Read Silimo Ibrani 13 Bible Online

Ibrani 13 - Silimo bible

Ibrani 13

¹Narilak norokhwi. Allah eiyagai henebe mesigat aʼge ʼgelaʼge nede-hedesogo togu legep aʼge ai, asogo henemin hwedigat togu lomup o.

²Is aphwami logon en e, malaikat aʼge enebe ap ʼbok ʼgelaʼge we yogunat wogenebigisarik seni serigisa ai en e, ap ʼbok heneʼbek wagai holuk e, henebakhenne ugonobo pukmu en wogonobogu lomup o.

³Is logon eneʼgik herle werak oruakma, honogola en e, “Nis ogo re, neneminat neneʼgik herle werak ʼgelaʼge welege o,” oluk, is enebam eberogulat, is logon di wiak yu wiak tagonobogwiam, his honogola en e, “Nis ogo re, ʼgwiangma yema owan oruakma asogoat taknonobo yo,” oluk, is enebam eberogulat, togu lomup o.

⁴Ap et, hwami et, enebabut danian nil noʼgwi aʼge emin, ap onugwami aʼge ʼbabi tenontogwi aʼge emin, is pobuk Allah en wene enebam poluk wiagabonobua ai en e, ap en hwami wogontogwi ai, aphwami ʼberlek en logo poluk, yogunat tenonto erlakma en hweap wogo aʼge loʼbok enemin opsogo nogo ogulom o.

⁵Allah en nenebe loʼbok nenebaget eselat e, “An en hat neʼgik ʼgoboksogo ukhebasulat, hebe hematekma hebasulat, tik erlak o,” [41] oluk egei ai en e, his uang henede hwedik takpoluk wolorogup o. We, weiyat oruak ai, his henede en e, “Yu elit oruak,” oluk opo yo.

⁶Asogo opogulat, honogola en, Allah en e, “Neʼgik ʼgoboksogo ukhebaik erlak o,” egei ai en e, nenede haʼbuksogo welat disogo ogulom, “Naik ʼgain Onuk Logo aʼge re, an letniasu aʼge. Holuk e, aphwami en an noʼgosogo taknobo yo. An nogorlok erlak o,” [42] oluk ogulom ai.

⁷Honuelak naduk tenhentarok welegesa aʼge en, Allah iak moʼgulhentigisa aʼge ai, enebam eberak wolomup o. Is enede Allah ebam heʼberik poluk, enebe enelaluk welat emin, waromogoluk emin, togu legesa aʼge ai pobirak poluk, his is enebabut wokho henede Allah pam heʼberik pogu lomup o.

⁸At Yesus Kristus ebe re, o pageat en, yogodak en, otok modok welago ai ʼgelaʼge, pobuk asogoat otok modok welema o.

⁹Asogo welema ai en e, is aphwami logon en di wene yu wene mu aʼge pam lalhonobuano yo. Ye, is aphwami nadugat enemde noʼgwi aʼge paget logo poluk togu legesa ai pam op om erlakma re, nenede ai pam hurle om mia o. We, Allah ebabut op en woknentasu ai pam nenede opsogo hurle om o.

¹⁰Allah owi sum aʼge werikmu is ap Allah eiye Yahudi aʼge en wam Allah paget wusogo helep delak aʼge pam pogu legesa ai ʼgelaʼge, nis en Allah paget pogu lege aʼge ai, is ap ai en nau wom mia o.

¹¹O eba is ap Allah eiye aʼge onue ʼgain en is ʼberlegat wiak togu legesa aʼge Allah en erlagapsogo ukpouwagoluk, wam wusogo emep woluk o ogorlirak Allah uʼgwarek owi pam ʼgelaʼge ai ʼgwise laga aʼgeat de, wam ebe nak e, leget oʼborl akhit odouk narlik pei laga legesa.

¹²Asogo togu legesa ai en, at Yesus uʼgwarek emep pam eiyagai wiak togwi aʼge hosogo, enebe Allah paget paiogoluk leget pakleget emde ʼbelak abel oʼborl akhit waraga ai o.

