Read Silimo Ibrani 3 Bible Online

Ibrani 3 - Silimo bible

Ibrani 3

¹Ai en e, Allah eiyagai at uʼgwarek paget pagat hwerlesi aʼge narilak norokhwi. At Allah ʼbogorl pam enat his neneminat yoʼgo nenebesimu wene wegerik ʼbaksogo ogu lege ai paget, at Yesus ebe Allah eiye aʼge ʼgain welemagoluk, Allah enat perakpou wagama oruak ai holuk e, his henede pam enat pobi togu lomup o.

²At Musa en e, Allah eiyagai enebe re, Allah owi werik ʼgelaʼge, oluk is enebaget ebabut heʼbisogo taga laga ai ʼgelaʼge, Allah en Yesus asogoat tuagoluk edikpesimu ebabut heʼbisogo tiso ai o.

³Is aphwami logon en o werik aʼge weisogo ʼgelaʼge erliktogulat, is ap o worogwi aʼge enebe ai nak e, loksogo erligonobogwi ai ʼgelaʼge, at Musa weisogo ʼgelaʼge erliktogulat, at Yesus nak e, loksogoat erliktogulom o.

⁴O werik ebe loʼbok e, is ap o worogwi aʼge enebe oruak aʼgeat de, di aʼge yu aʼge ʼberlegat e, Allah ematek en o woru ʼgelaʼge walhesi o.

⁵At Musa ebe Allah eragam aʼge welat, Allah eiyagai enebe at owi werik ʼgelaʼge oluk, is enebaget ebabut heʼbisogo tagalat, disogo ese laga, “Allah en di wene yu wene pobuk disogo moʼgulnontouwa aʼge oruak,” oluk obok moʼgulentasu laga.

⁶Aʼgeat de, at Yesus nak e, Allah ebe omlogo no oluk e, at eiye aʼge enat tiso. Nis obapnonobua wene ai paget nenede ningsogo ebam heʼberik modok wolomul holuk e, Allah owi werik ai, nis nenebeat o.

⁷Ai en e, Allah Arogun en disogo moʼgulnentasu, “O yogodak ya pam Allah iak henesaʼgo hweligep holuk e,

⁸henaʼbu heneʼbalak o leimu aphwami erlakma noʼgulat, enede anni agarik, is en e, Allah nenebit, oluk, Anni oruak a? Erlak a, oluk ebabut ʼbalogulat noʼgu legesa ai ʼgelaʼge, his asogo togup no yo.

⁹At Allah en e, O eba en o mo ligom, ʼbugom, osokhwe 40 tahun welat, an en his heneʼbalak tagenebasuam enil domok hogu legesa aʼgeat de, At anni oruak a? Erlak a, oluk lalnobogulat, nebabut ʼbalogulat, togu legesa o. Asogo togu legesa ai en, an nolot het enebam pasulat e, disogo moʼgulentegis, Henebabut dong-pongtak welat niak opsogo wo henebit ai en,

¹¹an nolot het agalat hoʼbuk ʼbalogo wene yagentasulat, An en, His set hwalogup, oluk obok moʼgulhentegis ano, set ebe hwalogup modok erlak o, oluk moʼgulentegis,” [12] oluk egeimu Allah Arogun en moʼgulentesimu pelal wokho pegesa.

¹²Holuk e, narilak norokhwi. His logon henebabut wiak agalat, henede Allah elaluk modok welago aʼge ebam heʼberik po erlak welat, at ebe ukpoluk togolik leborogupno oluk, henebabut heberlogo wolomup o.

¹³His logon wiak togulat honuʼgwarek lalogo henede anni emano oluk Allah iak pam, “O yogodak ya pam,” oluk egei ai erlak om erlakma en oruakhwe, his-his nin hwedik nan hwedik henede ago wat-wat togu lomup o.

¹⁴Asogo togulat, nadugat nenede at ebam heʼberik pege aʼge aiat, neneʼgik ʼgennesogo hwerli ologun pam tenakho wolomul holuk e, nis Kristus arilak orokhwi egerik welege o.

¹⁵Allah iak pam pelal disogo wogo oruak, “O yogodak ya pam, his Allah iak henesaʼgo hweligep holuk e, henaʼbu heneʼbalak en, Allah ebe nenebit, oluk ogu legesa ai ʼgelaʼge, his en, At ai nenebit, oluk henede anni orogup no yo,” [13] oluk pelal wokho pegesa.

¹⁶Aphwami Allah iak enesaʼgo hologu legesarik enat de, “At ebe nenebit,” oluk ogu legesa ai salak no. Is ai re, at Musa o Mesir en wogonoboluk liplau waga aʼge enebe ʼberlek ebanoat epegi o.

¹⁷Ye, o mo ligom, ʼbugom, tagokhwe, 40 tahun pam welat, Allah olot het salak enebam pasu laga no. Is ai re, wiak togu legesema, o leimu aphwami erlakma modok waretil wegesa ebano epegi.

¹⁸Allah en wene yagentasulat hoʼbuk disogo ʼbalegei, “An en, His set hwalogup, oluk obok moʼgulhentegis ano, set hwalogup modok erlak o,” [14] oluk moʼgulentesi ai salak no. Ai re, is aphwami Allah iak hwelakpoluk hegitsogo tu erlakma en ukpogu legesa aʼge ebano epegi.

¹⁹Is ai enede Allah pam heʼberik po erlakma en welat togu legesa ai en, set hwal-hwerla ʼgwilo modok mia aga, oluk nis yogodak pobi togu lege o.