Read Silimo Ibrani 10 Bible Online

Ibrani 10 - Silimo bible

Ibrani 10

¹Is aphwami Yahudi aʼge wene Allah en nenesaʼgo weregei wene ai hegitsogo togulat e, demat aʼge togu legesa puk. We, ebe pobuk obapnonobua aʼge oruakhwe, ebam elitsogo togulat, ogut walsogo togulat, togu legesa. Is asogo togulat, o mo ligom, ʼbugom osokhwe, di tahun yu tahun wam Allah warogu legesa aʼge ai aʼge nak warogwi modok welegesa ai en e, is aphwami wam Allah warosu aga legesa aʼge ai pam en ʼgaroksogo obabonobu aʼge mia aga laga ai.

²Is ʼgaroksogo modok-modogat hoenebelipmu re, “Nis wiak tige,” oluk enede eʼgin welat, wenemennei eberogu legesa aʼge ai, erlak agalat e, onuam wusogo Allah wogosu wagallep erlak o.

³Aphwami wiak togwi aʼge ai wam sapi emin, kambing emin, emep pam hoonobu mia ai en, nin hwedik nan hwedik wam wusogo Allah wogogu legesa ai pam, aphwami wiak togu legesa aʼge onogola eberogu legesa ai o.

⁵Asogo togu legesa ai en, at Kristus ʼgwiangma ʼbu agalat, Allah disogo moʼgulesi, “Hat e, aphwami en wam wathogulat, di aʼge yu aʼge wokhogulat, togwi ai aʼge wokhogulom e, hebit ai en e, an nebe aphwami ʼgelaʼge heliʼgogo nebegen yu o.

⁶Hat hebaget wam wusogo odouk narlik hobogwi ai emin, wiak togwi aʼge hoenebinogoluk wam wusogo wokhogwi ai emin, hebirat o.

⁷Ai en e, naik Allah. An en wene moʼgulheik. Hat hiak pam e, wene an en moʼgulhom ʼgelaʼge, An en hat hogola hagai aʼge tiogoluk weik, oluk wene an nebaget pelal wokho pegesema oruak aʼge ai, ebe tiogoluk nebe wegirik welegi yu o,” [27] oluk moʼgulesi.

⁸At Kristus en wene naduk nadugat moʼgulesi ai re, “Aphwami en hat wam wathogulat, di aʼge yu aʼge wokhogulat, odouk narlik hobogulat, wiak togwi aʼge hoenebinogoluk wam wathogulat, togwi ai, hat hebirat o,” [28] oluk egei ai, Allah en nenesaʼgo weregei wene ai hegitsogo togu legesa aʼge paget egei o.

⁹Wene asogo arat moʼgulesirik pobuk disogo moʼgulesi, “Naik Allah o. An en hat hede hagai aʼge aiat tiogoluk nebe wegerik welegi o,” [29] oluk moʼgulesi. Asogo moʼgulesi ai re, at Allah en is naduk togu legesa wene ai erlagap poluk, pobuk Kristus warema aʼge aiat welemagoluk egei ai en asogo moʼgulesi.

¹⁰Ye, at Yesus Kristus Allah ogola agai aʼge ai tagalat, at ebe mesik erlige lebeksogo waragalat, Allah wogesi ai pam, nis nenebe Allah paget modok pesimu welege.

¹¹Is ap Allah eiye aʼge enebe loʼbok en aphwami enebaget togulat e, nin hwedik nan hwedik pobuk naduk wam warogu legesa ai aʼge nak wusogo Allah wogogu legesa ai en, Allah en is wiak togu legesa aʼge noʼgorlogo wokho re, modok mia aga ai o.

¹²Asogo aʼgeat de, at Kristus nak e, nis aphwami en wiak togwi aʼge paget agauwa mesik erlige waragalat, ebe modok-modok Allah wogesirik, eragam eʼgik ʼbekhit akhit inla ʼgwi lagarik ʼgainat oruak ai o.

¹³Asogo welat e, at eselei aʼge Allah en eragam odoksogo onobou wagoam oyuk en al ʼbesilonobua ai nak owan en, yetharok oruak o.

¹⁴At Kristus mesik erlige lebeksogo waragalat e, ebe Allah wogosi ai pam, nis aphwami nenebe Allah paget pasu aʼge ʼgaroksogo modok honenebegei o.

¹⁵At Allah Arogun en, wene ai paget obok moʼgulnentasulat e, wene naduk nadugat disogo egei,

¹⁶“At Allah en, Pobuk, an en is wene ʼget aʼge wusogo wogenebik ai re, wene ebe yuat wusogo wogenebik, Enesaʼgo weriso wene ai onogola enebasulat, enedemu pelal wasulat, tik o,” [30] oluk egeirik e,

¹⁷“An en is wiak togulat, enesaʼgo werak erlakma en wiak togulat, togwi aʼge ai arat memerak poluk, nede eberak weleik modok erlak o,” [31] oluk pobuk egeimu pelal wokho pegesa ai o.

¹⁸Ai en e, nis aphwami nenesaʼgo werak erlak wiak togu lege aʼge, at Allah en arat erlagapsogo ukpesi ai en e, nis wiak togu lege aʼge hononobuagoluk nonuam wusogo Allah paget pobuk po miayat o.

¹⁹Narilak norokhwi. At Yesus emep enamogo waraga ai pam, nis Allah uʼgwarek owi pam eba nonogorlok erlaksogoat ʼguok o.

²⁰Nis asogo ʼgu ai re, o ogorli sum aʼge pam hwerlirak ai, at Yesus ebeat o. Ebeatma re, nis aphwami nenelalugapnonobuema eba ʼguagoluk, ebela at Yesus ebe waraga ai pam, ebela ʼget aʼge nis nenebaget yeregei o.

