Read Silimo 1 Petrus 3 Bible Online

1 Petrus 3 - Silimo bible

1 Petrus 3

¹Ai ʼgelaʼge, his hwami ado honogunlak Allah iak wo erlak aʼge heniak moʼgulentagup pam puk. We, henebabut henil haʼbuksogo honogunlak eniak hologo togwiam, is en enil hontoluk e, Allah iak oruak oʼgwe wemarik iak woumagoluk, honuʼgwarek honogunlak loʼbok eneragam ʼgoluk eniak hologo togu lomup o.

³Henebam opsogo, henagap oʼborl oʼgwe aʼge paget wogu lorogup o. Ai re, henasu tualogulat, henalli aʼge emas aʼge wogulat, sum op oʼgo aʼbik aʼge ʼbuktogulat, togu lorogup o.

⁴At e, henebam opsogo re, henede paget hisogo aʼge aiat wogu lomup o. Ai re, henebabut modok mun-mun welema aʼge enago welat, lioktak welat, togu lomup o. Henebabut Allah ilem asogo togwiam, at ogola en op modok epasu aiat o.

⁵Pageat is hwami Allah eiyagai aʼge enede Allah pam heʼberik welat, enebam opsogo asogoat onogunlak loʼbok eneragam welat eniak hologo togu legesa.

⁶At hwe Sara ai asogoat ogun Abraham eragam welat iak hologo tagalat, hau e, “I, naik,” oluk werise laga. His yogodak ogo re, aphwami en honogorlok emagoluk togwiam honogorlok ho erlakma en op togu legep holuk e, at hwe Sara emaligat welegep o.

⁷Ye, his ap ogo re, Allah ebabut op en honugwami enemin hegitsogoat henelaluk modok welemagoluk eiyerak henebesimu welegep ai en, his seʼban ogwiam Allah en heniak esaʼgo holu erlakma en mo uano oluk, honugwami enemin opsogo welat, honogola en e, “Hwami enanni erlak,” oluk pobirak poluk, heniak lobuksogo moʼgulontogulat, henedeabonobogulat, togu lomup o.

⁸Wene ai ologun wusogo disogo moʼgulhentaik. His henebe ʼberlegat honogola en e, “Nenebe Allah eiyagai nenarilak nonorokhwi enemin,” oluk, henede hwedik welat, henede mesigat aʼge en eberogulat, honogola mesigat aʼge en weʼgerlogulat, togu lomup o. Asogo togulat, honuʼgwarek en erlikhorlo erlakma en, henede sebelogo welat, his-his nede-hedesogo togu lomup o.

⁹Aphwami logon en his wiagaphonobogwiam, his en oʼgo wiagabonobogup o. Ye, eniak esegen wiaksogo yakhontogwiam, his en oʼgo heniak esegen wogentagup o. We, oʼgo re, Allah en enebe obabonobuagoluk, yoʼgo pogu lomup o. Pobuk at en op aʼge wokhentaigoluk yoʼgo henebesi ai en, his en oʼgo op aʼge wogontogu lomup o.

¹⁰Wene ai paget disogo egesa, “Aphwami enebabut nenaik ʼgain Onuk Logo aʼge ogola agai epasu aʼge hegitsogo togwi aʼge nak, at il enebam welat, seʼban yoʼgo pogwiam eniak esaʼgo hweliso yo. Aʼgeat de, is wiak togwi aʼge nak e, il asu warentasu o. Ai en e, ap sa en, An nelaluk logon emin welle e, nin hwedik nan hwedigat op aʼge nak lau wagoam hasulle, oluk wolom agai holuk e, emage pam wiak wene u erlakma en welat, emde pam en iak eseiyat aphwami logon lalenebiso erlak welat, wiak aʼge oʼborlma ukpoluk op aʼge nak tagalat, ebabut aphwami logon enemin laʼbulogo op welagai ai aʼge logo poluk annisogo til lasulat, tagalom o,” [9] oluk Allah iak pam pelal wokho pegesa.

¹³His e, op togu lomogoluk aʼgoluksogo togu lorogup holuk e, sa en wiagaphonobo no. Wiagaphonobo mia o.

¹⁴Aʼgeat de, hegitsogo togwiam wiagaphonobogwi holuk, di obotut yu obotut hogulat, honogola henagai hogu lomup o. Honogorlok emagoluk takhonobogwiam, honogorlok agalat henede mennei yat horok eberogup o.

¹⁵His en e, Kristus heniak lobuksogo moʼgulogulat, “Nonue ʼgain Onuk Logo aʼgeat o,” oluk henedemu en erliktogu lomup o. Erliktogwiam, is logon en hin henebam wokhogulat e, “Op ema, oluk ebam eberak welegep ai nopaget,” oluk moʼgulhontogwiam e, oʼgo wene dokhumsogo moʼgulentagup aʼge henede eberak modok welat,

¹⁶heniak sakhosogo hau wusogo moʼgulontogu lomup o. Asogo moʼgulontogulat, honogola en e, “An wene nebam pukmu o,” oluk opogulat, Kristus emin hwedik welat, op togwiam, aphwami en honobok wiak ʼbalua aʼge ai enil hontoluk eneʼgerli ema o.

¹⁷His wiak togwiam henebam di obotut yu obotut henebabut pam hogu lorogup holuk e, wiak o. Aʼgeat de, his en op togwiam, Allah en, “Is di obotut yu obotut houwak,” oluk epasu holuk nak e, op o.

¹⁸Nis aphwami wiak togu lege ai paget neneʼgik ologun pam, at Kristus pobuk warom erlakma en weleigoluk mesik erligeat waraga. Nenebe Allah eʼbek woknonoboluk laigoluk e, at ebabut hegitsogo tago aʼge en, nis nenebabut wiak aʼge paget waraga ai o. Ebe nis aphwami aʼgeat werigisema waraga aʼgeat de, arogun ai Allah en elalugap pesi ai o.

¹⁹Elalugap pesimu re, is logon enarogun aʼge herle werak oruakma wene moʼgulentai laga.

²⁰Enarogun aʼge ai enebe re, pageat at Nuh en o werisokhwe, Allah ebabut op en yerentarok oruakhweat de, wene wo erlakma en ukpoluk wiak togwi modok oruakma ik ebe en warenebegeimu waregesa aʼge aiat o. Asogo warenebisokhwe re, is logon ik so ogola ʼgwigisarik welegesa aʼge, enebe siragen weiyat ik ebe ano pam delenebegei ai o.

²¹Is ik pam delenebegei ai ʼgelaʼge, nis yogodak ik olomu ʼbogu lege ai pam delnenebiso yo. Ik pam delnenebiso ai re, ik olomu ʼbelaknonobogwiam, nenagap ik ai pam emerago ai en delnenebiso puk. At e, nenedemu en wene nenebam selak emagoluk Allah yoʼgo pogwiam, Yesus Kristus waragarik elaluk aga ai pam delnenebiso yo.

²²At ebe elaluk agarik e, ʼbogorl pam ligagarik, Allah eragam eʼgik ʼbekhit akhit ʼgain welat, malaikat Allah en yoʼgo peragonobou wago aʼge ebano emin, onuelak ʼgain aʼge emin, enanni aʼbik aʼge emin, tenentarok welago yo.