Read Silimo Ibrani 4 Bible Online

Ibrani 4 - Silimo bible

Ibrani 4

¹Ai holuk e, Allah en eiyagai set hwaluagoluk obok moʼgulentesi aʼge ai erlak om erlakma en oruak aʼge ai, pobuk nis set hwaluagoluk woknontouema eba his logon ʼgwilo erlakma en mo ogupno oluk honogorloksogo welat hegitsogo togu lomup o.

²Wene op wene ai is naduk moʼgulentesi ai ʼgelaʼgeat, nis asogo moʼgulnentesiat. Aʼge re, wene moʼgulentesi aʼge ai, is enesaʼgo hweligisarigat de, pobirak erlakma en togu legesa ai pam, wene ai is enebaget e, mia aga ai.

³Is enebaget asogo mia aga aʼgeat de, nis nenede Allah pam heʼberik pogu lege aʼge nak, at en e, “His set hwalogup,” oluk egei ano nisat set hwalul o. Wene ai paget e, Allah en disogo egei epegi, “An nolot het agalat hoʼbuk ʼbalogo wene yagentasulat, An set hwalogo welegi ai ʼgelaʼge, is set hwalua modok erlak o,” [15] oluk egei ai re, ʼbogorl ʼgwiang at en walhesirik set hwalogo welat egei.

⁴O agauwa sabit pam welagai ano aʼge paget, Allah iak pam disogo pelal wogo oruak, “Allah en di aʼge yu aʼge ʼberlegat walhil lasu lagarik e, agauwa sabit aʼge pam set hwalegei,” [16] oluk pelal wokho pegesema oruak o.

⁵Wene ai paget, Allah en disogo egeimu pelal wogo oruagat, “An set hwalogo welago ai ʼgelaʼge, is set hwalua modok erlak o,” [17] oluk egeimu pelal wokho pegesa.

⁶Naduk naduk e, is en op wene ai enesaʼgo hweligisarigat de, hwelakpoluk hegitsogo tu erlak ai en, Allah en e, “Is set hwalua,” egei ai, set ebe hwalu erlak. Ai holuk e, is aphwami mu aʼge logon elirat set hwalua, oluk pobi tu o.

⁷Wene ai obok moʼgulentesirikmu en, o mo ligom, ʼbugom, osokhwe tahun aʼbigat welagarik e, pobuk, “Ai pam,” wolomul oluk at Daud moʼguleselat, “Yogodak ya pam,” oluk moʼgulesi aʼge naduk egi ʼgelaʼge pelal disogo wogo oruak, “Yogodak ya pam Allah iak henesaʼgo hweligep holuk e, henede anni orogup no yo,” [18] oluk egeimu pelal wokho pegesa ai.

⁸Allah en, “His set hwalogup,” oluk obok moʼgulentesi ai, at Yosua en wogonoboluk ʼgu aga ai pam, arat ebe demat elepma re, is ʼgu egesa eria pam pobuk Allah en, “Ai pam, set hwalogup,” oluk egei ai, elip erlagat o.

⁹Allah en di aʼge yu aʼge walhasu lagarik e, pobuk daksogo agauwa sabit aʼge pam set hwalegei ai ʼgelaʼge, nis at eiyagai set hwalul aʼge nenebe loʼbok di aʼge yu aʼge nonuʼgwarek paget togu lege aʼge arat daksogo set hwalul aʼge oruagat o.

¹¹Is naduk Allah iak hwelakpoluk hegitsogo tu erlakma en, set hwalu erlak ai ʼgelaʼge, nis logon is eneʼberlik-eneʼbarlik set hwalu erlakma en mo uano oluk, nenannisogo togu lomul o.

¹²At Allah iak oso ai re, ʼgarok eʼgat pema-pema mago ai ʼgelaʼge, erlak o. We, at iak ai re, elaluk aʼge anni aʼbik eʼgat modok melangtak welat, onuak eʼgerlim elema ʼgwi lasulat, onomoʼgok elema ʼgwi lasulat, tu ʼgelaʼge re, onogola enedemu tenhai lasulat e, enede opogwi aʼge emin, enede en nagai opogwi aʼge emin, il elirat ʼbeneriso yo.

¹³Allah il pam e, di aʼge yu aʼge at en walhesi aʼge logon hisogo oruak no? Modok erlak o. We, at il pam e, di aʼge yu aʼge ʼberlegat e, selakma ʼbaksogo modok welago ai en, nis togu lege aʼge, at alukmu re, nonomu enat emin ul o.

¹⁴Nis nonue ʼgain Allah eiye aʼge Allah omlogo Yesus ʼbogorl eming holuk, ʼbogorl abel oʼborl akhit Allah oruakma ligagarik nis nenebaget oruak ai en e, nis nenede at ebam heʼberik poluk neniak ʼbaksogo ogu lege aʼge ai, neneʼgik ʼbetesogo tenak wolomok o.

¹⁵Nis nonue ʼgain Allah eiye aʼge welago ai re, nis nenanni erlak mia ai, at eperlak puk o. At nis nenebabut wesirik oruakma, wiak aʼge ano en nis wiak tuagoluk nenede ʼgagaliso ai ʼgelaʼge, at asogoat di paget yu paget ede ʼgagalu waga laga aʼgeat de, at wiak mesik tu erlak welat e, nenebabut aluk o.

¹⁶Ai en e, nis wiak om ʼgelaʼge oruakma, panoasuak, nenaik Allah ebabut op en edeapnenebiselat, letnentasulat, tuagoluk, at Allah ʼgain welagoma eba welat ebabut op ebam hianesogo tiso ai en, nonogorlok erlagat eʼbek horoksogo ʼguok o.