Read Silimo Ibrani 11 Bible Online

Ibrani 11 - Silimo bible

Ibrani 11

¹Enede Allah pam heʼberik welagai ai ebe re, disogo. “Op ema,” oluk demat opogulat, “Di aʼge yu aʼge nenil hogwi erlak aʼgeat de, demat oruak nak o,” oluk pobi togulat, ogwi aiat o.

²Is aphwami nadugat enede asogo Allah pam heʼberik welegesa ai pam, Allah en, “Is op,” oluk enebe ebam lioksogo welaga.

³Allah iak pam en ʼbogorl ʼgwiang di aʼge yu aʼge ʼberlegat nenil hogu lege yema re, nis en e, “Nenil hogu lege erlak aʼge pam walhesimu oruak o,” oluk, nenede at ebam heʼberik poluk pobi tu o.

⁴At ap onuk Kain en, we aʼge nak Allah wogosi aʼgeat de, at Habel ai nak e, ede Allah pam heʼberik poluk op aʼge Allah wogesimu, at en e, “Habel nak e, ebabut hegit op hegi,” oluk egei. Asogo egeimu en, at Habel ebe waraga aʼgeat de, ede Allah pam heʼberik welat tegei ai, at en, “An disogo tegis,” oluk moʼgulnentasu ʼgelaʼge modok oruak o.

⁵At ap Henokh ede Allah pam heʼberik welaga ai pam, ebe warom erlak. We, Allah en elaluk ʼgaʼgo wesimu, is aphwami logon en ebe palo tigisa aʼgeat de, enil ho erlak. At ebe asogo owan wo erlakhwe, “At Henokh Allah ogola opsogo nak taga laga,” oluk egesema Allah iak pam pelal wogo oruak.

⁶Aphwami enede Allah pam heʼberik pogwi erlak holuk e, at ogola opsogo tu modok mia o. Ye, at eʼbek womogoluk holuk e, is en e, “Allah demat oruak o,” oluk opogulat, “At ebe enaluk omogoluk tua holuk, at en oʼgo demat aʼge wogentasuat o,” oluk opogulat, tu ai o.

⁷At ap Nuh ogo re, ede Allah pam heʼberik poluk, di wene yu wene pobuk om aʼge Allah en hweseʼbi moʼgulesimu ebe il ho erlak aʼgeat de, “Demat ema aʼge moʼgulnesi hegi,” oluk Allah iak hologo welat, ik so mesik at eiyagai enemin delonobu aʼge paget weregei. Asogo weregeimu, Allah en aphwami wene enebam poluk enebe warenebegei aʼgeat de, at Nuh omu nak e, ede Allah pam heʼberik pesi ai pam, Allah en, “At op,” oluk agap delegei o.

⁸At Abraham ogo re, Allah en yoʼgo poluk, “Hat o mesik eiye welerinogoluk wokheik en e, lak o,” oluk obok moʼgulesimu, at en e, “Wene ai demat,” oluk ede Allah pam heʼberik poluk o ʼgeba laik hwe, oluk eperlak welarat de, waga.

⁹At Abraham wagarik, o obok moʼgulesi aʼge ano arat wagarik welarat de, “O yu erlak o. O muat mesik Allah en elit aʼge walholuk ningtak aʼge pam weregei aʼge mesik oruak o,” oluk, yetharok modok welat, o sum aʼge ya werik da werik nogwil denagalat, ap ʼbok aʼge ʼgelaʼge nese laga. Ai ʼgelaʼgeat, ap Ishak emin, Yakub emin, onogola en e, “Allah en, Disogo wokhentaik, oluk obok egei ai, nis neneminat moʼgulnentesimu eiye omul,” oluk asogoat noʼgu legesa.

¹⁰

¹¹Ye, at Abraham ebe sebal agarik ugwe Sara abeli welaga aʼgeat de, at Abraham ede en e, “Allah en obok moʼgulnentesi ano demat woknontouwayat o,” oluk ede Allah pam heʼberik poluk welaga ano pam, hwe Sara omlogo doru hegit agama deregei.

¹²Asogo deregei ai en, ogun Abraham ebe sebal agarik warom ʼgelaʼge welaga aʼgeat de, at ebe mesigat aʼge en dogoʼgwe aʼge enebe hwesagal ʼbogorl pam aʼbik welago ai ʼgelaʼge emin, ik ʼberlik ik laut yeʼgelak esaʼgoʼgwe welago ai ʼgelaʼge emin, aʼbik eneʼgik wenaru modok mia ai ʼgelaʼge wiyalegesa ai o.