²¹Yeregeitik, at ebe Allah owi pam ebayat eiye nis nenebaget ʼgain welago yo.

²²At ebe eba oruakma, nis nonogola en e, “Nis wiak tige o,” oluk nonogola wenemennei oborogu lege aʼge opsogo honenebiselat, nenagap petne ik orogole op aʼge pam emetnenebiselat, tegei ai en e, nenede mesigat at ebam heʼberik poluk nonogorlok erlaksogo, at eʼbek horoksogo ʼgogu lomok o.

²³At ebabut e, “Wokhentaik,” oluk obok moʼgulnentasulomtik, ebe woknentasu ai, nis en e, “Demat dipsogo woknontouwa,” oluk aphwami enil pam neniak ʼbaksogo ogu lege aʼge ai ogwi modok welat, ningsogo tenak wolomok o.

²⁴Asogo tenak welat, nis-nis nede-hedesogo welat, let-let togu lomogoluk, nenede ago wat-wat togu lomok o.

²⁵Nonue agauwa wolom erlakma enat wema oluk nenaluk ai en e, nis odoktogwiam is logon mo ogwi ai ʼgelaʼge, nis mo u erlakma en e, ebam ebet-ebet nis-nis nenede ago wusogo nenesaʼgo wat-wat togu lomok o.

²⁶Dem wene Allah iak moʼgulnentigisa aʼge nenaluk welarat de, nenepenen enat wene ai sagalogo ukpoluk modogat wiak togu lomul holuk e, nis pobuk nonuam Allah waromma hononobua modok erlagat o.

²⁷Allah olot het agalat o ologun pam wene enebam pasulat, noʼgorliselat, tua ai pam, at eselei aʼge enebe odouk orlouk pam warenebiselat, nis at iak ukpoluk wiak togu lomul holuk, neneminat watnonobuano oluk, nis en pobirak poluk nonogorloksogoat wolomok o.

²⁸Wene Allah en nenesaʼgo weregeimu, at Musa en moʼgulnentesi wene ai, is aphwami en hwelakpoluk hegitsogo tu erlakma en sagalogo ukpogwi holuk, aphwami enebe ʼbiren de a, henagan de a, “Nis nenil pam is en demat wene ai sagalogo ukpegesa o,” oluk ʼbaksogo ogwi holuk, enedeabonobo erlakma en enebe modok waronobogu legesa epegi o.

²⁹Ai ʼgelaʼge, is aphwami en Allah omlogo aʼgeat de, onoyuk en sobut-sebat hogulat, Allah en nis emin hwedik takpouwogoluk Kristus waraga ai en emep pam opsogo hoenebegei aʼgeat de, pobuk onogola mi-miarat pogulat, Allah ebabut op aʼge Arogun ano eniak esegen wokhogulat, ogwi holuk e, wene modok eʼgin aʼge enebam poluk wiagabonobua o.

³⁰“Aʼgulmu an en warenebiselat, oʼgo an en pasulat, tik o,” [32] oluk egei ai, sa en egei no. Allah enat egei ai nenaluk. Ye, wene mesik e, disogo egei, “An enaik nomu en neiyagai wene enebam pasulat, noʼgorliselat, tik o,” [33] oluk egeiyat.

³¹Wene asogo enebam pouwa ai, nis wiak togumu nenebe Allah elaluk modok welago aʼge eʼgik pam nenebasu holuk, nonogorlok modok ema ai o.

³²Narilak norokhwi. His naduk Allah en henebe atiarak henebesimu oruakma di obotut yu obotut wiaksogo takhonobogukhwe, henepe mosogo welat ningsogo welegep ai honogola eberip o.

³³Asogo welat, his logon aphwami odoktakma en hononuk mi-miasogo wiagaphonobogwiam, his logon en, “Nis neneminat wiagapnonobuak,” oluk eneʼbek ʼgogwiam heneminat wiagaphonobogulat,

³⁴is logon herle wusogo ʼgwelebak onobogwiam henedeabonobogulat, togu legep ai. Asogo togulat honogola en e, “Nis aʼge ningsogo op modok welema aʼge oruak o,” oluk opogulat e, his en aʼge di aʼge yu aʼge horlogwiam henede wiak om erlakma en henagai hogu legep ai o.

³⁵Holuk e, naduk wiagaphonobogukhwe henede ʼbuk welegep aʼge ai ʼgoboksogo ukpo erlakma en, yogodak ya asogoat wolorogup holuk e, oʼgo lok aʼge wokhontouwa ai en e, ningsogo wolomup o.

³⁶His en Allah ogola agai epasu aʼge togwiam, at en, “His wokhentaik,” oluk obok moʼgulhentesi aʼge ai wagup en e, henepe mosogo togulom o.

³⁷Allah iak pam pelal disogo wogo oruak, “At wema ai re, il mesik nak welemarik en wema. Aregen welemarik en wema erlak o. We, elalueat wema o.

³⁸At wema ai, owan wom erlak oruakhwe, is an neiyagai wene enebam aʼge noʼgorlogo an nemin hwedik takhenebegi aʼge enebe loʼbok, enede nebam heʼberik poluk welema ano pam enelaluk welema o. Aʼgeat de, aphwami is aʼge logon togolik lebema aʼge enebe loʼbok, is an nebam lioktak erlak o. We, nebirat o,” [34] oluk egeimu pelal wokho pegesa.

³⁹Asogo aʼgeat de, nis e, is aphwami logon alemaromogoluk togolik lebema aʼge ai ʼgelaʼge welege puk. Erlak o. Nis e, nenebe delnonobuagoluk nenede at ebam heʼberik welege aʼge nak welege o.