Read Silimo Titus 1 Bible Online

Titus 1 - Silimo bible

Titus 1

¹Titus nomlogo yo. An Paulus, Allah eragam aʼge welat, aphwami at en poligenebesi aʼge enede at ebam heʼberik poluk oruakma enede ago warenebiselat, ye, nis at eragam welat dem wene moʼgulontogu lege wene ano dokhumsogo enaluk emagoluk moʼgulentasulat, tuagoluk Yesus Kristus en yoʼgo noboluk peraknobou waga aʼge ano en, wene yu pelal wokho heʼbek perakpou wegi ai o.

²At Allah en, di aʼge yu aʼge owan walho erlak welat, nis aphwami nenebaget disogo egei, “Aphwami an en walentaiktik e, enebe enelaluk modok welemagoluk, obabenebaik o,” oluk, obok egei ai, “Iak esei oso erlak ani,” oluk nonogola eberak welat, dem wene moʼgulontogu lege ai o.

³Yogodak wene ai selakma om hegitsogoat selakma emagoluk, at Allah delnenebiso aʼge ano en, “Hat en wene ai aphwami moʼgulentasu lomup,” oluk, yoʼgo noboluk, nebam pesi ai en ebe selakma ago ai.

⁴Titus nomlogo yo. Hede nis nenemin hegitsogoat Allah pam heʼberik poluk welegen ai pam, an nuʼgwarek nomlogo harat egen ai o. Nenaik Allah emin, nonue Kristus Yesus delnenebiso aʼge emin, eʼbirek enebabut op ano en, op aʼge wokhogulat, hede haʼbugaphobogulat, togu lemak o.

⁵An en hat o Kreta eba hoboluk, weigoluk tagalat, wene disogo tagalom oluk, hebam pegi aʼge ai, “Di aʼge yu aʼge owan hegirap po erlak aʼge, hegirap tagalat, o da ya eba aphwami Allah eiyagai logon tenentarok welemagoluk onuelak loʼbok edigenebasulat, taga lomup o,” oluk, moʼgulhotluk wegi ai o.

⁶Aphwami Allah eiyagai logon tenentarok welemagoluk edigonobo ai re, enebabut e, yu ʼgelaʼge holuk edigonobo yo. Apwhami logon en, “At wiak,” oluk wene ebam pogwi erlak aʼge holuk, ugwe mesigat wogo aʼge holuk, eiyagai enede Allah pam heʼberik welagai aʼge holuk, is pema en ogulat, “Ap yu eiyagai enesaʼgo werak erlak yogunat togwi ai nenebit,” oluk, obok ʼbalogwi erlak aʼge holuk, edikpo yo.

⁷Ap Allah eiyagai logon tenentarok welat e, Allah pagerat taga lema ai en e, is logon en wene ebam pogwi erlak aʼge holuk, edikpo yo. At en e, “Is logon en ogwiam, ai wiak. An egi aʼge nak e, op,” oluk, oso erlak aʼge holuk, olot het horogat ago erlak aʼge holuk, ik anggur aʼbosu enede ʼbalagai aʼge loksogo nasu erlak aʼge holuk, ebabut ebam harosogo welago erlak aʼge holuk, “Uang, di aʼge yu aʼge an nak nebam wellep,” oluk, epasu erlak aʼge holuk,

⁸ap ʼbok eneperlak aʼge wagaiam owi pam opsogo wogonoboluk lasu aʼge holuk, op togwi ai aʼge nak nagai epasu aʼge holuk, ede haʼbuktak aʼge holuk, ebabut hegitsogo tiso aʼge holuk, ebe Allah paget degelak welago aʼge holuk, uʼgwarek en esaʼgo werak welago aʼge holuk, edigonobo yo.

⁹Wene aphwami obabenebiso wene moʼgulentasulat enesaʼgo opsogo weriselat, at en dem wene osoam, is logon en, at iak sagalogo poluk togwiam, at en is eniak sebelogo pasulat, elirat ese lemagoluk, wene nis en moʼguligema, demat oluk wesirik, ebabut hegitsogoat ningsogo tenak welago aʼge holuk, edigonobo yo.

¹⁰Is aphwami logon esanat dem wene hwelakpoluk hegitsogo togwi erlakma en togwi ai o. Asogo togwi ai, enebe lok oʼgwe re, is Yahudi enagap eneʼgerlimu aʼge ʼbelak aʼge, op wene wegesarik en e, pobuk dem wene erlakhweat de, we, ʼburlat aphwami onowene aʼge paget ogulat, is logon lalonobogwi ai o.

¹¹Asogo lalonobogulat, di aʼge yu aʼge onuʼgwarek en sabuthorlo puk aʼge saburuogoluk, moʼgulonto puk aʼgeat moʼgulontogulat, aphwami esan eneiyagai eneminat lalonobogwi ai, is eniak ai sebelogo ukpomup o.

¹²Aphwami o Kreta onuʼgwarek aʼge mesik ede ʼgagalak welat wene moʼgulentasu laga aʼge mesik en, wene disogo egei, “Is aphwami o Kreta aʼge yema enebabut e, eniak esei ogwi modok welat, wam seiye ebabut ʼgelaʼge. Yabuk wo pukmu en welat, di aʼge yu aʼge selangsogo no pukmu en eneleʼbik wiak yema re!”

¹³oluk, at iak demat egei. Ai en, is ai enede Allah pam opsogo heʼberik wolom ʼgelaʼgeat welemagoluk enesaʼgo ningsogo werise lomup o.

¹⁴Is aphwami Yahudi aʼge eniak esei yenat nonung wene ʼbeloʼgogwi aʼge emin, aphwami logon en, dem wene ukpoluk enede en ʼgagalogo, “Disogo togulom o,” oluk enesaʼgo worogwi aʼge ai emin, wene ai tenak welemano oluk, enesaʼgo ningsogoat werise lomup o.

¹⁵Allah en aphwami logon enede obabenebegei aʼge holuk, is enebaget, di aʼge yu aʼge wiak erlak o. Op nak o. Asogo aʼgeat de, is logon enede Allah pam heʼberik pogwi erlak welat, enede opogwi aʼge emin, weʼgerlogwi aʼge emin, wiaksogo oruak ai en, is enebaget di aʼge yu aʼge op erlak o. Wiak nak o.

¹⁶Is ai en e, “An Allah ebe naluk o,” oluk, eniak ʼbaksogo ogularat de, “Ebe neneperlak o,” oluk, u ʼgelaʼge, enesaʼgo werak erlak en, Allah emelmel aʼge togulat, di aʼge yu aʼge opsogo tu pukmu en, mia oruak ai o.