Read Silimo Yakobus 3 Bible Online

Yakobus 3 - Silimo bible

Yakobus 3

¹Narilak norokhwi. Nis wene moʼgulontogwi aʼge en wiak togwi holuk e, pobuk Allah en aphwami logon enemdema wokho wene weiyat ʼgelaʼge enebam pouwa aʼgeat de, nis nak e, wene logat nenebam pouwa aʼge henaluk ai en, henebe esanat wene moʼgulontogwi aʼge omogoluk epagup o.

²Nis aphwami ʼberlegat op togu lege ʼgelaʼge di paget yu paget, wiagat togu lege ai o. Aʼgeat de, sa iak pam en wene wiak aʼge logon u erlakma en haʼbuksogo nak oso holuk e, eʼgik oyuk ebe ʼberlegat haʼbuktak pasulat ede ʼgaroksogo hurleat oruak o.

³Ai ʼgelaʼge, nis en wam kuda emde erlan pam herle erlelik poluk, nis ebela ʼgo yu lul oluk, opul holuk, herle ano lishogwiam, demat lasu ai o.

⁴Ye, ik so ik ogum petne lasu aʼge, ai ebe lok aʼge, sogwei en annisogo woluk lasu aʼgeat de, at so woluk lasu aʼge ai ede en e, “Ebelaʼgwe ai laik,” oluk, opoluk, aʼgul hwaliso aʼge wei aʼge ai ʼgwani hasu holuk e, ebelaʼgwe ano at hegitsogo woluk lasu ai pobi tit o!

⁵Ai ʼgelaʼge, nenemage ebe wei aʼge aʼgeat de, aphwami onuʼgwarek en erlikhorlogwi ai ʼgelaʼge, nenemage ai en wene nak logap pagathorlogwi ai o. Ye, odouk eʼgen wei aʼge deksogo ʼbiselat o ogwei lok aʼge nil lasu ai pobi tirat o.

⁶Nenemage ai ebe re, odouk ʼgelaʼgeat o. Nis aphwami ʼgwiangma yema di wiak yu wiak togu lege ai ʼgelaʼge, neneʼgik nonoyuk yu oruakhweat de, nenemage yu en nenebe ebesik wiagapnenebiso ai o. Asogo wiagapnenebiso ai re, odouk ai edip e, odouk orloukmu welema aʼge ai aʼgeatma, nenemage pam muʼgalagalat, nenebe welege aʼge yu ebesigat e nasulat welago ai o.

⁷Aphwami en e, di ʼbaik yu ʼbaik, di tue yu tue, di inaʼge yu inaʼge, di hiane yu hiane, il hweiye aʼge elirat il worogwiam ena ago ai o.

⁸Asogo aʼgeat de, nenemage ai re, sa en il woru epegep. Modok mia o. Nenemage ai esaʼgo werak erlagat o. Herlegetie en aphwami warenebisoam waragai ʼgelaʼge, nenemage ai pam wiak aʼge ʼbeterak welat, is logon enebe warenebiso ai o.

⁹Nenemage ai pam nenaik ʼgain Onuk Logo aʼge Allah erliktogulat, aphwami at ebe ʼgelaʼge walentesi aʼge heman onobogulat, togu lege ai o.

¹⁰Edip nenemde mesigat ai enat, Allah erliktogulat, aphwami heman onobogulat, togu lege ai o. Narilak norokhwi. Asogo tu puk aʼgeat de, togu lege o.

¹¹Ik elaruk mesik aʼge en ik oduk op aʼge emin, wiak aʼge emin, mesik oʼgwe wago no? Mia o.

¹²Narilak norokhwi. Eremna uak pam en saik egesu no? Ye, saik uak pam en eremna egesu no? Ai ʼgelaʼgeat de, mayu egeik elaruk oʼgwe en, ik we aʼge logon libom no? Modok miayat o.

¹³His logon henede ʼgagalak welat, di wene yu wene loksogoat henaluk holuk e, aphwami en enagat pobirak honobouwagoluk henebabut enago welat, henede ʼgagalogo opsogo togu lomup o.

¹⁴Aʼge re, henede wiak otluk ʼbou togulat, honuʼgwarek henebaget nak eberogulat, togulat e, honuʼgwarek en, “An op,” oluk erlikhorlogu lorogup o. Asogo togup holuk, Allah iak dem wene ai aʼge sagalak poluk henepenen enat ogup no yo.

¹⁵Asogo togwi ai re, Allah en enede ʼgagalisoam togwi puk. We, edip at Iblis enat enede ʼgagalisoam aphwami ʼgwiangma aʼge enebabut onotogat welat enagai opogwi aʼge togwi o.

¹⁶Enede wiak otluk ʼbou togulat, onuʼgwarek enebaget nak eberogulat, togwiam e, eniak logat sagalogulat, di wiak yu wiak togulat, togwi ai o.

¹⁷Asogo aʼgeat de, aphwami Allah en enede ʼgagalisoam, enebabut op aʼge logo re, wiak mesik tu erlakma en, enil haʼbuksogo welagai aiat o. Asogo welat, aphwami logon enemin laʼbulik welat, enebabut enago welat, eniak hologo togulat, e eʼgen op aʼge oso ai ʼgelaʼge, opsogo togulat, aphwami modok enedesogo welat, aphwami logon onolukhwema onobogulat, logon onoʼborlma onobogulat, tu erlakma en, enede ʼbiren wolom erlakma enat, opsogo nak togwi ai o.

¹⁸E op aʼge owi yorogwiam, eʼgen op oso ai ʼgelaʼge, aphwami enebabut lioktak welat, is logon enemin lioksogo welemagoluk laʼbulik onobogwiam enebabut hegitsogo op nak togwi ai o.