Read Silimo Titus 2 Bible Online

Titus 2 - Silimo bible

Titus 2

¹Is asogo oruak aʼgeat de, hat e, wene obapnenebiso wene aiat moʼgulentasulom hegitsogo moʼgulentasu lomup o.

²Ap enarlue aʼge ai, wiak tuagoluk enede ʼgagalu agaiam, dok wogo pogwi ʼgelaʼge wogo pogulat, enebabut e, enebam harosogo welat, enede sebelak welat, enede hurlesogo Allah pam heʼberik pogulat, aphwami logon enedesogo welat, di paget yu paget enebam obotut hogulat, enepe mosogo welat, togu lemagoluk enesaʼgo werise lomup o.

³Ai ʼgelaʼge re, is hwami enarlue aʼge ai, aphwami Allah eragam welat, enebabut hegitsogo togwi ʼgelaʼge, togulat, aphwami logon onobok wiaksogo ʼbalu erlakma en, onuelak ʼgain eneragam welagai ʼgelaʼge, ik anggur eʼgen aʼbosu enede ʼbalago aʼge enebam lasu erlak noʼgwi ano ʼgelaʼge noʼgwi erlak welat, is en is logon opsogo togulom aʼge paget, moʼgulontogu lemagoluk enesaʼgo werise lomubat o.

⁴Asogo moʼgulentasukhwe, is aphwami logon en, wene Allah en moʼgulnentesi wene ano obok wiak ogu lemano oluk, is en e, hwami dogum aʼge ai en onogunlak emin, enemalik emin, enedesogo welat, enede hweriogo, enil haʼbuksogo welat, olema aʼge di aʼge yu aʼge hegitsogo degelogulat, onogunlak eniak hologo welat, togu lemagoluk, moʼgulontogu lemagoluk, enesaʼgo werise lomubat o.

⁶Ai ʼgelaʼge re, is ap souwe aʼge ai en, di paget yu paget enede uak ʼgwelabogo welemagoluk enesaʼgo werise lomubat o.

⁷Asogo enesaʼgo werisoam, is en e, hat hebabut wouwagoluk, di bele yu bele tagalat, hebabut hegitsogo taga lomup o. Asogo tagalat, “Wene yu logo aʼge o,” oluk, ʼbekhitsogo moʼgulentasu lomup o.

⁸Asogo moʼgulentasuam, is logon wene ai enebit aʼge en, “Is wiak tigisa o,” oluk, wene nis nenebam pukmuat ogwiam, eneʼgerli emagoluk, dem weneat obapnenebiso wene, wiak u puk aʼge ano, moʼgulentasu lomup o.

⁹Is eneragam aʼge ai, onuelak ʼgain en di paget yu paget ogwiam, enede opsogo, eniak oʼgo u erlakma en eniak hologoat welat,

¹⁰enaʼge aʼge yogorlia wogulom mia o. We, enebabut enak aʼgeat pobi onobuagoluk, di aʼge yu aʼge paget opsogo hegitsogo togwiam, is aphwami logon en Allah delnenebiso aʼge ano obok ogulat, “At iak moʼgulnontogwi ai op o,” oluk, ogu lemagoluk, enebabut asogo togulom o.

¹¹Is ʼberlek en asogo togulom ai re, Allah ebabut op en di aphwami yu aphwami ʼberlegat delenebigoluk oso aʼge ai ebabut enagat selakma pesimu oruak ai enat o.

¹²Nis nenebabut naduk Allah ebe nenebakhenne ukpogulat e, nonogola en di aʼge yu aʼge ʼgwiangma aʼge nenagai nak opogu lege aʼge ai ukpoluk e, yogodak ya nenebabut nenede uak ʼgwelabogo welat Allah paget hegitsogo togu lemagoluk, at ebabut op aʼge ai pam moʼgulnentasu ai o.

¹³Nis yogodak e, Yesus Kristus ebe Allah ʼgain Onuk Logo aʼge, delnenebegei aʼge ano aphwami en erliktogukhwe, selakmayat obapnonobuma ai paget, nonogola nenagai hogulat ebe yetharok welege o.

¹⁴Nis naduk Allah iak ukpoluk di wiak yu wiak togu lege ai en neneʼgik herle werak ʼgelaʼge tennentarok oruakma, at Yesus Kristus en e, “Is enebe an nuʼgwarek neiyagai emarik e, enebabut op aʼge aʼgoluksogo togu lemagoluk, enebe herle hebilogo onoʼgo ʼbaligoluk, an nebe wareik o,” oluk egei.

¹⁵Hat en wene aiat moʼgulentasuam, is logon onogola en mi-miarak hobouwano oluk, hiak ningsogoat enede ʼgagalogo enesaʼgo werise lomup o.