Read Silimo 1 Petrus 1 Bible Online

1 Petrus 1 - Silimo bible

1 Petrus 1

¹Narilak norokhwi. An Petrus, Yesus Kristus en yoʼgo noboluk peraknobou waga aʼge ano en, wene yu pelal wokho his nenaik Allah en, henebe nadugat poliknenebesi aʼge, yogodak ya we lodu paget o di owi yu owi ʼbogulogo legeptik, o propinsi Pontus emin, Galatia emin, Kapadokia emin, Asia emin, Bitinia emin, aphwami eneʼgerlak oʼgwe loʼbok welegep aʼge ano, heneʼbek perakpou wegi o. Henebe Allah enat ede opoluk polikhenebesirik, Yesus Kristus iak hwelakpoluk togu lemagoluk eragam henebasulat, emep pam hohenebiselat, tigoluk e, “An nuʼgwarek neiyagai orogup oluk wokhenebegis o,” oluk at Arogun en wokhenebegei ai o. Allah ebabut op ano en op aʼge wokhentasulat, henede pobuk naduk haʼbugaphenebiselat, loksogoat taga lemak o.

³Nonue ʼgain Onuk Logo aʼge Yesus Kristus aik Allah anoat erliktogu lomok o. At Allah nenebe modok ede en, Yesus Kristus ebe waragarikmu en elalugap pesi ai pam nis nenelalugapnenebegei ai o. Nenelalugapnenebegeimu welat e, nonogola en e, “At en, pobuk obapnonobua o, egei ai sogwi ema erlak,” oluk nonogola nenagai hogu lege.

⁴Asogo obapnenebasuam e, eiye omul aʼge ai, muk ago erlak, wiak ago erlak, erlak om erlakma en, otok modok welema aʼge ʼbogorl pam logon his henebesimu oruak o.

⁵Henede at Allah ebam heʼberik welegep ai en, at anni pam tenhentarok welemarik e, pobuk henebe obaphonobua aʼge o ologun pam selakma ema ai o.

⁶Ai enat, yogodak ya, Allah en henebabut ʼbaliogoluk tagoam, henebam di obotut yu obotut hogulat, we lodu paget henede wiak ago aʼgeat de, honogola henagai hogu lomup o.

⁷Emas oʼgo aʼbik ʼbalogwi aʼge ai, “Op a? Wiak a,” oluk odouk mangale pam walhogwi ai ʼgelaʼge, Allah en e, “Is enede an nebam demat heʼberik oruak a? Erlak a,” oluk, enagat emagoluk epasuam, henebam di obotut yu obotut hogu legep ai o. Emas ai re, we ʼburlat erlak ema aʼgeat de, ebe logo re, henede Allah ebam heʼberik welegep aiat o. His henede at ebam heʼberik wolorogup holuk e, at en henebabut ʼbalise lemarik e, Yesus Kristus selakmasogo perakpouma ai erlige re, erlikhenebiselat, hau doʼgoksogo wathenebiselat, logo henebasulat, tua o.

⁸His en nadugat, at ebe henil ho erlak aʼgeat de, at ebe henede welegep ai. Asogo welat e, yogodak ya henil hogu legep erlak aʼgeat de, honogola en e, “Pobuk op modok taknonobouwa,” oluk heniak pam noʼgosogo ʼbeliʼgogo u ʼgelaʼgeat welat, honogola henagai aʼbik hogu legep ai o.

⁹Henede en e, “O ologun pam obapnonobuak,” oluk henede at ebam heʼberik welat, yogodak eiye aga legebat o.

¹⁰Nenebe obapnonobua wene ai re, naduk is ap Allah iak moʼgulontogu legesa aʼge ebano en wene ai pagerat heratogulat, hin wogulat, togu legasa. Asogo heratogulat, Allah ebabut op ano en, “Obabenebasu lema,” oluk ebe his obaphenebiso ai pagerat owan oruakhwe moʼgulontogu legesa ai o.

¹¹Asogo moʼgulontogu legesa ai, at Kristus Arogun onogola welat disogo moʼgulentesi, “Kristus obotut hil hil warema. Waremarik e, pobuk elaluk agoam erliktogu lomul o,” oluk moʼgulentesimu is en ogulat e, “Noʼgosogo ema. Metne erlige ema,” oluk bin dokhumsogo wogu legesa.