¹³Asogo waraga ai en, nis ʼgwiangma yema modok wolomul erlak o. We, nis pobuk o modok modok wolomul aʼge palo togu lege ai en e, at Yesus aphwami en eniak elitnu ding-dungsogo yagogu legesa ai ʼgelaʼge, nis asogo moʼgulnontogukhwe, at eʼbek leget abel oʼborl akhit libomok o.

¹⁵Ai en e, at Yesus emin hwedik welat, nis en e, “Naik Allah,” oluk wam wusogo at ebaget wogogulom ʼgelaʼge, nin hwedik nan hwedik nenemde pam Allah onuk loksogo erliktogwi modok wolomok o.

¹⁶Asogo togulat, aphwami logon obabonobogulat, lerontogulat, togu lomok o. Asogo togulom ai re, Allah ede opsogo uam warogulom ʼgelaʼgeatma re, memerak pagup no yo.

¹⁷Pobuk Allah en e, his honuelak disogo moʼgulontouwa, Is enede paget noʼgosogo togu legeptik, oluk moʼgulontogwiam, is onogola en e, “Nis neneba loʼbogat oʼgo moʼgulomul hegi o,” oluk, opsogo tenhentarok modok welagai ai en e, is eneragam ʼgonu oluk eniak hologo togu lomup o. Asogo togu lorogup holuk e, is onogola enagaisogo, his henebaget togu lema ai o. Aʼgeat de, his en is eniak hologo togu lorogup erlak holuk e, is onogola wiak welat, his henebaget we ʼburlat togulom o.

¹⁸Nis di aʼge yu aʼge opsogo nak togu lomogoluk, opogulat, nonogola en e, “Nis wene nenebam erlak. Nonogola selak,” oluk opogu lege ai en, nis nenebaget seʼban ogu lomup o.

¹⁹Ogulat, ebe logo re, an nebe Allah en perleneat his heneʼbek togolik peraknobumagoluk seʼban ogu lorogup en moʼgulhentegis ai o.

²⁰Nenaik Allah laʼbulik nenebasu aʼge ano en, nonue ʼgain Onuk Logo aʼge Yesus waragarikmu en ebe elalugaptegei. At ebe emep namogo werigisa ai pam, Allah en wene modok welema aʼge wusogo woknenebegeitik, nis ʼberlegat Yesus en uam domba ʼgelaʼge opsogo tennentarok welemagoluk ebe edikpesi ai o.

²¹His Allah ogola agai epasu aʼge nak opsogo togu lorogup en e, di aʼge yu aʼge op aʼge ʼberlegat wokhontouwak o. Asogo wokhentasuam, nis nenemin ʼberlek en Allah ogola opsogo togu lemagoluk, nenebabut at en woknontouwa ai, ebe re, Yesus Kristus en woknontouwak o. At Kristus aiat erliktogwi modok wolomok o. Demat emak u ʼgelaʼge, “Amin,” egi ai o.

²²Narilak norokhwi. Wene horoksogoat henesaʼgo wusogo pelal wokho heneʼbek perakpou wegi ai, henebit om erlakma en henesaʼgo hwelak wolomup o.

²³Ye, nonot Timotius ano re, ebe arat herle hebilogo lebikpegesema en henaluksogo welemagoluk moʼgulhentegis o. At ebe perleneat an niau wago holuk e, an pobuk his hentau wagalat nemin womul o.

²⁴His en e, is ap honuelak his tenhentarok welagai aʼge ʼberlegat emin, Allah eiyagai pema akhit ʼberlegat emin, “Hau wathenebegei o,” oluk moʼgulontomup o. Ye, nenarilak nonorokhwi o Italia welagai aʼge en hau wathenebigisayat o.

²⁵Narilak norokhwi. Allah ebabut op aʼge ano en his ʼberlegat tenhentarok welemak o.