Read Silimo 1 Petrus 5 Bible Online

1 Petrus 5 - Silimo bible

1 Petrus 5

¹His Allah eiyagai tenentarok welegep ai ʼgelaʼge, an ogo asogo tenentarok welegi aʼge en henesaʼgo mesik werik. At Kristus ebam di obotut yu obotut hil hil waraga ai, an nil hegi o. Ye, pobuk Allah en ebe selakmasogo perakpouma ai ebe wagoam, aphwami en erliktua ai, an nemin erliknobuayat o. An niak sakhosogoat henesaʼgo werik.

²Allah en e, “An neiyagai wam domba wam ʼgelaʼge disogo tenentarok wolomup,” oluk yoʼgo henebesi ʼgelaʼgeat tenentarok wolomup o. Tenentarok welat, honuʼgwarek henebit oruakhwe, aphwami logon en, eniak ningsogo moʼgulhontogukhwe tenentarok welat, ye, honogola en, “Oʼgo mesik woknontouwak,” oluk opogulat tenentarok welat, togu lorogup no yo. At e, we, honogola henagaisogo tenentarok wolomup o.

³Allah eiyagai tenentarok welemagoluk soʼbusogo wokhentesi ai tenentarok welat, henebe ʼgain ʼgelaʼge welat, mep legeik-lagaiksogo tagonobogu lorogup o. We, his op togukhwe enil hontoluk henebabut wokho togu lemagoluk, opsogo togu lomup o.

⁴Asogo togwi oruakma re, nonue ʼgain domba eiye aʼge ano wemarik e, “Op modok togu legepma o,” oluk oʼgo erliktogwi modok welema aʼge wokhontouwa o.

⁵Ye, ai ʼgelaʼge re, his ap souwe aʼge nosi o. Is logon en Allah iak pam disogo egesa, “Aphwami onuʼgwarek erlikhorlogwiam, at Allah en ebirabenebiso. Aʼgeat de, onuʼgwarek enede sebelogo welema holuk, at ebabut op en edeabenebiso,” [11] oluk pelal wokho pegesema oruak ai en, his en enarlue aʼge eneragam ʼgwi laguptik eniak hologo togu lomup o. Asogo togulat e, his ʼberlegat e, honuʼgwarek en erlikhorlo erlakma en, eneragam welat, his logon en is logon eneragam aʼge welat, is en his heneragam aʼge welat, togulat e, let-lerat togu lomup o.

⁶Asogoat, Allah en pobuk hononuk oruagapsogo edikhonobouwagoluk, yogodak ya honuʼgwarek en erlikhorlo erlakma en, at eʼgik anni oruak aʼge eragam ʼgoluk henede sebelogo togu lomup o.

⁷Allah henebe ede ai en, his di aʼge yu aʼge paget honogola wenemennei yat horok eberogu legep ai ukpoluk e, henede at ebam heʼberik poluk wolomup o.

⁸At Iblis, heneselei aʼge ano en, singa orlomene anni wiak aʼge di aʼge yu aʼge haumsogo naigoluk iak nga agan heratil noso ai ʼgelaʼge, “Sa ʼgelaʼge wiagap paik,” oluk herahenebil denago ai, henebabut heberlogo henil opsogo wolomup o.

⁹Asogo welat, honogola en e, “Narilak norokhwi o di owi yu owi eba di obotut yu obotut hogwi ʼgelaʼgeat hogu lege o,” oluk, at Iblis wagoam, iak hwelak erlakma en ukpoluk henede Allah pam heʼberik poluk ningsogo edik wolomup o.

¹⁰Oruakma, at Allah ebe erliktogwi modok wolorogup ai ʼgelaʼge, his Kristus emin hwedik oruakma heneminat erlikhonobogu lemagoluk yoʼgo henebesimu, yogodak ya wei nak henebam di obotut yu obotut hogu loroguptik, pobuk, at ebabut op modok ano en, ʼgaroktak henebasulat, henede hurleap pasulat, henanniaphenebasulat, haʼbuktak henebasulat, tua o.

¹¹Di aʼge yu aʼge ʼberlegat at emategat eiye welat tenak modok welemak, oluk, “Amin,” egi ai o.

¹²An en wene horok aʼge ai henesaʼgo wusogo heneʼbek perakpou weigoluk e, pelal wouwagoluk an not Allah eiyagai aʼge Silas ebabut heʼberik hegirik e, yoʼgo pasuam surat wesimu heneʼbek perakpou wegi ai o. Allah ebabut op en taknenebasu aʼge ebe yuat oluk, an naluk welat demat moʼgulhentegis o. Holuk e, henede ai pamat heʼberik welat, ningsogo edik wolomup o, oluk wene pelal wokho heneʼbek perakpou wegi ai o.

¹³Henarilak honorokhwi Allah eiyagai at en poligenebesimu o Babilon yema welagai aʼge en hau wathonobogulat, nomlogo Markus en hau wathenebiselat, tigisa o.

¹⁴Ye, his-his nede-hedesogo hau henemde motok wat-wat lu o. Allah en his Kristus emin hwedik aʼge nak henebe ʼberlegat henede haʼbuksogo tenhentarok welemak o.