Read Silimo Ibrani 5 Bible Online

Ibrani 5 - Silimo bible

Ibrani 5

¹Is ap Allah eiye aʼge onuelak ʼgain enebe loʼbok ai re, aphwami Allah eiyagai en, ap is aʼge logon Allah paget togulat, is enaʼge di aʼge yu aʼge pogwiam, Allah wogogulat, wiak togwi aʼge paget onuam woluk wagaiam, warogulat, togu lemagoluk pulogo edigonobogwi.

²Asogo edigonobogwiam, is enanni erlak mia aʼgeatma no oluk e, is aphwami logon asogoat wene eneperlak welat ing-dingsogo togwi aʼge ai, pobirak poluk e, enebe enedeabonobogulat is enebaget enebam hianesogo elirat togwi ai o.

³Is onuʼgwarek en wiagap pagathorlogumu no oluk e, is aphwami logon wiak togwi aʼge paget onuam horloluk wagaiam, is en Allah warogwi ai ʼgelaʼge, asogoat is onuʼgwarek enebaget onuam Allah warom hegitsogoat warogwi ai o.

⁴Is asogo togu lomogoluk, “An nebe Allah eiye ʼgain weleik,” oluk onuʼgwarek en inagai erlak o. We, at Allah enat, ap Harun yoʼgo pesimu erliktogwi ai ʼgelaʼge, Allah en yoʼgo enebasu holugat edigonobogwi o.

⁵At Kristus asogoat, “An Allah eiye ʼgain weleik,” oluk uʼgwarek en polik poluk inom erlak. We, at Allah enat pulogo edikpoluk wene disogo moʼgulesi, “Hat an nomlogo yo. Hebe yogodak dakhebegis o,” [19] oluk moʼgulesi ai o.

⁶Ye, mesik e, Allah iak pelal wogo aʼge mesik pam disogo egeimu oruagat, “Ap Melkisedek an Allah eiye ʼgain welaga ai ʼgelaʼge, hat an eiye aʼge ʼgain modok-modok welerinogoluk edikhebegi o,” [20] oluk moʼgulesimu pelal wogo oruak.

⁷At Yesus ebe ʼgwiangma yema oruakma aphwami en woruano oluk, Allah en elirat delu ai en e, nge tagalat, iak loksogoat Allah onuk ʼbalogo yoʼgo pasulat, ʼgonu eselat, aik iak ogorloksogo hwelakpoluk welaga ai en, iak esaʼgo hwelegei.

⁸Asogo moʼgulesi ai re, at Yesus Allah ebe omlogo aʼgeat de, di obotut yu obotut hasulat, Allah iak hologo tu aʼge paget moʼgulegei ai o.

⁹Asogo moʼguleselat, ologun ʼbalogo ʼgaroksogo tegeimu, nis at iak hologo wolomul aʼge nenebe ʼberlegat nenelaluk modok-modok welemagoluk at ebe delnenebiso aʼge edip arat aga ai o.

¹⁰Asogo agarik, at en e, “At Melkisedek taga laga ai ʼgelaʼge, hat hebe an eiye ʼgain wolomup o,” oluk edikpesi ai o.

¹¹Wene ai paget e, nis en his moʼgulhonto aʼge aʼbigat oruak aʼgeat de, his henebabut, wene perlene pobi tu mia ai en, nis en dokhumsogo moʼgulhonto mia o.

¹²His e, Allah iak nadugat moʼguligepma re, his en is aphwami logon moʼgulonto elit aʼgeat de, mia ai en, wene naduk nadugat moʼgulogwi aʼge ai, is aphwami muon enebam moʼgulu o. Is malik wei aʼge soʼboru erik aʼge no mia en, enialak enagamu nak noʼgulat welagai ai ʼgelaʼge, his e, wene hurle aʼge moʼgulu mia en e, wene naduk nadugat moʼgulontogwi ai aʼge nak moʼgulogulom henebabut hentasu legi o.

¹³Malik enialak enagamu nak noʼgwi ai re, enebe malik weiyatma, wene yu op, yu wiak, oluk pobi tu eneperlak welagai ai o.

¹⁴Aʼge re, is enarlue nak e, enede hurle agalat no oluk e, wene yu wiak, yu op, oluk pobi tu enalukmu no oluk e, soʼboru erik aʼge is onsoʼboru o.