¹²Hin wogwiam, at Allah en e, “Wene ai re, his honuʼgwarek paget e, erlak o. Is pobuk owan aʼge enebaget togu legep o,” oluk his henebagerat egei o. Asogo moʼgulentesirik welagarik en, pobuk Allah Arogun ʼbogorl pam en ʼbelakpou wagama, is ap op wene Yesus Kristus tegei wene ano moʼgulhontouwagoluk onogola welat yogodak ʼbaksogo moʼgulhontogwi ebe ai paget ogu legesa ai o. Wene ai, is malaikat Allah en yoʼgo ʼbelabonobou wago aʼge ebano en e, “Eige, nis wene ai dokhumsogo nenaluk olo e,” oluk opogwi o.

¹³Ai en e, wene ai pobi toluk e, ebela pungtak louwogoluk enebagase pam ʼbagaluk ʼbetesogo wantogwi ai ʼgelaʼge, henebabut heberlogo, henede weʼgerlogo wolomup o. Asogo welat, henede en e, “Allah en Yesus Kristus ebe selakmasogo perakpou wagoam op aʼge woknentauma o,” oluk henede at ebam poluk ebam eberak modok wolomup o.

¹⁴His nadugat e, wene ai heneperlak welat, di aʼge yu aʼge henagai en henede en nasuam togu legep ano, pobuk e, henebabut ai aʼge wagup o. Malik en enaiklak eniak hwelak welat hegitsogo togwi ai ʼgelaʼge, his Allah iak henesaʼgo hwelakpoluk hegitsogo togu lomup o.

¹⁵At Allah en e, “An nebabut wiak tu erlakma en degelak modok welegi ai en e, his ogo re, an nebaget henebabut degelak modok wolomup o,” [1] oluk egeimu pelal wokho pegesa ai en, his en e, di aʼge yu aʼge togulat, henebabut at Allah en yoʼgo henebesi aʼge ebabut ʼgelaʼgeat degelak modok welat togu lomup o.

¹⁷At Allah ebabut e, aphwami enagap pam nak il ontoluk, mesik olukhwema enebasulat, mesik oʼborlma enebasulat, tago erlak o. We, enebabut togwi loʼbok hegitsogoat wene enebam pasulat, noʼgorliselat, tago ai en e, his en e, “Nenaik Allah o,” oluk yoʼgo pogulat, ʼgwiangma yema we lodu paget henebe ap ʼbok ʼgelaʼge welat, at ebe honogorloksogo togu lomup o.

¹⁸Naduk e, henaʼbu heneʼbalak en togu legesa ai ʼgelaʼge, is enebabut wokho erlak om aʼge paget ʼburlat almasogo togu legep ano en, heneʼgik herle werak ʼgelaʼge oruakma, Allah en henebe honoʼgo ʼbalogo delhenebegei ai henalugat o. Oʼgo ai re, erlak ema aʼge emas pam, perak pam honoʼgo ʼbalhenebegei puk.

¹⁹At e, oʼgo lok aʼge pam ʼbalogo delhenebegei o. Wam domba wam emalik wiak aʼge puk, we, asu modok pok ʼboguntak aʼge Allah paget emep enamogo warom ʼgelaʼge, at Kristus emep enamogo waraga ai pam, honoʼgo ʼbalogo delhenebegei ai o.

²⁰Kristus, Allah en ʼbogorl ʼgwiang owan walho erlak welat, ede opoluk yoʼgo pesirik welagarik e, ebe yogodak o ologun pam his henebaget selakmasogo perakpou wagama henebe delhenebegei ai o.

²¹Ebe waragama Allah en elalugap poluk erliktogu lemagoluk edikpesimu, henede Allah pam heʼberik poluk, “Pobuk at en obapnonobua,” oluk ebam eberak welegep ai o.

²²Dem wene ai henesaʼgo hologulat, honogola en wiak aʼge hosogo ukpoluk, henarilak honorokhwi Allah eiyagai aʼge demat henedesogo togu legep ai, henemin hwedik modok welat nede-hedesogo togu lomup o.

²³Allah en pobuk dakhenebegei ai, aphwami waragai aʼge en dagonobogwi ai ʼgelaʼge dakhenebegei puk. We, Allah elaluk otok modok welat iak erlak ema erlak welema aʼge pam dakhenebegei o.

²⁴Ai, Allah iak disogo oluk pelal wogo oruak ʼgelaʼge, “Aphwami ʼberlegat e, enebe e eʼgela ʼgelaʼgeat o. Op o, oluk, erligonobogwi ai, e owil erliktogwi ai ʼgelaʼge erligonobogwi ai o. Eʼgela ʼbuk agalat, owil lologo ʼbiselat, tiso ai o.

²⁵Aʼge re, nonue ʼgain Onuk Logo aʼge iak ai modok welema o,” [2] oluk egeimu pelal wokho pegesa ai o. At iak ai ebe re, nis en op wene moʼgulhontogu lege aiat o.