Read Silimo Yakobus 1 Bible Online

Yakobus 1 - Silimo bible

Yakobus 1

¹An Yakobus nenaik Allah nonue ʼgain Onuk Logo aʼge Yesus Kristus eʼbirek eneragam aʼge ano en, wene yu his henaʼgul onuk 12 aʼge di owi yu owi ʼbogulogo legeptik welegep aʼge ʼberlegat heneʼbek perakpou wegi o. Narilak norokhwi.

²Narilak norokhwi o. Eʼgin-peʼgin henebam ago holuk honogola henagai hogu lomup o.

³Asogo henebam agoam, Allah en e, “Enede an nebam heʼberik oruak a? Erlak a,” oluk, henebabut ʼbaliso ai pam henede haʼbuksogo wolom aʼge takhenebasu ai henalugat o.

⁴Henede owan ʼgelaʼge mesik wolom erlakma en ʼberlek elitsogo hurle emagoluk e, henede ʼbugom erlakma en henede haʼbuksogo wolomup o.

⁵Aʼge re, at Allah ebabut op en aphwami ʼberlegat ede welat wene yagonto erlakma en wogentasu ai en, his logon henede ʼgagalak erlak holuk, at ʼgonu moʼgulorogupmu henede ʼgagaluayat o.

⁶Aphwami pema en e, “Allah en woknema ya? Erlak a,” oluk, wenemennei eberugulat ʼgonu moʼgulogwi aʼge ai, sogwei en ik yogun aʼge hererim hau wagalat weriso ai ʼgelaʼge moʼgulogwi ai en, his asogo ʼgonu ogu lorogup holuk e, “Woknema ya? Erlak a,” oluk, wenemennei eberu erlakma en, henede Allah pam heʼberik poluk en ʼgonu moʼgulogu lomup o.

⁷Aphwami asogo ʼgonu moʼgulogwi aʼge ai, enede ʼbiren agorak welat di aʼge yu aʼge tuogoluk, “An disogo tik,” oluk ʼgaroksogo u mia ai en, “Nonue ʼgain Onuk Logo aʼge en mesik woknemayat o,” oluk opo mia o.

⁹His Allah eiyagai henaʼge erlak en henerlagaik welat e, “An Allah en ʼgainapnebesimu welegi o,” oluk honogola henagai ho yo.

¹⁰Aʼge re, mo putsogo yeriselat e, e eʼgela sawet agalat, e owil lologo ʼboluk orogole wiak agalat, tago ai ʼgelaʼge, asogoat, is ap ʼgain ʼgain enaʼge aʼbik aʼge ai, di aʼge yu aʼge owan tak erlak oruakma enebe erlak om aʼge oruak ai en e, his logon henaʼge aʼbik henebe ʼgainat welat e, e owil lologo ʼbiso ai ʼgelaʼge, “An naʼge aʼbik aʼge yu erlak emayat o. Allah en nonuk sebelogo pesimu welegi o,” oluk, honogola henagai hoat o.

¹²His logon di eʼgin yu eʼgin henebam agokhwe, henepe mosogo wolorogup holuk, pobuk honogola henagai hagup o. Asogo henepe mosogo wolorogup holuk e, Allah en e, “An nebe henede hwedik aʼge nak henelaluk modok wolorogup aʼge wokhentaik o,” oluk, obok moʼgulnentesi ano his henebabut ʼbelakpoluk enat wokhentaigat o.

¹³At Allah wiak tuagoluk aphwami en ede ʼgagalogwi erlak o. Ye, at en ogo re, aphwami logon wiak tuagoluk enede ʼgagaliso erlagat ai en e, his ado honogola en e, “An wiak tuagoluk Allah enat nede ʼgagaliso yo,” oluk opo mia o.

¹⁴Asogo aʼgeat de, nenebe loʼbok nonuʼgwarek nonogola en di aʼge yu aʼge nenagai oluk, wiak opogu lege ai enat nenebe woknenebiselat, mingmingnenebiselat, tagalat e, nenede ʼgagaliso ai o.