¹³Is aphwami ononuk il waga legi aʼge ai ʼberlegat en, “At Allah demat,” oluk enede at ebam heʼberik poluk welegesa ai pam, Allah en obok moʼgulentesi ai ebe wo erlak aʼgeat de, aphwami en di aʼge yu aʼge walegat oruakma enil yetholuk, onogola enagai hogwi ai ʼgelaʼge, is enede pam en, “Demat wul aʼge oruak o, oluk opogu lege ai en, ʼgwiangma yema is ap mu aʼge onowi loʼgwe ʼbogulogo lagalat ap ʼbok ʼgelaʼge welege o,” oluk ʼbaksogo ogulat enebe waretil legesa.

¹⁴Asogo togu legesa ai pam, nis nenede en e, “Is onowi ebe op aʼge heratogu legesa,” oluk enak aʼge hogu lege ai o.

¹⁵Is onowi naduk welegesema ukpoluk libegesema ebano paget ebam eberogullepma re, togolik elirat wetlip ai en e, o is welegesema ai paget ebam eberogu legesa erlak o.

¹⁶We, is eberogu legesa ai re, onowi ebe op modok ʼbogorl pam aʼge paget enagai opogu legesa ai en e, Allah en is enebaget onowi arat degelogo enebesirikmu no oluk e, at en e, “An is enaik,” oluk, eʼgerli erlagat oso ai o.

¹⁷Nadugat Allah en Abraham moʼguleselat, “Hat en dogoʼgwe aʼge wiyalema oluk moʼgulhegis ano ebe re, homlogo Ishak yu en dogoʼgwe aʼge en wiyalema ebele paget moʼgulhegis o, [35] oluk, moʼgulesi aʼgeat de, pobuk ebabut ʼbaligoluk, “Homlogo ebe yu an nebaget watnemin o,” oluk moʼgulesi. “Watnemin o,” oluk moʼgulesimu, at Abraham ede Allah pam heʼberik poluk welaga ai pam, “Ishak waromma Allah en pobuk elirat elalugaptua,” oluk, ebe wusogo Allah wogeigoluk tegei ai en e, eniak agamsogo ogulat e, Ishak werak aʼge elaluk aga Abraham en wesi, oluk uat o.

¹⁸

¹⁹

²⁰Ye, at Ishak ai re, ede Allah pam heʼberik poluk welaga ai pam, eiyagai Yakub emin, Esau emin, moʼgulentasulat, aphwami en is logon muʼgat wusogo enebam pogwi ai ʼgelaʼge, “Pobuk Allah en obaphenebise lemak o,” oluk moʼgulentesi.

²¹At Yakub ede Allah pam heʼberik poluk welaga ai pam, wareigoluk tagalat, ebe oʼbouwaʼgun ologun pam heʼberik poluk Allah hau weriselat, aphwami en is logon muʼgat wusogo enebam pogwi ai ʼgelaʼge, is enebe ʼbiren Yusuf eiyagai moʼgulentasulat e, “Allah en obaphenebise lemak o,” oluk moʼgulentesiat.

²²At Yusuf ogo re, ede Allah pam heʼberik poluk welaga ai pam, ebe ʼgerat wareriogoluk tagalat, eiyagai Israel aʼge o Mesir en libom aʼge paget moʼgulentasulat, ye, “An nuak orluktak ai re, disogo tip o,” oluk moʼgulentasulat, tegei.

²³At Musa ogo re, aik ia enede Allah pam heʼberik poluk welegesa ai pam, Musa ebe derigisarik ʼgwelakhegesa ʼgal e, malik ebe modok op en, at ap ʼgain eba aʼge en wene lebegei aʼge onogorlok erlaksogoat malik dogo ai hisogo poluk oruakhwe, dugwi henagan enam egei.

²⁴Ye, at Musa ai ebe arat souwe agarik en, ede Allah pam heʼberik poluk, disogo epesi, “An ap ʼgain Firaun agalogo emalik ʼgelaʼge wolom e, modok nebit o.

²⁵An nebe op welat, we lodu paget aʼgeat de, nagaisogo wiak tagalom ai nebit o. We, is Allah eiyagai enemin di obotut yu obotut taknobogulom op o,” oluk, ogola epesirik e,

²⁶“Pobuk Allah en oʼgo woknema aʼge oruak o,” oluk epesirik e, “Di aʼge yu aʼge op aʼge aphwami o Mesir eneʼgikmu aʼge yu logo puk o,” oluk, ukpoluk e, “Kristus paget nenebe mi-miarak nonobogulom aiat logo yo,” oluk epesi.

²⁷Asogo opoluk libagarik e, ede Allah pam heʼberik poluk, “Ap ʼgain Firaun ai olot het om ai nogorlok o,” oluk ede opo erlakma enat, Allah ebe nenil hogwi erlak aʼge ai il hasulat ʼgelaʼge, “Nede at ebam pegirikmu re, lebigat o,” oluk o Mesir ukpoluk liplau waga ai o.

