Read Silimo Yakobus 2 Bible Online

Yakobus 2 - Silimo bible

Yakobus 2

¹Narilak norokhwi. Henede nonue ʼgain Onuk Logo aʼge Yesus Kristus erliktogwi aʼge ano ebam heʼberik welat, aphwami enagap oʼborl oʼgwe nak henil yerontoluk e, logon honolukhwema onobogulat, logon honoʼborlma onobogulat, togu lorogup o.

²Henebe seʼban uogoluk odoktak oruakma, ap mesik eʼgik segerlet pam emas aʼge wantagalat, osum op aʼge ʼbuktagalat, toluk en heneʼbek ʼgu agalat, ye, ap mesik aʼge erlak aʼge sum wiak aʼge ʼbuksogo ʼgu agalat, togwi holuk e,

³his en at osum op aʼge ʼbuksogo ʼguma aʼge ai moʼgulogulat, “Nue. Hebe e delakma opma ya hutla suk o,” oluk moʼgulogulat, ye, at aʼge erlak aʼge ano moʼgulogulat e, “Not. Hat eria edik wolorogun a? Noyuk pegimu o holumu yema hutlau worogun a,” oluk moʼgulogulat, togu legep holuk e,

⁴his henebabut modok wiak togulat e, his-his, “At ai logo. Ye, at ai mia,” oluk heʼberlogo onobogu legep ai o.

⁵Narilak norokhwi. Henebe nede o. An wene ik yu henesaʼgo hwelip o. Is aphwami ʼgwiangma enaʼge erlak aʼge ai, Allah enat poligenebasulat e, “Enaʼge aʼbiksogo wolom ʼgelaʼge, enede an nebam heʼberik welemak o. Ye, is an nebe enede aʼge nak, o an en neragam enebasuam wolomma eba eiye ema oluk wene weragenebegi aʼge ai, isat eiye emak o,” oluk poligenebesi.

⁶Asogo poligenebesi aʼgeat de, his en is enaʼge erlak aʼge nak honogola mi-miarak onobogu legep ai o. Asogo aʼgeat de, salak en his henebe wiagaphonobogulat, pemerintah aʼge en henemdema wouwagoluk eneʼbek wokhonoboluk lagalat, togwi no. Is aphwami enaʼge aʼbik aʼge ai enat epegi o.

⁷Ye, nonue ʼgain Onuk Logo aʼge onuk op lasu aʼge ano onuk ʼbalogo ebe eiye egep aʼge ai, is enaʼge aʼbik aʼge ai enat, at onuk wiagaptogwi epegi.

⁸Aʼge re, his en hegitsogo togulom aʼge yu. Allah en nenesaʼgo weriselat wene logo re, disogo egei, “His honuʼgwarek henebe henede hwedik welegep ai ʼgelaʼge, is aphwami logon henemin welegep aʼge ai henede hwedik wolomup o,” [1] oluk egeimu, pelal wegesa aʼge oruak ai hegitsogo togu lorogup holuk, op togu lorogup o.

⁹Asogo aʼgeat de, his en aphwami enagap oʼborl oʼgwe nak henil yerontoluk, logon honolukhwema onobogulat, logon honoʼborlma onobogulat, togu legep ai wiagat togu legep o. At Allah en nenesaʼgo weregei wene ano sebelogo ukpoluk wiak togu legep oluk, wene edip ai pamat wene henebam oruak o.

¹⁰His logon wene Allah en nenesaʼgo weregei wene ano ʼberlegat tenak welarat de, mesik nak sagalogo ukpegep holuk e, “Wene ai ʼberlegat sagalogo ukpegesa o,” oluk, demat wene henebam agama oruak o.

¹¹Allah enat, “Hwami ʼbabi tenentagup o,” [2] oluk egei. Ye, mesik e, “Aphwami waronobogup o,” [3] oluk, at enat egei. Holuk e, hat mesik en, hwami ʼbabi tenonto erlak welarat de, aphwami enebe warenebigen holuk e, Allah iak sagalogo ukpegenat o.

¹²Nenebe neneʼgik herle werak ʼgelaʼge oruakma, Allah iak ai pamat hebilogo nenebasu ai o. Wene ai pamat nenemdema wouwa o, oluk, heniak hegitsogo ogulat, heneʼgik en hegitsogo togulat, togu lomup o.

¹³His en e, aphwami henedeabonobogup erlak holuk e, Allah en e, edeaphonobo erlakma en e, wene henebam pouwayat o. Aʼge re, aphwami logon enedesogo welagai aʼge ai Allah en enemdema wasulat wene enebam pouwa erlak o.

