Read Silimo 1 Petrus 2 Bible Online

1 Petrus 2 - Silimo bible

1 Petrus 2

¹Ai en, his wiak togu legep aʼge ai modok ukpoluk wolomup o. Aphwami logon lalonobogulat, henede ʼbiren welat, ʼbou togulat, heniak eseiyat aphwami logon onobok wiaksogo ʼbalogulat, togu legep ai, ukpogu lomup o.

²Di aʼge yu aʼge oduk nekholuk, oduk op ogwi ai ʼgelaʼge, nonue ʼgain Onuk Logo aʼge ebabut op hegep ai en e, malik ʼget dogo aʼge agamu nele en noʼgwi modok welagai ai ʼgelaʼge, wene op wene henede ai pam hurle omma obaphonobuagoluk, wene aiat henagaisogo wogwi modok wolomup o.

⁴At ebe helep ʼgelaʼge elaluk welago aʼge oluk e, eʼbek manup o. Aphwami en e, “Helep ai wiak,” oluk ukpegesa aʼgeat de, Allah en e, “Helep yu modok op aʼgeat o,” oluk pulogo pesi.

⁵Asogo pesimu, his henebe helep elaluk welago ai aʼge ʼgelaʼge welat, at eʼbek manup o. At eʼbek wagaiam, Allah en e, at uʼgwarek owi wusogo honobouwak. At owi werikmu, henebe Allah eiye aʼgeat Yesus Kristus emin hwedik welat, Allah ede opsogo uam warogulom ʼgelaʼge, henede wogogu lomup o.

⁶Ai aʼge paget Allah en disogo egei, “An en, helep modok op aʼge pulogo o Sion eba o ʼbobuk mesik daintak pegi yu hemit! His aphwami henebe loʼbok henede at ebam heʼberik wolorogup holuk e, heneʼgerli hagup erlak o,” [3] oluk egeimu pelal wokho pegesa ai.

⁷His henede at ebam heʼberik aʼge en e, “At modok op,” oluk pobi togu legep ai o. Aʼgeat de, is logon enede at ebam heʼberik po erlak aʼge paget nak e, disogo egei, “Is ap tukang o helep owi worogwi aʼge en, o ebe worogulat e, Helep yu wiak, oluk ukpegesa aʼge ai obuleat dain egeimu o,” [4] oluk egei.

⁸Ye, mesik disogo egei, “Aphwami helep ai pam onoyuk dungsogo wathorlogulat, ʼbulak horlogulat, togu lema o,” [5] oluk egei. Asogo ʼbulak horlogu lema ai re, is en op wene ai, “Demat,” oluk pobi tua erlak ai en, Allah en epesi hegitsogoat, wathorlogwi ai o.

⁹Aʼge re, his nak e, “At Allah en obapnenebasu,” oluk obok moʼgulentil louwagoluk, henebe o hiktakma oruakma, at ebe elalinat dakharak modok welagoma wemagoluk yoʼgo henebesirik, his at eiyagai emagoluk polikhenebasulat, at ebe eiye ʼgain welemagoluk edikhenebasulat, henaʼgul onuk at uʼgwarek aʼgul onuk aʼge tualogo henebasulat, “Nuʼgwarek neiyagai,” oluk henebe wokhenebiselat, tegei ai o. [6]

¹⁰His naduk e, Allah emin ogorlirak honomu aʼgeat welegep aʼgeat de, yogodak henebe Allah eiyagai egep o. Ye, naduk e, his en e, “Allah nenebe ede oruak,” oluk heneperlak welegep aʼgeat de, yogodak, “Nenebe Allah ede en woknenebegeimu welege o,” [7] oluk henaluk egep o.

¹¹Narilak norokhwi. Henebe nede o. His henebe ap ʼbok aphwami onowi pam ʼbogulogo legeptik, eba welat e, di aʼge yu aʼge honogola en ʼgagalogo orlu agalat, henede en nasuam nenagai opogu legep aʼge ai re, selei aʼge en waronobogwi ai ʼgelaʼge henebe wiagaphenebigoluk, honogola en ʼgagalogo orlu ago aʼge ai ukpogu lorogup en moʼgulhentasu legi ai o.

¹²Is aphwami oʼborl oʼgwe aʼge Allah eneperlak aʼge henemin welat, is en e, his wiak togu legep aʼge ʼgelaʼge, “Is wiak togwi o,” oluk honobok wiak ogularat de, his henebabut op togwiam enil hontogu lemarik e, aphwami en at Allah ebe pobuk wagoam erliktuagoluk his henebabut hegitsogo togu lomup o.

