Read Silimo Yakobus 5 Bible Online

Yakobus 5 - Silimo bible

Yakobus 5

¹His ap ʼgain aʼge narilak. Pobuk Allah en wiagaphenebisoam di obotut yu obotut hogu lorogup ai en, nge togwi modok wolorogup oluk moʼgulhentegis ai henesaʼgo hwelit o.

²Henaʼge di aʼge yu aʼge aʼbik eba muk agalat, honosum aʼbik eba elaluk aʼge en ʼberlegat nasulat

³his enaʼge emas emin, perak emin, ik morlil tagalat, tegeimu orogole wiak eba re! Henebe o ologun hwerli pam welarat de, di aʼge yu aʼge honuʼgwarek paget odoksogo pagathorloluk welegep ai en, pobuk Allah en wene henebam pasuam, ik morlil ʼbalegei aʼge ai enat, “Is enebabut asogo o,” oluk, enak aʼge selakma pasuam di aʼge yu aʼge odouk en nasu ai ʼgelaʼge, henebe ik morlil ʼbelak aʼge ai enat wiagaphonobua o.

⁴Honosi henepenen enat gandum eʼgen ʼbalhontouwagoluk yoʼgo enebegepma ʼbalogwi aʼgeat de, eneʼgik oʼgo wogonto erlakma en heniak agam togu legep ai en, is en e, “Neneʼgik oʼgo woknonto aʼge!” oluk eniak loksogo ogwi ai yethemit! Asogo togu legepma is eniak ai nenaik ʼgain Onuk Logo anni aʼbik aʼge ano esaʼgo hwelegeitik oruak o.

⁵ʼGwiangma yema henaʼge di aʼge yu aʼge henilmu ʼbullak welat, honogola henagaisogo honogum ningsogo horlogwi modok welegep yema re! Wam woru hegit lau wagoam ebe lok agalat esei ʼgwelabuagoluk soʼboru loksogo dakho wogogwi ʼgelaʼge, his henebe wiagaphonobua aʼge horok lau wagokhwe, honuʼgwarek en henebe dakhorlogu legep eba re!

⁶Is logon hegitsogo togwi aʼge ai, is en oʼgo his wathonobu erlakmayat wene enebam poluk enebe waronobogu legep eba re!

⁷Ai en e, narilak norokhwi. Nonue ʼgain Onuk Logo aʼge ebe owan wom erlak oruakhwe, honogola ʼbugom erlakma en henepe mosogo yetharok wolomup o. Aphwami en yabuk wogoma soʼboru agarli yogo poluk welagai ai henede eberit o! Asogo agarli yogo poluk oruakhwe moru o mo ligagokhwe nasulat, ʼbisokhwe nasulat, pobuk naduk nasukhwe onogola ʼbugom erlakma enat, “Pobuk soʼboru hurle agoam en de, ebe lok aʼge dakhwerlaik,” oluk enepe mosogo yetharok welagai ai ʼgelaʼge,

⁸nonue ʼgain Onuk Logo aʼge ebe perleneat wema oluk henede hurlesogo welat, henepe mosogo yetharok, wolomup o.

⁹Narilak norokhwi. Asogo yetharok welat e, Allah en wene henebam pouwano oluk, his-his nak ogulat, “Nare ai ebabut tago ai re, nebit o,” oluk onobok ʼbalogwi erlagat wolomup o. At Allah enat wene aphwami enebam pasulat, noʼgorliselat, tua ai, ʼgodukmu horok lau waga ai yethemit!

¹⁰Narilak norokhwi. Pageat is ap Allah iak moʼgulontogu legesa aʼge ebano en e, “Nenaik ʼgain Onuk Logo aʼge en egei aʼgeat moʼgulhontogu lege o,” oluk moʼgulontogwiam, is aphwami logon en enebe wiagabonobogukhweat, enede ʼbugom erlakma en, enepe mosogo welegesa aʼge ai enebabut womup o!

¹¹Wiagabonobogukhwe, enepe mosogo welegesa ai en, nis en onobok op ogulat, “Is op egesarik onogola enagai hogwi,” oluk ogu lege ai o. At Ayub ede ʼbugom erlakma en epe mosogo welaga ano pam, nenaik ʼgain Onuk Logo aʼge ebabut op en loksogo edeabenebiso aʼge ano en, ologun pam obaptegei ai obok henesaʼgo hologu legebat o.

¹²Narilak norokhwi. An wene logo aʼge mesik yu moʼgulhentaik. Allah en wene henebam pouwano oluk e, his en ʼbogorl pam aʼge mesik onuk ʼbalogulat, ʼgwiangma aʼge mesik onuk ʼbalogulat, mu aʼge mesik onuk ʼbalogulat, hoʼbuk ʼbalogu lorogup no yo. We, “I o,” uogoluk holuk e, ʼgaroksogoat “I o,” u o. Ye, “Erlak o,” uogoluk holuk e, ʼgaroksogoat “Erlak o,” u o.

¹³His logon henede wiak welegep holuk e, seʼban ogu lomup o. Ye, his logon honogola henagai hogu legep holuk e, weni Allah paget worogu lomup o.

¹⁴His logon henebam obotut ago holuk e, seʼban ogulat, nonue ʼgain Onuk Logo aʼge onuk ʼbalogo oli henebam egilhogulat, tuagoluk is ap Allah eiyagai tenentarok welagai aʼge yoʼgo onobogu lomup o.

¹⁵Is en enede Allah pam heʼberik poluk, seʼban ua ai pam, nonue ʼgain Onuk Logo aʼge en henebam obotut aʼge ai erlak emagoluk obaphenebiselat, his mesik wiak tigep aʼge oruak holuk, erlagapsogo ukpasulat, tua o.

¹⁶Asogo tua ai en, his logon henebam obotut aʼge erlak emagoluk e, wiak togu legep aʼge his-his ʼbaktogulat seʼban ogu lomup o. Is aphwami Allah ogola agai epasu aʼge hegitsogo togwi aʼge en seʼban demat ningsogo ua ai, anni aʼbik oruakma re, Allah en obabonobuayat o.

¹⁷At Elia ai re, ebe nis ʼgelaʼge aphwami aʼge enat, moru nasu erlak modok welemagoluk seʼban egeimu re, mo ligom ʼbugom osokhwe tahun henagan welagarik nin pobuk dugwi hebarligen eminat moru ʼgwiangma ʼbuom erlakma en o hebi modok welaga.

¹⁸Asogo oruakma, seʼban pobuk egeimu re, moru ʼbu agama di aʼge yu aʼge pobuk ʼgwiangma en ʼbaksogo eʼgen egei ai.

¹⁹Narilak norokhwi. Henarilak honorokhwi logon dem wene ukpoluk ʼgwi-ʼgwani nal lai lagai holuk, his logon en pobuk togolik Allah eʼbek woluk worogup ai paget,

²⁰wene yu henede eberu o. Sa en wiak tagalat, uʼgwarek en ʼgwi-ʼgwani nal lai lasuam e, at mesik en pobuk togolik Allah eʼbek woluk wago holuk e, ebe warom hegit aʼgeat deliselat, wiak logat tegei aʼge ano erlagapsogo ukpasulat, tua o, oluk, oruak ai henede eberogu lomup o.