¹⁵Pobuk nonogola en di aʼge yu aʼge nenagai wiak opogu lege aʼge ai, hwami en enemalik dagonobogwi ai ʼgelaʼge, nonogola ago holuk, emalik dakho wiak togu lege ai o. Ye, wiak togu lege aʼge ai hurle ago holuk e, emalik dakho nenebe waraga lege ai o.

¹⁶Narilak norokhwi. Henebe nede o. Honuʼgwarek en henebe lalogupno oluk moʼgulhentegis ai o.

¹⁷Nenaik Allah ʼbogorl pam aʼge ano enat di aʼge yu aʼge pok aʼge woknentasulat, modok op aʼge woknentasulat, ʼbelapnentau wago ai o. At enat ʼbogorl petne atiarak welago aʼge ai walhesirik e, at ebe muat agalat, pobuk agamsogo hik eselat, atiarak pasulat, tiso erlak o.

¹⁸Di aʼge yu aʼge walhesi aʼge ʼberlegat malik naduk dogo aʼge ʼgelaʼge re, nis at welemagoluk, at uʼgwarek ede opoluk iak dem wene ai pamat dogo nenebesimu welege o.

¹⁹Narilak norokhwi. Henebe nede o. Wene yu henede eberak wolomup o. Henebe loʼbok wene henesaʼgo perleneat hologuptik e, heniak pam en orogat ogulat, honolot het lau wagoam henede sebelogo wolomtik en orogat ogulat, ogu lomup o.

²⁰Aphwami onolot het wiak togwi aʼge ai, Allah ogola agai epasu aʼge togwi erlak.

²¹Ai enat, di wiak yu wiak heneʼgerli erlak til noʼgu legep aʼge ai ukpogulat, wiak logat til noʼgu legep aʼge ai ukpogulat, togu lomup o. Wene op wene Allah en honogola owi yakho pesi aʼge ai pam elirat delhonobu ai en e, at eragam ʼgogulat, at en wene henede ʼgagaliso aʼge ai wogu lomup o.

²²Wene Allah iak ai henesaʼgo nak hwelakpoluk mo ogupmu re, honuʼgwarek en lalhwerlagup ai en, henesaʼgo hologulat, dokhumsogo togu lomup o.

²³Aphwami logon wene Allah iak ai enesaʼgo nak hologulat, wene ai hegitsogo togwi erlak holuk e, aphwami onorogole napunak pam yetholuk e, enebe wema lagalat, “Nebe ategenik hegi ani,” oluk, eberak wolom erlakma en perleneat meme oso ai ʼgelaʼgeat o.

²⁵Nis aphwami neneʼgik herle werak ʼgelaʼge oruakma, wene op wene Allah en nenesaʼgo wusogo leik-louksogo moʼgulnentasu ai pam hebilnenebiso yo. Holuk, sa en wene ai esaʼgo nak hwelakpoluk e, memerak pasu puk. We, dokhumsogo pobirak poluk, ebam eberak modok welat, wene ai hegitsogo tiso holuk, di aʼge yu aʼge tisoma, Allah en ogola agaisogo lethasu lema o.

²⁶Ye, ap sa en, “An Allah eragam welat hegitsogo taga legi,” oluk, epasularat de, iak ologun werak erlak yogun-yagan oso holuk e, uʼgwarek en lalhwerlasulat, Allah ogola opsogo taga legi oluk, we ʼburlat tago yo.

²⁷Nenaik Allah en e, “Aphwami en an nogola opsogo hegitsogo op modok togulom e, disogo yo. Malik seʼbin aʼge emin, hwami sugwe aʼge emin, nal otluk oruakma lerontogulat, aphwami ʼgwiangma wiak togwi aʼge ai enebabut wo erlakma onuʼgwarek en degelogulat, togulom o,” oluk ede epasu ai o.