Read Silimo Ibrani 12 Bible Online

Ibrani 12 - Silimo bible

Ibrani 12

¹Is aphwami naduk til wegesa aʼge onobok il wege ai, enebe esan logolak neneragam oʼgwe waliʼgogo welat enil yetnentarok oruak ai en e, sa omut oruak sa omut erlak louwogoluk di aʼge yu aʼge enebam eʼgin aʼge noʼgorlogo poluk lagai ai ʼgelaʼge, nis nenebam eʼgin wiak welago aʼge emin, nenebabut wiak togu lege aʼge nenebam loʼboktak modok welago aʼge ai emin, ʼberlegat noʼgorlogo ukpoluk, Allah en, “Hwerli ai hwerli lu,” oluk moʼgulnentesi ai, nonogola en e, “Nonorogole dokhum ʼbekhit hwerli ai pamat louwok,” oluk, nenannisogo laga lomok o.

²Asogo lagalat, naduk nenede Yesus ebam heʼberik pouwagoluk, at enat nenede ʼgagaliselat, hwerli ologun pam ʼgaroksogo modok op lai louwagoluk, at enat tennentarok welat, tiso ai en e, arat nis nenilen woluk motluk laga lomok o. At ogola en e, “Eneʼgerli wusogo enebe e pam edigonoboluk waronobogwi ai ʼgelaʼge, an asogo watnobu neʼgerli,” oluk opo erlakma en, we, “An pobuk nogola nagai haik,” oluk, at ebe worugukhwe epe mosogo waragarik en, pobuk elaluk agarik yogodak Allah ʼgain welagoma eba eragam eʼgik ʼbekhit akhit ʼgainat oruak o.

³His honogola ʼbuk emarik henanni erlak emano oluk, is aphwami wiak togwi aʼge en at Yesus onogola en mi-miarak poluk, ebe wiagap pogukhwe hallorak onoboluk epe mosogo welaga ai, his en e, “At noʼgosogo tegei no,” oluk honogola en pobi togu lomup o.

⁴His nak e, wiak tu henebit en, weim enannisogo obogwi ai ʼgelaʼge togwiam, henemep namogo wathonobu erlak aʼge welegep o.

⁵Enaiklak en eneiyagai enesaʼgo worogwi ai ʼgelaʼge, his Allah eiyagai aʼge, at en henesaʼgo weriso wene ai memerak pegeptik welegep a? At en eselat, “Aphwami en nede hwedik aʼge nak enebe loʼbok enesaʼgo weriselat, is an neiyagai aʼge oluk, ʼbaksogo ese legi aʼge nak enebe loʼbok ʼgoʼbu warenebiselat, taga legi ai en e, nomlogo yo. Hat en e, Naik ʼgain Onuk Logo aʼge en nesaʼgo weregei, oluk hogola en seramtak poluk ukpagun o. An en, Wiak tigen, oluk moʼgulheik holuk e, hede ʼbugom erlakma en wolomup o,” [36] oluk egeimu pelal wokho pegesa.

⁷Is malik wei aʼge enaiklak en enesaʼgo werak erlak logon welagai no? Enesaʼgo worogwi nak ai en e, Allah en henesaʼgo werisoam, his en e, “Nis at eiyagai welege ai en nenesaʼgo weregei,” oluk henepe mosogo wolomup o.

⁸Malik wei aʼge enebe ʼberlegat enesaʼgo worogwi ai ʼgelaʼge, his logon henesaʼgo werak erlak holuk e, his at eiyagai demat aʼge puk o. We, ap yogunat en dogo aʼge o.

⁹Ye, nis nenaiklak nenebe daknenebigisa aʼge en nenesaʼgo worogwiam, eniak hwelakpoluk sakhorak onobogu lege ai ʼgelaʼge, nenelaluk welemagoluk nenaik en nenede ʼget daknenebiso aʼge iak hologo sakhosogo tu erlak no? At iak hwelakpoluk tuat o.

¹⁰Is en e, “Op tu aʼge re, yuat hegi,” oluk lodu paget we weiyat enesaʼgo worogwi aʼgeat de, nenaik Allah nak e, at wiak tu erlakma en, degelak welago ai ʼgelaʼge, nis nenemin asogoat degelak welemagoluk nenesaʼgo weriso yo.

¹¹Nenesaʼgo werisoam eriayat nenede op ago erlak. We, nenede wiak ago aʼgeat de, pobuk nenesaʼgo weriso ai pam en de, nenesaʼgo werak welege aʼge, di aʼge yu aʼge eʼgen egesiso ai ʼgelaʼge, nenebabut op lioktak welat hegitsogo nak togu lomul ai o.

¹²Ai en e, heneʼgik anni erlak aʼge anniap pogulat, hondogorlu anni erlak aʼge haʼbugap pogulat, tip o.

¹³Asogo obap poluk, “Honoyuk edenak aʼge pobuk henemeʼgen hwedik erlak aʼge op emagoluk, ebela hegitsogo yakho laga lomup o.” [37]

¹⁴His henebe degelogo Allah akhit pogwi erlak wolorogup holuk e, at ebe henil hagup modok erlak ai en e, aphwami ʼberlegat henemin opsogo laʼbulogo welat, henebe at ebaget poluk wiak tu erlakma en, opsogo degelak modok wolomogoluk henannisogo togu lomup o.

