Read Silimo Ibrani 2 Bible Online

Ibrani 2 - Silimo bible

Ibrani 2

¹Ai enat, aphwami ik so pam lagaimu ik en wogonoboluk lasu ai ʼgelaʼge, nis dem wene ai ukpoma momu woknonoboluk louwano oluk, wene nenesaʼgo hwelige aʼge ai ningsogo tenak wolomok o.

²Wene ai, nis nenaʼbu neneʼbalak moʼgulontouwagoluk, Allah en is malaikat yoʼgo onoboluk peragonobou wagama moʼgulentigisa aʼge demat aga o. Ye, is logon wene ai hwelakpoluk hegitsogo tu erlak aʼge, enebe loʼbok wene hegitsogoat enebam poluk wiagabenebise laga ai o.

³Ai ʼgelaʼge, nis yogodak delnonobu aʼge wene lok aʼge ai nenebakhenne ukpul holuk, wiagapnonobuayat o. Naduk naduk wene at nonue ʼgain Onuk Logo aʼge ebe enat aphwami logon moʼgulentesimu enesaʼgo hweligisa aʼge en seʼgeksogo moʼgulnentigisa aʼge ano demat aga.

⁴Wene ai moʼgulentil denagaimu re, is aphwami logon en, “Wene ai demat o,” oluk pobi tuagoluk, Allah en eniak lekho di aʼge yu aʼge tu puk aʼge elalinat annisogo tagalat, at ogola agai aʼge hegitsogo enebabut loʼbok Arogun soʼbusogo wogentasulat, tegei aʼge ai, nis en nenebakhenne ukpul holuk e, uknonobouwa epegep a? Wiagapnonobuayat o.

⁵Nis en e, “Pobuk ʼgwiang ʼget aʼge pam wolomul,” oluk ogu lege aʼge ai welat, Allah en is malaikat aʼge eniak hologo welemagoluk ʼgain edigenebesi puk. Erlak o.

⁶Wene aphwami enebaget Allah iak pam ap mesik en pelal disogo wesimu oruak, “Eige! Naik Allah o. Nis nenebe aphwami aʼge dagege aʼgeat de, hat en nenebam eberak welat, holukhwema nenebasulat, taga legen ai noʼgosogo oluk.

⁷Agauwa wei nak lodu paget is malaikat aʼge ononuk oruak aʼge logo oruakhwe, nis nononuk erlakma en mia ʼgelaʼge takpoluk nenebegen aʼgeat de, di aʼge yu aʼge ʼberlegat nis neniak hologo welat, erliknonobogulat, hau doʼgoksogo watnonobogulat, togu lemagoluk ediknonobouwa ai o,” [8] oluk pelal wokho pegesa. Di aʼge yu aʼge logon ʼbelabu erlakma en ʼberlegat nis neniak hologo welemagoluk egei aʼgeat de, yogodak di aʼge yu aʼge ʼberlegat neniak hologwi erlak owan oruak hogu lege o.

⁹Aʼgeat de, at Yesus nak e, arat ʼgain edikpesimu oruak hogu lege o. Allah ebabut op en, Yesus aphwami ʼberlek enebaget waremagoluk malaikat ononuk oruak aʼge logo ʼgelaʼge oruakhwe, at onuk erlak mia ʼgelaʼge takpesimu, ebe di obotut yu obotut hil hil waraga ai pam, Allah en at onuk oruak aʼge ʼgain edikpesimu oruak ai o.

¹⁰At Allah ai re, di aʼge yu aʼge at uʼgwarek paget, uʼgwarek enat walhesi aʼge en, aphwami at eiyagai esanat erligonobogu lomma wogonoboluk louwagoluk, ebela yeriso aʼge Yesus at o. At enat aphwami elit delenebiselat wogonoboluk lasu lemagoluk di obotut yu obotut hil hil waremagoluk epesi ai re, elit opo aʼge hegitsogoat epesi o.

¹¹Yesus ebe, nis aphwami wiak togwi aʼge honenebiso aʼge ai emin, nis aphwami nenebe honenebiso aʼge emin, nenemin laʼbulogo re, nenaik mesigat. Ai en e, at Yesus eʼgerli erlagat, “Is aphwami ai an narilak norokhwi,” oluk oso ai o.

¹²At en Allah moʼguleselat e, “An en hat hebe narilak norokhwi moʼgulentasulat, heiyagai odoktogwi aʼge ebano eneʼgerlakma welat, erlikhebiselat, taga leik o,” [9] oluk moʼgulesirik,

¹³mesik eminat ap mesik moʼguleselat e, “An nede Allah pam heʼberik poluk weleik o,” [10] oluk moʼgulesirik e, “Allah en neiyagai woknesi aʼge ebano enemin welege yu hemen,” [11] oluk moʼgulesi.

¹⁴At en e, “Aphwami ai an neiyagai,” oluk egei ai re, nis aphwami waraga lege aʼge paget egei ai en e, at ebe waragalat, nis aphwami waraga lege aʼge edip at Iblis eʼgik pam welago aʼge ai, at Yesus en at Iblis ebe mabenap pasulat,

¹⁵nis aphwami nenebe dagotluk nenelaluk welat, warom nonogorlok en neneʼgik herle werak ʼgelaʼge welege aʼge hebilogo nenebasulat, tigoluk, nis waraga lege aʼge nenebabut wokho waraga ai o.

¹⁶Asogo tegei ai re, demat malaikat aʼge olukhwema onoboluk edeabenebegei puk. Erlak o. Allah iak pam pelal wogo oruak hegitsogoat, nis ap Abraham en dogoʼgwe aʼge yu olukhwema nonoboluk, nenebe edeapnenebegei ai o.

¹⁷Asogo tegei ai re, disogo oluk. Nis aphwami wiak togu lege aʼge, at en erlagap paigoluk, at ebe Allah eiye aʼge ʼgain welat, ebabut Allah paget heʼbisogo tagalat, nis aphwami edeapnenebiselat, elirat taga leigoluk, at ebe nis aphwami arilak orokhwi ʼgelaʼgeat agarik, nis togu lege aʼge ʼberlegat nenebabut wo aʼgeat wesi ai o.

¹⁸Asogo wesimu re, at wiak tuagoluk ede ʼgagalisoam, di obotut yu obotut arat hesirikmu no oluk e, nis aphwami wiak tuagoluk nenede ʼgagaliogoluk wagoam, at en elirat letnonto aʼge oruak o.