Read Silimo Ibrani 9 Bible Online

Ibrani 9 - Silimo bible

Ibrani 9

¹Naduk e, Allah en wene wusogo eiyagai wogenebegei wene ai hegitsogo, is en at ede opsogo togu lemagoluk moʼgulentesimu, “Disogo togulom, yusogo togulom,” oluk wene enaluk welegesa. Ye, o sum aʼge lodu paget togulomma aphwami en werigisema welagayat.

²O hwerlisogo ʼgoduk akhit onuk e, o asuema u ʼgelaʼge, Allah owi werikmu ogu legesa. Eba esaga ʼgwialogwi aʼge emin, e meja delak soʼboru roti aʼge Allah paget pogwi aʼge emin, welaga.

³Ye, o hwerli oʼgut akhit sum pam hwerlirak aʼge ai onuk e, o hwerlirak modok asuema u ʼgelaʼge, Allah uʼgwarek owi ogu legesa.

⁴O eba re, aʼbosu eʼben op aʼge Allah narlik obogu legesa pam emas heleʼgik aʼge emin, peti Allah emin hwedik welege oluk peti oʼborl oʼgwe ʼberlegat emas laʼbulik aʼge emin, welaga. Peti ai ogola re, manna noʼgu legesa aʼge sogoluak emas aʼge ogola yagarak aʼge ai emin, ap Harun oʼbouwaʼgun esemis dain taga laga aʼge ai emin, wene Allah en nenesaʼgo weregei wene pelal helep pam wogo aʼge ai emin, welaga.

⁵Peti ai oʼborl pam is malaikat ʼgelaʼge enebe ʼbiren, enagapsaburl oruak aʼge Allah ebe oruak oluk ogut walsogo pegesa aʼge welegesa. Is ai, aphwami wiak togwi aʼge Allah en erlagapsogo ukpoluk, at emin opsogo laʼbulik enebasu lagama, enagapsaburl en sebelogo poluk welegesa. Asogo welegesa aʼgeat de, wene ai ʼberlegat paget yogodak ya mesik-mesik ʼbeling-ʼbelangsogo u mia o.

⁶Di aʼge yu aʼge eba ʼberlegat ebale loʼbok degelak oruakma, is ap Allah eiye aʼge enebe ʼberlegat nin hwedik nan hwedik Allah ede opsogo tuogoluk o hwerli ʼgoduk akhit hwerlirakma ano, ʼgogu legesa.

⁷Asogo ʼgogu legesa aʼgeat de, o oʼgut akhit hwerlirak aʼge ai nak e, at Allah eiye aʼge onue ʼgain aʼge ai nak uʼgwarek wiak taga laga aʼge paget emin, eiyagai Israel aʼge enebabut heberlak erlak dong-pongtakma wiak togu legesa aʼge paget emin, onuam wusogo emep woluk, o mo ligom ʼbugom osokhwe tahun ebe loʼbok agauwa mesik erlige ʼgwise laga.

⁸Asogo tagalom oluk wene enesaʼgo werak welaga ai ebam elitsogo, nis dokhumsogo pobi tuagoluk Allah Arogun en, disogo moʼgulnentasu, “O hwerlirak aʼge ʼgoduk akhit ai oruakhwe, Allah uʼgwarek owi demat aʼge ʼgoduk hwerik erlakma en lerak welaga,” oluk moʼgulnentasu.

⁹Wene ai, ebe yogodak ago aʼge paget ogut walsogo welaga. Wene ogut waltak welaga aʼge ai hegitsogo togu lemagoluk, soʼboru emin, ik emin, disogo noʼgulat, di aʼge yu aʼge pam disogo ho togulom, oluk Allah en moʼgulentesi aʼge hegitsogo togulat, onuam Allah warogu legesa ai, Allah en wene ʼget demat aʼge owan tu erlak oruakhwe, ʼgwiangma lodu paget welat, ogut walsogo togu legesa ai en e, wene enebam erlak oluk enede ʼgaroksogo selagap po mia welaga.

¹¹Is asogo togu legesa aʼgeat de, Allah en e, “Di aʼge yu aʼge pobuk disogo op ema o,” oluk obok egei ai ebe re, at Kristus Allah eiye onue ʼgain waga ai o. Asogo wagarik e, is naduk di aʼge yu aʼge Allah en walhesi aʼge pam e, ʼgegilogo o werigisema ai ʼgwegei puk. Erlak o. We, o demat aʼge lok aʼge op werikmu agauwa mesik erlige ʼgwegeitik, o ogorlitak ʼgoduk akhit ukpoluk ʼbekhit o hwerlirak oʼgutmu modok ebe asuema oluk u ʼgelaʼge, Allah uʼgwarek owi pam eba ʼgwegei. Asogo ʼgwegei ai re, kambing emin, sapi emin, emep woluk ʼgwegei puk. Erlak o. We, nis herle werak ʼgelaʼge oruakma hebelik modok welemagoluk, nonoʼgo ʼbalogo waragarik, uʼgwarek emep woluk eba ʼgwegeitik, nis nenebaget oruak o.

¹³Ye, is aphwami naduk togu legesa ai pam togulat, aphwami en asua aʼge eneʼgik tenholuk, peik ʼbalonobogwi ai ʼgelaʼge, is ap Yahudi aʼge en asua aʼge eneʼgik tenho erlak aʼge tenhogwi holuk, op emagoluk kambing emep emin, sapi emep emin, sapi ebe wusogo Allah paget odouk narlogwi aʼge uak odouk en noluk, ul ago aʼge emin, wokho enagap oʼborl oʼgwe aʼge paget hoonobogu legesa ai o.