¹⁴Narilak norokhwi. His logon en, “Nede Allah pam heʼberik welegi o,” oluk ogularat de, heʼgik pam en aphwami ado leronto erlak holuk e, hiak nak, “Nede Allah pam heʼberik welegi,” oluk ese legen ai pam mesik ema no? We, ʼburlat ese legen o. Ye, hede nak asogo heʼberik wolomma re, ai pam elit delhobua no? Mia o.

¹⁵Hare de a? Herei de a, Allah eiyagai aʼge mesik osum ʼbuktagalom aʼge emin, osoʼboru nasulom aʼge emin, erlak en oruakma,

¹⁶hat en at ebe paget letho erlak welarat de, hiak pam en nak e, “Nare o. Hebam aganhansogo hogum ningsogoat hogola en hagai hasulat lak o,” oluk ogun holuk e, mesik om no? We, ʼburlat ogun o.

¹⁷Ai ʼgelaʼge, nis neneʼgik pam en leronto erlak welat, “Nenede Allah pam heʼberik welege,” oluk, ai nak ogu lege holuk, werak ʼgelaʼge welat we ʼburlat ogu lege o.

¹⁸Is ado en asogo ogwiam, disogo u o, “Hat en e, Nede Allah pam heʼberik welegi ese legen ai o. Ye, an en e, neʼgik pam en lerentasu legi ai o. Holuk e, hat heʼgik en leronto erlak welat, Nede nak Allah pam heʼberik welegi, oluk ese legen ai ebe ʼge. Onukniemen da. An nak e, Nede Allah pam heʼberik welegi, oluk, neʼgik pam en lerentasu legi aʼge enagat oruak ai, onukhiaigat o,” oluk moʼgulonto ai o.

¹⁹Hat mesik en e, “At Allah ebe mesigat o,” oluk demat epasu legen ai obat aʼgeat de, Iblis osi enebabut wiak aʼge enemin en, ai ʼgelaʼgeat demat epasulat, ebe onogorlok en alik worogwiat o.

²⁰Hat hebe uo ʼgelaʼge ese legen ai re! Allah demat oluk ai aʼge nak epasulat, heʼgik pam leronto erlak holuk, we ʼburlat epasu legen oluk enagat pobi tinok en wene yu moʼgulheik.

²¹Neneʼba Abraham en uʼgwarek omlogo Ishak ebe woluk lagarik e, helep ʼberlasogo poluk Allah uam worogu legesa ai ʼgelaʼge, werigoluk tegei ai enat, at Allah en e, “Wene hebam aʼge noʼgorlogo wokhegirik togolik nemin hwedik takhebegi o,” oluk moʼgulesi epegi.

²²At ede Allah pam heʼberik pasulat, eʼgik pam en tagalat, emin laʼbulogo tegei ai. Eʼgik pam en tegei ai pam ede Allah pam ʼgaroksogo heʼberik pesi oluk, hat en pobi tuat o.

²³Asogo tegei ai pam en wene disogo oluk pelal wokho pegesa aʼge ai demat aga, “Abraham ede Allah ebam heʼberik pesimu re, at Allah en e, Hat hebabut hegitsogo tagalom ʼgelaʼge, hede nebam heʼberik pegenma, wene hebam aʼge noʼgorlogo wokhegirik togolik nemin hwedik takhebegi aiat o,” [4] oluk moʼgulesimu pelal wokho pegesa. Ai en e, Allah en, “Abraham emin hwedigat welege o,” oluk egei ai o.

²⁴Ai ʼgelaʼge, Allah demat oluk ai nak opoma re, Allah en e, “Wene hebam aʼge noʼgorlogo wokhegirik togolik nemin hwedik takhebegi o,” oluk moʼgulnum erlak hegi. We, asogo epasulat, neneʼgik pam en eminat togwiam ai pam en nak e, asogo moʼgulesi ai hemit!

²⁵Ai ʼgelaʼge re, hwe Rahab danian nese laga aʼge ai en, aphwami Israel aʼge en is ap enil ʼgogoligisa aʼge wegesema hisagenebegeitik e, pobuk ebela muʼgwe ugwalogo lebigenebesi ai o. Asogo tagenebesi ai pam en, Allah en e, “Wene hebam aʼge noʼgorlogo wokhegirik togolik nemin hwedik takhebegi o,” oluk moʼgulesiat ai o.

²⁶Nenebe nenarogun libagoam waraga lege ai ʼgelaʼge, nonogola en e, “Allah demat,” oluk opogularat de, neneʼgik pam en logon togwi erlak holuk, werak aʼge ʼgelaʼge welat, we ʼburlat opogu lege o.