Read Silimo Yakobus 4 Bible Online

Yakobus 4 - Silimo bible

Yakobus 4

¹His en wene ʼbalogulat, yeik pogulat, togu legep ai, edip no pam en togu legep no. Weim enebam libomogoluk, weim obok, “Ebelaʼgwe ai lu, ʼgo yu lu,” il il enebe waronobogwi ai ʼgelaʼge, henede en noluk, “Di nagai, yu nagai,” opogu legep ai enat togu legep epegi o.

²Di aʼge yu aʼge honogola en henagai opogu legep aʼge ebe horlo erlakma en, aphwami enebe waronobogu legep ai o. Honogola en is logon enaʼge henagai opogu legep aʼgeat de, ebe horlo erlakma en ʼbourak poluk en yeik pogulat, weim obogulat, togu legep ai o. Asogo, di aʼge yu aʼge horlo erlakma en henerlagaik welegep ai, Allah ʼgonu moʼgulogu legep erlak ai enat o.

³Ye, mesik e, Allah ʼgonu moʼgulogu legep aʼgeat de, honuʼgwarek henebaget nak henede en nasuam horlouwogoluk ʼgonu u puk aʼge wiagat moʼgulogu legep ai en, wokhentasu erlak o.

⁴Hwami en onogunlak enil salogwi ai ʼgelaʼge, Allah il salogu legep yema re! Aphwami ʼgwiangma aʼge yema enebabut onotogat welat togwi aʼge ai henemin hwedik welegep holuk e, Allah emin il ʼbelak ʼgelaʼgeat welegep ai, heneperlak no? His logon en aphwami ʼgwiangma yema aʼge enebabut onotogat welat togwi aʼge ai enemin hwedik tuogoluk togu legep holuk e, honuʼgwarek en at Allah emin il ʼbalogu legep o.

⁵Pageat Allah iak logon pelal wokho pogulat e, disogo egesa, “Hwami enedesogo welat erlele wokho modok welagai ai ʼgelaʼge, Allah en Arogun nonogola pesimu nenebe edesogo welat, erlele wokho tennentarok welago,” oluk pelal wokho pegesa ai, his honogola en e, “We, ʼburlat egesa,” oluk opogu legep a? ʼBurlat egesa erlak o.

⁶Asogo aʼgeat de, Allah ebabut op welat loksogo letnentasu ai. Asogo tiso ai en disogo egesa, “Aphwami onuʼgwarek en erlikhorlogwiam at Allah en ebirabenebiso yo. Aʼgeat de, onuʼgwarek enede sebelogo welema holuk, at ebabut op en edeabenebiso,” [5] oluk pelal wokho pegesa.

⁷Ai en e, Allah eragam henede sebelogo ʼgoluk iak hwelak welat, Iblis iak ai sagalogo ukpogu lomup o. Ukpoma re, at en ukhonoboluk hweiye libemayat o.

⁸His Allah emin loʼboksogo lagup holuk e, at ogo re, henebam loʼboksogo wemayat o. His wiak togu legep aʼge ai, heneʼgik petne hosogo ukpogu lomup o. Henede ʼbiren agorak ai, honogola wiak aʼge hosogo hwikhogu lomup o.

⁹Honogola wiak agalat, nge hwedik togu lorogup o. Asogo togulat, eida togu legep aʼge ai, nge togu lomup o. Ye, honogola henagai hogu legep aʼge ai, henede wiak otluk wolomup o.

¹⁰Nonue ʼgain Onuk Logo aʼge eragam ʼgoluk henede sebelogo wolorogup holuk e, at en logo honobouwayat o.

¹¹Narilak norokhwi. His-his nobok-hobok ogulom mia o. Henarilak honorokhwi logon onobok ʼbalogulat, wene enebam pogulat, pogu lorogup holuk e, wene Allah en nenesaʼgo weregei wene ano wiak oluk u ʼgelaʼgeat ogu legep ai o. Ye, wene ai wiak oluk ogu legep holuk e, wene ai henesaʼgo hologo togu legep puk. We, his en e, “Wene ai wiak. Ebe op e, disogo u aʼge egeimu,” oluk u ʼgelaʼge ogu legep ai.

¹²Aʼge re, at Allah ematek en wene nenebam pasulat, noʼgorliselat, tiso yo. Holuk e, at enat obapnenebiselat, wiagapnenebiselat, tu elirat aʼgeat de, his logon en henarilak honorokhwi aʼge wene enebam pogu legep ai nopaget. His en asogo tu aʼgeat togu legep a? Mia o.

¹³His logon en e, “Yogodak de a? Loruk de a. O momu lorik e, tahun mesigat ʼgelaʼge welat, di aʼge yu aʼge oʼgo ʼbalogulat, saborogulat, togu lomul,” oluk ogu legep eba re!

¹⁴Loruk oʼgwe nis wene nenebam disogo ema, oluk heneperlagat welat ogu legep eba re! Nis nenebe ai re, no ʼgelaʼge welagai no. ʼGwiang age weiyat wolomtik e, perleneat erlak ago ai ʼgelaʼge, nenebe asogoat welege ai o.

¹⁵His en ʼbekhitsogo u re, disogo epegi, “Nonue ʼgain Onuk Logo aʼge ede en disogo yusogo epasu holuk e, nenebe nenelalugat welat, di aʼge yu aʼge togu lomul o,” oluk ogulom aʼgeat de,

¹⁶honuʼgwarek en erlikhorlogulat, logo pagathorlogulat, til noʼgu legep eba re! Asogo erlikhorlogu legep ai re, dagan togu legep o.

¹⁷His honogola en e, “Hegitsogo tu re, disogo,” oluk henaluk welarat de, yabuk ebe togwi erlak holuk e, his wiak togulat wene henebam pagathorlogu legep o.