Read Silimo Ibrani 6 Bible Online

Ibrani 6 - Silimo bible

Ibrani 6

¹Ai en e, Kristus osi agalat togulom aʼge wene naduk nadugat moʼgulogwi ai aʼge moʼgulige aʼge ai oruakhwe, enarlue agalat togulom aʼge moʼgulogu lomok o. O waʼgi opsogo delak poluk pobuk eneʼgik agam togwi erlak ai ʼgelaʼge, nis naduk wiak togu lege aʼge ʼbaksogo ukpoluk nenebabut heberlogo nenede Allah pam heʼberik pege aʼge ai pobuk agam tul erlak o.

²Ik olomu ʼbogwi aʼge wene ai moʼgulogulat, enaʼgul sebelogwi wene ai moʼgulogulat, waragaiam Allah en nenelalugapnonobua wene ai moʼgulogulat, ologun pam wene nenebam pasulat, noʼgorliselat, tisokhwe modok-modok wolomul wene ai moʼgulogulat, tige aʼge ai neniak agamsogo pobuk moʼgulul erlagat o.

³We, Allah en op epasu holuk, pobuk moʼgulu aʼge aiat moʼgulil laga lomok o.

⁴Is aphwami logon, Allah en enede atiarak enebasukhwe, di aʼge yu aʼge oduk nekholuk op aʼge wogwi ai ʼgelaʼge, Allah ʼbogorl pam en oʼgo erlak weat woknentasu aʼge ai wogulat, Arogun soʼbutnentasu aʼge ai mesik wogulat, Allah iak ai op modok oluk enalugat welat, Allah ebabut op en pobuk annisogo op modok taknonobouwa ano owan taknonobo erlak oruakhwe, yogodak ya di aʼge yu aʼge naduk naduk ʼgomuk noʼgwi ʼgelaʼge, wogentasuam horlogulat, togulomtik enat de, pobuk is en e, “Allah nenebit o,” oluk iak ukpoluk pobuk togolik libotluk welat e, Yesus Allah omlogo ebe e pam edikpoluk worogulat eniak esegen wokhegesa ai ʼgelaʼgeat pobuk togwi ai o. Asogo modok til lagalat, pobuk, is en e, “Nis wiak tige,” oluk enebabut heberluagoluk, pobuk togolik ʼgesogo wogonoboluk wom ʼgelaʼgeat. Mia o.

⁷Allah en nin erlige nan erlige o moru ʼgwiangma ʼbelabu wagoam e, ʼgwiang opsogo sakho osoam aphwami en yabuk wokho di aʼge yu aʼge owi yorogwi aʼge en ebe op noʼgwiam, Allah en, “ʼGwiang ai op o,” oluk obap pasuat o.

⁸Asogo aʼgeat de, ʼgwiang ai di agan eʼga yu agan eʼga wiak aʼge emin, molip orlok aʼge emin, ʼbaktiso holuk e, “ʼGwiang yu, we ʼburlat almasogo oruak ai wiak nebit o,” oluk Allah en heman pasulat e, pobuk odouk narlik poma perlengsogo nouwa o.

⁹Asogo egi aʼgeat de, narilak norokhwi. Henebe nede o. Allah en wiagaphonobua, oluk nenede opogu lege erlak o. At e, obaphonobua oluk pobi togu lege.

¹⁰At Allah ebabut e, dagan tiso aʼge puk. At hegitsogo nak tiso ai en e, his en at ebaget togulat henarilak honorokhwi Allah eiyagai aʼge logon henede en naduk lerontogulat, pobuk lerontogulat, togu legep aʼge ai, at en his memerak honobouwa erlak o.

¹¹Narilak norokhwi. Nis nonogola nenagai e, his henede en e, “Allah en nis obapnonobua,” oluk honogola henagai hogu legep aʼge aiat epasu lemarik, hwerli ologun pam en eiye orogup en e, togu legep ai ʼgelaʼgeat henebe loʼbok henannisogo togwi modok wolom nenagai opogu lege o.

¹²His henerim ʼboksogo togulom e, nenebit o. Is aphwami naduk enede Allah pam heʼberik poluk enerim om erlakma en, is en e, “Demat wul,” oluk opogu legesa pam, Allah en e, “His wokhentaik,” oluk obok moʼgulentesi aʼge ebe wegesa ai ʼgelaʼge, his asogoat is enebabut wokho togu lomup o.

¹³At Allah en e, at Abraham moʼguleselat e, “Hat pobuk disogo takhebaik,” oluk obok moʼguleselat, “Hat hebe ip-opsogo takhebasulat, heiyagai en dogoʼgwe aʼge modok aʼbik seik-ʼbeiksogo wokheselat, tik o,” [21] oluk, ap mu aʼge onuk logo aʼge mesik erlakma re, Allah uʼgwarek onuk pam hoʼbuk ʼbalogo moʼgulesi.

¹⁵Asogo moʼgulesimu, Abraham ede ʼbugom erlakma en yetharok welaga ai pam, wene obok moʼgulesi aʼge ai, demat aga ai o.

¹⁶Aʼge re, is aphwami en hoʼbuk ʼbaluogoluk holuk e, onuʼgwarek ononuk mia ʼgelaʼge en e, onuʼgwarek ononuk pam hoʼbuk ʼbalu erlak. We, is logon ononuk oruak logo aʼge ononuk pam hoʼbuk ʼbalogwi ai o. Asogo ʼbalogwiam e, is logon en wene ʼbalogu lema aʼge eniak erlak ago ai o.

¹⁷Asogo ago ai ʼgelaʼge, Allah en e, “Aphwami an nede opoluk obok moʼgulentasu aʼge, niak edenogo pobuk mu aʼge mesik moʼgulentasu legi erlak o,” oluk, is obok moʼgulentesi aʼge nak demat opouwagoluk e, hoʼbuk ʼbalogo moʼgulentesi ai o.

¹⁸Wene hoʼbuk ʼbalogo moʼgulentesi ai re, nis Allah eragam ʼgu ege aʼge nenede en, “Obapnonobua o,” oluk eberak welege aʼge nenede haʼbuksogo welemagoluk nisat moʼgulnentesi o. Obok eselat, hoʼbuk ʼbaliselat, wene ʼbiren egei ai, nis en e, Allah iak esei oso modok erlak, oluk nenede haʼbuksogo welemagoluk moʼgulnentesi ai o.

¹⁹At en e, “Obaphenebik,” oluk egei ai sogwi ema erlak. “Demat ema,” oluk opogu lege aʼge, ik so eʼgin aʼge ʼgwiangma ningsogo erlelik poluk welagai ai ʼgelaʼge, nenede ʼbogorl pam o hwerlirak oʼgut akhit seʼgerlak Allah oruakma eba hwedik takpoluk haʼbuksogo wolomok o.

²⁰At Yesus nis nenebaget ebela yogo poluk o eba ʼgwegeitik, ap Melkisedek Allah eiye welat taga laga ai ʼgelaʼge, modok-modok taga lema aʼge Allah eiyesogo ʼgain agarik welago ai o.