Read Silimo Ibrani 1 Bible Online

Ibrani 1 - Silimo bible

Ibrani 1

¹O page enat, at Allah en is ap at iak moʼgulontogu legesa aʼge ebano agauwa nin hwedik nan hwedik, wene at mesik moʼguleselat, at mesik moʼguleselat, mu muat moʼgulentasuam e, is en nis nenaʼbu neneʼbalak moʼgulontogu legesa.

²Aʼgeat de, o ologun hwerli pam, nis yogodak welege ya pam e, Allah en wene ai omlogo moʼgulesimu, at en nis moʼgulnentau waga o. Omlogo ai re, edipmu eba Allah en di aʼge yu aʼge ʼberlegat walhesi ai, ebe at omlogo enat walhesimu, eiye welemagoluk edikpesimu welema ai o.

³Mo il sellim-wallimsogo yogo pou wago ai ʼgelaʼge, Allah ebe erliktogwi aʼge ano en, Yesus ebe perakpou wagama ʼgwiangma atiasogo welat, aik orogole ʼgelaʼge at welago yo. Asogo welat, di aʼge yu aʼge ʼberlegat welago aʼge ai, at iak anni pam welago yo. Oruakma, nis wiak togu lege aʼge hosogo erlagap poluk e, Allah ʼgain Onuk Logo aʼge ano eʼbek ligagarik eragam eʼgik ʼbekhit akhit ʼgainat welago ai o.

⁴At Allah en e, is malaikat ebano ononuk sebelak ʼgelaʼge oruakhwe, at Yesus nak e, onuk ereiya ʼgain logo welemagoluk tualenebegei ʼgelaʼgeat, is malaikat enebe sebelak ʼgelaʼge oruakhwe, at Yesus ebe nak e, ereiya ʼgain logo welago yo.

⁵Allah en at moʼguleselat e, “Hat an nomlogo yo. Hebe yogodak dakhebegis o,” [1] oluk, moʼgulesi ai ʼgelaʼge, is malaikat aʼge logon wene asogo moʼgulentesi no? Erlak o. Ye, mesik e, “An e, at aik eik. Ye, at e, an nomlogo emak o,” [2] oluk is malaikat logon moʼgulentesi no? Erlagat o.

⁶Ai en e, Allah en omlogo mesigat dogo ʼgwiangma yema ʼbelakpou waga ai erlige re, is malaikat disogo moʼgulentesi, “His an nosi malaikat ʼberlegat e, at nak ebam heʼberik welat erliktogu lomup o,” [3] oluk moʼgulentesi.

⁷Ye, mesik e, is malaikat paget disogo egei, “An en is malaikat enebe o sogwei ʼgelaʼge takpoluk enebasulat, is yoʼgo peragenebasu legi aʼge enebe odouk magale ʼgelaʼge takpoluk enebasulat, taga legi o,” [4] oluk egei.

⁸Aʼgeat de, omlogo moʼguleselat e, “Hat hebe Allah yat welat, di aphwami yu aphwami tenentarok modok modok wolorogun o. Asogo welat, wene hegitsogo nak hwalentasu lorogun o.

⁹Ye, hat hebabut e, hegitsogo nak taga legen ai aʼge tagalat, wiak tagalom modok hebit ai en e, harilak enemin welegep aʼge eneragam ʼgelaʼge oruakhwe, hat nak e, haʼgul pam aʼbosu herlilogo edikhebegi ai en e, hogola hagai aʼbik hasu lomup o,” [5] oluk moʼgulesirik,

¹⁰wene mesik disogo moʼgulesiat, “Hat ʼgain Honuk Logo aʼgeatma re, edipmu en e, ʼgwiang edip yeriselat, ʼbogorl heʼgik pam walhasulat, tigen ai o.

¹¹ʼBerlegat walhegen aʼge ai, sum ʼgelaʼge derlep uarik pobuk erlak ema aʼgeat de, hat nak e, hotok modok wolorogun o.

¹²ʼBogorl ʼgwiang ai, sum eʼgirlogo pogwi ai ʼgelaʼge, hat en eʼgirlogo poluk, pobuk ʼget aʼge pagun aʼgeat de, hat hebe nak e, o mo ligom ʼbugom tagokhwe, hebe sebal om erlakma en hotok modogat wolorogun o,” [6] oluk moʼgulesi.

¹³Asogo moʼgulesirik, mesik disogo moʼgulesiat, “Aphwami hat heselei aʼge ebano hoyuk en al ʼbesilogo enebanogoluk, an en owan heʼbek onobou wom erlak oruakhwe, hat an neragam neʼgik ʼbekhit akhit ʼgain wolorogun o,” [7] oluk, is malaikat aʼge ebano mesik moʼgulesi no? Erlagat o.

¹⁴Allah osi malaikat ai enebe re, noʼgosogo togwi aʼge no. Is enarogun ʼgelaʼgeatma enebe re, nis Allah en delnonobua aʼge nak letnontogu lemagoluk, at en yoʼgo onoboluk peragonobou wago aʼgeat o.