Read Silimo Titus 3 Bible Online

Titus 3 - Silimo bible

Titus 3

¹Allah eiyagai hat en tenentarok welegen aʼge eba en, onuelak pemerintah aʼge ʼgain aʼge eneragam oruakma, is en di aʼge yu aʼge hegitsogo tuagoluk ogwiam, “I o,” oluk eniak hologo togu lemagoluk enesaʼgo werise lomup.

²Is Allah eiyagai ai en e, aphwami logon onobok wiak ʼbalu erlagat, eniak hurle wiak wene yagonto erlagat, is logon enebabut enagat pobi onobuagoluk aphwami ʼberlegat enebaget enebabut enago lioksogoat togu lemagoluk enesaʼgo werise lomubat o.

³Is asogo togulom ai re, nis naduk nenede erlak welat nenebabut uo aʼge enebabut ʼgelaʼge, nenesaʼgo werak erlagat, ing-dingsogo togulat e, aphwami onuelak ʼgain eneragam welagai ʼgelaʼge, enebam aganhan agalat, onogola en di aʼge yu aʼge nagai opogulat, togwi ai aʼge eragam ʼgelaʼge welege. Asogo welat, is logon wiagabonobogulat, ʼbou togulat, is logon nis deʼgelak nonobogulat, nis en is deʼgelak onobogulat, togu lege.

⁴Asogo togu lege aʼgeat de, at Allah nenebe delnenebiso aʼge ano ebabut op en, nis aphwami edeapnenebesi aʼge ai enagat selakma agama ebe pobi tige ai o.

⁵Asogo selakma agarik, Allah Arogun en nonogola emesogo nenebe ʼget aʼge daknenebiselat, nenebabut muat taknenebasulat, tegei ai re, nis nonuʼgwarek en nenebabut hegitsogo togu legema taknenebesi puk. We, nenebe at enat edeapnenebegeitik delnenebegei ai o.

⁶Allah en Arogun woknentesi ai ebe re, Yesus Kristus nenebe delnenebiso aʼge ano enat loksogo nenebam ʼbelakpou waga ai o.

⁷At Yesus ebabut op en wene nenebam aʼge noʼgorlogo wokholuk, Allah emin togolik hwedik taknenebesimu, nis nonogola en e, “Nenelaluk modok wolomul o,” oluk opogu lege ai hegitsogo eiyeat emagoluk Allah Arogun woknentesi oluk,

⁸egi ai demat o. Hat en is logon enede Allah ebam heʼberik oruak aʼge en, aphwami logon enebaget opsogo lerontogwi ai aʼge logo poluk aʼgoluksogo togulomma, aphwami ʼberlegat enebaget op modok, oluk, asogo togu lemagoluk, enesaʼgo ningsogo werise lerinogoluk, an nede epegi aʼge moʼgulhegis aiat o.

⁹Aʼge re, aphwami enede erlak aʼge en wene ʼbalogwi ai emin, enebe dagetil wegesa aʼge edipmu en ʼbeloʼgogwi ai emin, Allah en nenesaʼgo weregei wene ano paget, wene ʼbalogulat aphwami enemin wiak ago ai emin, ʼberlegat ai pam op ago erlakma re, we, ʼburlat ogwi oluk, hat en ukpasu lomup o.

¹⁰Is logon en, Allah eiyagai aʼge is-is enemin wiak emagoluk, togwi aʼge ai, enesaʼgo naduk werak poluk e, pobuk weribat o. Asogo togun aʼge, enesaʼgo hologwi erlak holuk e, enemin hwedik wolorogup no yo.

¹¹Is aphwami enebabut asogo togwi aʼge ai re, aphwami ebela nal agai ʼgelaʼge, nal agalat, enebabut wiak togwi ai pam, hat e, “Onuʼgwarek en wene enebam pagathorlogwi o,” oluk enebabut enagat ʼbalise legen ai o.

¹²An o wiak oruakhwe, o Nikopolis eba weiktik weleigoluk, nede epegi ai en, at Artemas de a, Tikhikus de a, heʼbek perakpou weik holuk, hat hebe perleneat neʼbek werinogoluk hannisogo walhasu lomup o.

¹³Ye, at Zenas wene Allah en nenesaʼgo weregei wene ano modok aluk aʼge ano emin, Apolos emin, eʼbirek en di aʼge yu aʼge erlak ago erlakhwe elirat woluk louwagoluk, hat en logon lerentaguntik peragonobomup o.

¹⁴Aphwami nis Allah eiyagai aʼge logon, e eʼgen op aʼge egesiso erlak welago ʼgelaʼge, is ai op aʼge eiye om erlakma en we ʼburlat almasogo welemano oluk, is logon di aʼge yu aʼge erlak en nal emarik oruakma, is onuʼgwarek op togulat lerontogu lomogoluk, ai aʼge logo poluk moʼgulogu lemak o.

¹⁵Is Allah eiyagai an nemin yema welege aʼge enebe ʼberlek en hau wathebigisa o. Ye, hat en e, Allah eiyagai enede at ebam heʼberik poluk, nenebe enede aʼge eba, “Paulus en hau wathenebegei,” oluk, moʼgulontomubat o. Allah ebabut op ano en his ʼberlegat tenhentarok welemak o.