Read Silimo Ibrani 8 Bible Online

Ibrani 8 - Silimo bible

Ibrani 8

¹Nis wene ogu lege ai, logo re, yuat o. Nis nonue ʼgain Allah eiye aʼge ege ai ʼgelaʼgeat oruak. At ebe re, nenaik ʼgain Onuk Logo aʼge Allah welagoma eba eragam eʼgik ʼbekhit akhit ʼgainat oruak o.

²Asogo oruak ai, Allah owi sum aʼge aphwami en logu paget werigisema oruak puk. Erlak o. We, Allah uʼgwarek owi demat aʼge weregeimu eba welat nis nenebaget tiso yo.

³Is ap Allah eiye aʼge onuelak ʼgain enebe loʼbok edigonobogwi ai re, di aʼge yu aʼge Allah wogogulat, onuam warogulat, togu lemagoluk edigonobogwi ai ʼgelaʼge, nis nonue Allah eiye aʼge ʼgain ai re, di aʼge yu aʼge logon nis nenebaget Allah wogoum aʼge oruak o.

⁴Wene Allah en nenesaʼgo weregei wene ai hegitsogo re, di aʼge yu aʼge Allah paget wogogulom aʼge, is ap Allah eiye aʼge enebe oruak ai en e, at Yesus ebe ʼgwiangma yema wellepma re, Allah eiye wellep erlak o.

⁵Allah en e, “Nowi sum aʼge lodu paget werik nobomup o,” oluk Musa moʼgulesimu, o ebe weriogoluk tisoma re, pobuk disogo moʼgulesi, “An nemin dom pam welat, an nowi disogo werik nobomup, oluk elit aʼge walsogo onukhiegi ano hegitsogo modok werinogoluk, hede eberak modok wolomup o,” [24] oluk moʼgulesi ai ʼgelaʼgeat, is ap Allah eiye aʼge ʼgwiangma yema welat, ebe ʼbogorl pam oruak aʼge ebam elit hogulat, ogut walhogulat, togwi ai o.

⁶Asogo togulat, is e, mia ogut heleʼgik aʼge togwi aʼgeat de, Allah en, “His obaphenebik,” oluk obok moʼgulnentesi wene ebam louktak, at Yesus ebe Allah emin, nis aphwami emin, ʼburl heirakma welat, wene Allah en ʼget aʼge wusogo woknenebegei hegitsogoat demat aʼgeat logo modok pasu ai o.

⁷Wene naduk Allah en, “Obaphenebaik,” oluk wene wusogo woknenebegei ai pam mia om erlakma en obapnenebelipmu re, wene ai ebalema, “Obaphenebaik,” oluk pobuk elip erlagat o.

⁸Aʼgeat de, Allah eiyagai wene ai tenakho welat, mia ʼgelaʼge togu legesema disogo moʼgulentesi, “Aphwami Israel aʼge emin, Yehuda aʼge emin, an en wene ʼget aʼge wusogo wogenebik aʼge oruak o, oluk demat moʼgulhentegis o.

⁹An en his heneʼbalak o Mesir en wogonoboluk liplau weigoluk eneʼgik tenentasulat, Disogo takhenebaik, oluk wene weragenebegi ai ʼgelaʼge puk. Muat o. An en is wene weragenebegi aʼge ai hwelakpoluk hegitsogo tu erlak ai en e, is enebe nebit, oluk enagap ʼgoboksogo ugenebegi ai o.

¹⁰Pobuk aphwami Israel wene ʼget aʼge wusogo wogenebigoluk egi ai, ebe yuat, An en wene enesaʼgo weriso aʼge ai onogola eberak modok welemagoluk, wogentasulat, enedemu pelal wokho pasulat, toluk e, an is enaik weleik o. Ye, is an neiyagaiat welema o.

¹¹Is enarlue ʼgain emin, malik wei aʼge emin, ʼberlegat enaik an nebe enaluk welema ai en e, is enaiklak onuelak emin, enarilak onorokhwi emin, moʼgulentasulat, Henaik Allah ai henaluk omup o, oluk moʼgulonto erlak o. We, onuʼgwarek enabusak enat, nebe enaluk aga lema o.

¹²Is wiak togwi aʼge ai, an en erlagapsogo ukpoluk, pobuk nede eberak weleik erlak o,” [25] oluk moʼgulentesimu pelal wogo oruak.

¹³At en e, “Wene ʼget aʼge wusogo wogenebik,” oluk egei ai re, wene page aʼge erlagap paigoluk egei o. Di aʼge yu aʼge page aʼge il wiak agoam perleneat ukpogwi ai ʼgelaʼge, wene naduk aʼge erlagap paigoluk egei ai o.