¹³At Allah en e, his disogo togu lemagoluk ede epesi o. Aphwami enede erlak aʼge en wene eneperlak welat ogwi ai, eneʼgerli agalat eniak erlak emagoluk, his henebabut op togu lemagoluk epesi ai en e, nonue ʼgain Onuk Logo aʼge paget, aphwami en pemerintah aʼge ʼgain welemagoluk edigenebegesa aʼge ai, enebe ʼberlegat eneragam ʼgoluk eniak hologo togu lomup o. Asogo togulat, Kaisar onuk logo aʼge pemerintah aʼge ʼgain logo ʼgelaʼge ai emin, at en is gubernurlak aphwami wiak togwiam wene enebam pogulat, op togwiam erligonobogulat, togu lemagoluk yoʼgo onoboluk peragonobou wago aʼge ai emin, eniak hwelakpoluk togu lomup o.

¹⁶Asogo welat, his en e, “Nis wiak aʼge eragam oruakma, Allah en herle hebilogo nenematekma nenebesimu welege,” oluk, wiak mesik hisakho togu lorogup o. We, henebabut Allah eragam aʼge welat tu aʼge hegitsogoat togu lomup o.

¹⁷Aphwami ʼberlegat henede nak welat heniak doʼgoksogo waronobogu lomup o. Asogo waronobogulat e, henarilak honorokhwi Allah eiyagai aʼge logon henede hwedik wolomup o. Welat e, Allah ebe honogorloksogo welat, ye, Kaisar onuk logo pemerintah aʼge onue ʼgain ai hau doʼgoksogo worogulat, togu lomup o.

¹⁸His logon, honuelak eneragam welegep aʼge ai, is eneragam welat, enebabut op sakhorak aʼge paget nak honogorlok takpoluk eniak hologo togulom puk. At e, enebabut wiak aʼge eminat honogorloksogo eniak hologo togu lomup o.

¹⁹His en wiak mesik tu erlakmayat de, honuelak en di obotut yu obotut takhonobogukhwe, honogola en e, “Allah ogola agai aʼge tu,” oluk pobirak poluk, henepe mosogo wolorogup holuk e, at en obaphonobua o.

²⁰Aʼgeat de, his en wiak togup pam, oʼgo ʼgoʼbu wathonobogukhwe, henepe mosogo wolorogup holuk, erlikhonobu no? Erlak o. Henebabut enat u o. Aʼgeat de, op togwiam, di obotut yu obotut takhonobogukhweat, henepe mosogo wolorogup holuk e, Allah ebabut op en obaphonobuayat o.

²¹At Kristus ebe his henebaget di obotut yu obotut hil hil waraga ai en, his ogo re, at ebabut wokho di obotut yu obotut houwagolugat Allah en yoʼgo henebesi ai o.

²²At en e, “Wiak mesik tu erlakmayat o. Ye, iak esei osokhwe, aphwami logon enesaʼgo holu erlagat o.” [8]

²³Aphwami en eniak esegen wiak yagogukhweat de, at en oʼgo iak esegen yagonto erlagat. Is en di obotut yu obotut takpogukhweat, at en, “An pobuk oʼgo mesik wathenebik o,” oluk moʼgulentasu laga erlagat o. At e, “We, Allah en wene enebam pasulat, noʼgorliselat, hegitsogo tua aʼge oruak o,” oluk, at eʼgik pam poluk, iak oʼgo u erlakma en mo ese laga.

²⁴Nis nenebabut wiak togu lege aʼge ai, aphwami warotluk di aʼge yu aʼge togwi erlak ai ʼgelaʼge, nis wiak aʼge ukpoluk, nenelaluk welat Allah agai aʼge togu lemagoluk, nis wiak togu lege aʼge noʼgorlogo, at Kristus uʼgwarek en ebam pesimu, ebe e pam edikpoluk werigisa ai o. At ebe lebil-lebalsogo werigisa ai pam, his obaphenebegei ai.

²⁵His naduk e, wam domba wam ebela nelakpasu ai ʼgelaʼge, nal lai laga legep aʼgeat de, yogodak at Allah en, at henebe tenhentarok welat ʼgwelakhentarok welago aʼge eʼbek pobuk togolik wokhonoboluk honobou wagama welegep o.