¹⁴Is enagap oʼborl oʼgwe aʼge paget wam emep mia aʼge pam elirat opsogo hoonobogu legesa. Holuk, nis Kristus emep logo aʼge pam, “Wene henebam erlak,” oluk nonogola selaksogo elit modok nenebasu o. Nis Allah elaluk welago aʼge ogola opsogo togu lemagoluk, wam asu op aʼge Allah warogu legesa ai ʼgelaʼge, at Kristus Allah Arogun otok modok welago aʼge anni pam, waragalat, ebe Allah wogesi ai pam, nis nadugat erlak ema aʼge ʼburlat togu lege aʼge, at en, “Wene henebam erlak,” oluk, at emep pam nonogola selaksogo nenebesimu welege o.

¹⁵Ai en e, wene wusogo naduk woknenebegei aʼge ai pam welat, nis nenesaʼgo werak erlak wiak togu lege ai pam nenebe herle werak ʼgelaʼge welege o. Asogo oruakma, at Allah en Kristus waraga ai pam herle hebilnenebegeitik e, nis at en worlnentesi aʼge nak emin hwedik taknenebasulat, op aʼge otok modok welema aʼge woknentaigoluk, wene ʼget aʼge wusogo woknenebiselat, Kristus ebe ʼburl heisogo edikpesi.

¹⁶Ap mesik en, “An nemening aʼge disogo soʼbusogo wogontomup,” oluk oso aʼge ebe elaluk oruakhwe, enemening aʼge eiye agai puk. We, at ebe warago holugat, “At arat waraga o,” oluk selakma ogwi holugat, enemening aʼge eiye agai o.

¹⁸Asogo ogwi holuk, enemening aʼge horlogwi ai ʼgelaʼge, Allah en wene naduk aʼge wusogo wogenebegei ai, mep wusogo enat ologun ʼbelakpesi.

¹⁹Allah en, “Disogo tip, asogo tip,” oluk, nenesaʼgo weregei wene ai ʼberlegat, at Musa en is aphwami Israel aʼge moʼgulentesirik e, pobuk sapi emep emin, kambing emep emin, ik emin udelak poluk e, domba asu orogole mep ebelerak aʼge esuʼgat ologun pam dongsogo poluk, musan pam mep worogwi ai ʼgelaʼge, mep udalogo Allah en wene nenesaʼgo weregei wene pelal wogo ai pam werak pasulat, aphwami Israel aʼge enebetne ʼgwete entasulat, weragenebasulat, tegei.

²⁰Asogo weragenebasulat, disogo moʼgulentesi, “Wene Allah en nenesaʼgo weregei aʼge hegitsogo togu lemagoluk, at en e, His wene arat wusogo wokhenebegis o, oluk, mep wathenebegis yu i o,” [26] oluk moʼgulentesi.

²¹Asogo moʼgulentesirik e, Allah owi sum aʼge werik ai emin, di aʼge yu aʼge Allah owi ogola eba at ebaget togu legesa aʼge ʼberlek emin, ebetne mep wetil laga.

²²Allah en wene nenesaʼgo weregei wene ai hegitsogo togulat, di aʼge yu aʼge ʼberlegat ʼgelaʼge mep pam nak hotogumu no oluk e, mep libago erlak holuk e, aphwami wiak togwi aʼge erlagapsogo ukpo mia ai en e, mep weregei ai o.

²³ʼGwiangma di aʼge yu aʼge ʼberlegat horu aʼge horogu legesa ai, ebe ʼbogorl pam oruak aʼge ebam elitsogo togu legesa. Aʼgeat de, ebe demat ʼbogorl pam aʼge ai, wam ai aʼge wusogo emep pam horu mia ai en e,

²⁴at Kristus o Allah uʼgwarek owi oluk aphwami en ebam elitsogo werigisema ai ʼgwegei puk. Erlak o. We, ʼbogorl ebe pam ʼgwi lagarik Allah oruakma eba nis nenebaget oruak o.

²⁵Is ap Yahudi aʼge Allah eiye onue ʼgain Allah owi pam ano ʼgogulat e, uʼgwarek emep woluk ʼgwise laga puk. Erlak o. We, wam sapi emin, domba emin, emep woluk o mo ligom, ʼbugom, osokhwe tahun ebe loʼbok agauwa mesik erlige nak ʼgwise laga. Asogo aʼgeat de, at Kristus nak e, uʼgwarek emep woluk agauwa pobuk naduk e, erlak o. We, agauwa mesik erlige ʼgwegei ai o.

²⁶At en e, is naduk togu legesa ai ʼgelaʼge telipmu re, ʼgwiang walhesi hwerli en ʼbekhit yogodak hwerli, agauwa pobuk naduk di obotut yu obotut hasulat waragallep. Asogo aʼgeat de, o ologun pam nis wiak togu lege aʼge erlagapsogo paigoluk agauwa mesik erligeat wam Allah paget warom ʼgelaʼge, uʼgwarek ebe watlau waga ai.

²⁷Nis aphwami mesik erlige lebeksogo waragaiam en, pobuk wene nenebam pogulat, noʼgorlogulat, tua oluk, at Allah enat egei ai ʼgelaʼge,

²⁸at Kristus ogo re, nis aphwami wiak togu lege aʼge erlagap paigoluk agauwa mesik erligeat wam Allah warogu legesa ai ʼgelaʼge, at ebe waragarik, pobuk wema ai, nis wiak togu lege aʼge erlagap paigoluk wema puk. Erlak o. We, nis aphwami, at wagoma no oluk orogolema yetharok welege aʼge, delnenebigoluk wema o.