¹⁵Aphwami his aʼge logon Allah ebabut op en woknentasu aʼge ai ukpoluk libagaiam e, eʼgela erle aʼge ʼbaktagalat oruakma, op aʼge ebam agalat erleap pasu ai ʼgelaʼge, at ai en aphwami ʼberlegat wiagabenebisomano oluk henil opsogo wolomup o.

¹⁶At Esau soʼboru nele en, disogo egei, “Naduk dogo re, anatma, an eiye eik aʼge ai logo re, erlak o. Not eiye emak,” oluk soʼboru eneʼgik aiyo mesigat noʼgwi paget, ot ebam oʼgo wesi ai ʼgelaʼge, his logon ʼbabi tenontogulat, demat aʼge logo po erlakma en honogola seramtak pogulat, togu lorogup no yo.

¹⁷At Esau tegei ai, his henaluk o. At ogola en e, “Aphwami en is logon muʼgat wusogo wogontogwi ai ʼgelaʼge, naik en moʼgulneselat, Allah en obaphebise lemak, oluk moʼgulnemak o,” oluk pobuk moʼgulemagoluk nge tagalat ʼgonu moʼgulesi aʼgeat de, ot arat moʼgulesirikmu no oluk e, pobuk iak togolik lagaksogo moʼgulom e, mia aga ai o.

¹⁸Naduk is aphwami Israel aʼge dom Sinai eneʼgik elirat tenho aʼge pam wegesa ai ʼgelaʼge, his dom ai ʼgelaʼge pam wom erlak. Dom Sinai ai pam ebe disogo togumu wegesa. Odouk magale lok ligagalat, o homuk eriogoluk hik agalat, yasobu annisogo punhau wagalat,

¹⁹iak ʼbiʼgong lok aʼge iak ʼgelaʼge eselat e, osokhwe Allah iak loksogo eselat, wene disogo egei, “Aphwami emin, wam emin, dom yu eneʼgik tenhau wagai holuk e, enebe helep pam ʼbeʼgi dungsogo modok warenebip o,” [38] oluk enesaʼgo werisoam hweligisarik, enesaʼgo hwelak wolom modok mia agama, is en e, “At iak ai pobuk mesik emin moʼgulnonto mia o,” oluk eniak ningsogo egesa.

²¹Modok onogorlok aʼge enil hegesarik eniak ningsogoat asogo Musa moʼgulegisema re, at en e, disogo moʼgulentesi, “An ogo re, nogorlok en nuak erlik erlik egeiyat o,” [39] oluk moʼgulentesi.

²²Is ai ʼgelaʼge pam wegesa aʼgeat de, his nak e, dom Sion Allah elaluk welago aʼge owi seli o kota Yerusalem ʼbogorl pam aʼge eʼbek wegep ai o. Eba re, malaikat esan di logolak yu logolak emin,

²³Allah eiyagai naduk dogo aʼge ononuk ʼbogorl pam pelal wogo oruak aʼge odoktogulat onogola enagai hogwi aʼge emin, is aphwami op togu legesema Allah en ʼgaroksogo obabenebegei aʼge enarogun emin, Allah ebe, aphwami ʼberlegat wene enebam pasulat, noʼgorliselat, tiso aʼge ano emin, enemin oruakma eʼbek wegep o.

²⁴Yogodak Allah en nis emin hwedik tuogoluk wene ʼget aʼge wusogo woknenebegeitik, Yesus ebe woknentesimu ʼburl heirakma oruak ai emin oruakma wegep o. Ai re, Habel ue yen weregeimu emep pam wene wiak aga aʼge ai wegep puk. We, Yesus ebe werigisema emep pam ʼgwete hogulat wusogo op wene aga aʼge pam wegep o.

²⁵Is aphwami Allah iak ʼgwiangma moʼgulentasuam enesaʼgo holu enebit welegesa aʼge, enebe enelaluk ugonobo erlakma en warenebise laga ai o. Holuk e, nis yu ogo re, wene ʼbogorl pam en moʼgulnentasuam nenesaʼgo holu nenebit wolomul holuk e, watnonobu erlakma en uknonobouwa epegep a? Erlak o. Modok watnonobua ai en e, at iak osokhwe henesaʼgo hwelak erlak, “Nenebit o,” oluk ukpagupno oluk, henepe heberlogo wolomup o.

²⁶Ai erlige, at Allah iak egei ai pam ʼgwiang oborlogouk tegei aʼgeat de, yogodak, at en e, “An pobuk disogo tik,” oluk obok egei aʼge pelal disogo wogo oruak, “An pobuk mesik erlige ʼgwiang yu nak oborlogouk haik puk. Erlak o. ʼBogorl eminat oborlogouk haik o,” [40] oluk egeimu pelal wogo oruak.

²⁷Asogo, “Mesik erlige oborlogouk haik,” oluk egei ai re, oborlogouk u puk ningtak aʼge welemagoluk ukpoluk e, ʼbogorl, ʼgwiang at en walhesi aʼge ʼberlegat oborlogouk haigoluk egei ai o.

²⁸Asogo oborlogouk houwa aʼgeat de, nis nak e, Allah eragam nenebasumu oborlogouk ua modok erlak aʼge woknentesimu eiye egerik welege ai en e, “Naik Allah o,” oluk hau worogu lomok o. Ye, at Allah ebe re, odouk en di aʼge yu aʼge perlengsogo nasu ai ʼgelaʼgeatma re, nis asogo wiagapnonobuano oluk, at ebe nonogorloksogo togulat, hau doʼgoksogo worogulat, togulat e, at iak hologo at ogola agai aʼge togulat, erliktogu lomok o.