin welege ai en, hat perleneat neʼbek worogun en e, hannisogo walhasu lomup o. Asogo walhasu loroguntik werinogoluk holuk e, Markus ano ebabut e, an Allah paget tisoam opsogo letnio ebelerak ai en e, ebe eʼgik wok wok neʼbek manup o.

¹²Ye, at Tikhikus ano, o Efesus louwagoluk perakpegimu o.

¹³Hat wagalat e, ʼbogoyum sogwei sum oʼborl oʼgwe ʼbuktaga legi aʼge ano emin, wene pelal wogo aʼge pema ebano, wasulat, ebe logo re, wene wam domba wam agap noʼgorlak aʼge pam pelal wogo aʼge ano emin, o Troas at Karpus owi pam eba poluk wegi aʼge ebano ʼberlegat woluk manup o.

¹⁴Ye, at Aleksander tembaga aʼge ʼbosie ʼgelaʼge heleʼgiso aʼge ano en, an loksogoat wiagapnebegeimu welegi o. Aʼge re, at nonue ʼgain Onuk Logo aʼge en at tegei ai hegitsogoat wene ebam pouwa aʼge oruak o.

¹⁵At ai dem wene nis en moʼgulogu lege aʼge neniak sagalogo ukpoluk taga laga ai en, hat hebabut heberlogo wolomup.

¹⁶Aphwami en wene nebam poluk, nemdema naduk wogwiam, an en e, “An nebam pukmuat o,” oluk wene nebam noʼgorlisoam, is ʼberlegat an neragam mesik welegesa erlagat uknoboluk lebegesa ai paget, Allah en wene enebam po erlakma en welemak, oluk seʼban ese legi.

¹⁷Asogo aʼgeat de, an en dem wene dokhumsogo moʼgulentasuam, is oʼborl oʼgwe aʼge enebe ʼberlegat enesaʼgo holuagoluk, nonue ʼgain Onuk Logo aʼge an neragam welat, nanniapnebesirik, singa orlomene ʼgelaʼge anni aʼbik aʼge ano emdema oruakma delnobu ʼgelaʼge, watnebelip aʼge delnebegei ai o.

¹⁸Asogo delnebegeitik, pobuk aphwami en di wiak yu wiak taknobouwogoluk togwiam, at enat delnebise lemarik e, delogo woknoboluk ʼbogorl pam, at eragam wolomulmu eba ʼgwik ai paget, at erliktogwi modok wolomok o, oluk, demat u ʼgelaʼge, “Amin,” egi ai o.

¹⁹Hwe Priskila emin, ogun Akwila emin, ap Onesiforus eiyagai enebe ʼberlegat enemin, “Paulus en hau wathenebegei,” oluk moʼgulontomup o.

²⁰At Erastus ano o Korintus mo egei ai o. Ye, at Trofimus ano ebam ou oruak en, o Miletus poluk wegi ai o.

²¹Hat e, o moru nasuam sogwei wiak ago ano owan om erlak oruakhwe, ya pamat perleneat weigoluk hannisogo walhasu lomup o. At Ebulus emin, Pudes emin, Linus emin, hwe Klaudia emin, nenarilak nonorokhwi Allah eiyagai aʼge logon ʼberlek en hau wathebigisa o.

²²Nonue ʼgain Onuk Logo aʼge en hede tenhiarok welat e, at ebabut op ano en, henebe ʼberlegat tenhentarok welemak o.