²⁸Liplau wagarik, ede asogoat Allah pam heʼberik welat, at malaikat mesik aphwami enebe warenebiso aʼge en, aphwami o Mesir aʼge eneiyagai naduk dogo aʼge warenebiselat, aphwami Israel aʼge warenebisomano oluk e, wam domba wusogo onuk Paskah noʼgulat, emep o ʼgoduk petne loʼbok wetil louwagoluk moʼgulentesi.

²⁹Aphwami Israel aʼge enede asogoat Allah pam heʼberik welat, aphwami ʼgwiang doʼbon oʼgwe lagai ai ʼgelaʼge, ik yeʼgelak onuk Laut Merah ai hielak oʼgwe liplau wegesa ai o. Asogo liplau wegesema, is aphwami Mesir aʼge en, “Nis ogo asogoat libomok o,” oluk egesarik liplau wagaimu, ik en sebelenebegei ai o.

³⁰Is aphwami Israel aʼge enede Allah pam asogo heʼberik welat, o Yeriko seli agauwa hebarligenam waloʼgogu legesarik, agauwa agaikhen waloʼgogumu re, leget pakleget werik aʼge moluk-melak egei.

³¹Asogo moluk-melak osoam, at hwe Rahab danian nese laga aʼge ano ogo re, ede Allah pam heʼberik poluk, is ap Israel aʼge enil en wogu legesa aʼge enebe opsogo wogenebegei ai en e, is aphwami logon Allah iak wo enebit aʼge enebe modok waronobogulat, at hwe ai nak e, woru erlak ukpegesa ai o.

³²An en ap Gideon emin, Barak emin, Simson emin, Yefta emin, Daud emin, Samuel emin, is ap Allah iak moʼgulontogu legesa aʼge emin, enede Allah pam heʼberik welat togu legesa aʼge ʼbeliʼgogo moʼgulhonto aʼgeat de, o agauwa arat horok agarikmu re, mia o.

³³Is ai ʼberlegat enede Allah pam heʼberik welegesa ai en e, is o eliʼgo mesik emin weim obogulat, onuelak ʼgain ononuk logo aʼge mabenabonoboluk onowi sebelogu legesa. Enebabut hegitsogo togu legesema, Allah en e, “His pobuk op aʼge wokhentaik,” oluk obok moʼgulentesi aʼge ano, ebe wogu legesayat. Orlomene ʼgelaʼge singa ebabut wiak aʼge ai emde dopno togulat,

³⁴odouk magale onogorlok aʼge ʼgelaʼge nekhisogo pogulat, ʼgarok pam waronobu aʼge onuʼgwarek en enebe delogulat, enanni erlak aʼgeat de, enanni agalat, weim obogulat enanni agalat e, selei aʼge esan aʼbigat mugontogulat,

³⁵is hwami logon enemalik werak aʼge pobuk enelalugabenebisoam wogonobogulat, til waga legesa. Asogo til wagaihwe, is pema re, enebe pobuk op welema aʼge paget, Allah en enelalugabonobuagoluk, aphwami logon en enebe wik-wiaksogo tagonobogukhwe, enagap erlele horlo erlakma en welegesa.

³⁶Ye, pema re, aphwami eniak elitnu ding-dungsogo tagonobogulat, ʼgoʼbu waronobogulat, eneʼgik herle wusogo ʼgwelagonobogulat,

³⁷helep pam damuksogo ʼbeʼgi waronobogulat, ʼgegik pam enebagase derlep togulat, ʼgarok pam waronobogulat, di obotut yu obotut hogulat, sum e, wam domba emin, kambing emin, agap noʼgorlogo ʼbuktogulat, di aʼge yu aʼge erlak en enerlagaigat welat, is aphwami logon en wik-wiaksogo tagonobogulat, togu legesa.

³⁸Is ai ʼberlegat enebabut op asogo op togu legesa ai en, aphwami enemin ʼgwiangma yema wolom e, mia o. Is ai onowi werik ʼgelaʼge erlakma re, ʼbogulogo o leimu aphwami erlakma emin, dom oʼgwe emin, noʼgulat, owik oʼgwe emin, ʼgwiang ele delak oʼgwe emin, welegesa.

³⁹Allah en e, “Obaphenebik,” oluk obok moʼgulnentesi aʼge ai, is enebe ʼberlegat ai ebe wo erlak aʼgeat de, enede Allah pam heʼberik welat op til waga legesa ai en, at Allah en, “Is op,” oluk enebe ebam liok egei. Asogo ebe wo erlak ai re, Allah en pageat nis nenebaget wene op aʼge hwalogo nenebasulat, nis erlak oruakhwe is onomu nak e, ede ʼgaroksogo obabonobo erlak. We, nis nenebaget, “Is enemin mesik erlige ʼgaroksogo op tagenebaik,” oluk obok egeitikmu no oluk e, is en ebe wo erlak welegesa ai o.