Read Silimo 2 Petrus 2 Bible Online

2 Petrus 2 - Silimo bible

2 Petrus 2

¹Pageat eba re, ap Allah iak moʼgulontogu legesa aʼge enepema ʼgelaʼge takpoluk wegesarik, eniak eseiyat ogu legesa aʼge, Allah eiyagai eneʼgerlak oʼgwe inetil wegesa. Ai ʼgelaʼge, pobuk ap dem wene moʼgulhontogwi aʼge enepema ʼgelaʼge takpoluk wemarik, eniak esei ogu lema aʼge heneʼgerlak oʼgwe en logon enam etil wemayat o. Enam etil wemarik e, wene aphwami enebe wiagabonobogwi wene moʼgulhenta ʼguma ani o. ʼGumarik e, nonue ʼgain Onuk Logo aʼge en is eneminat delnenebiogoluk nonoʼgo ʼbalegei aʼgeat de, is en e, “At e, nis nonue erlak o. Neneperlak,” oluk elabe togu lema ai o. Elabe tumu re, onuʼgwarek en wene perleneat enebam pagathorloluk wiagaphorlouwa o.

²Asogo aʼgeat de, is enede en nasuam eneʼgerli erlagat di wiak yu wiak togwiam, aphwami esan en is enebabut wokho togu lema ai pam, is aphwami logon en, Yesus eʼberlik lagai wene, dem wene ai, obok wiak ua o.

³Is ap Allah iak moʼgulontogwi aʼge ʼgelaʼge nam ema ai enebabut e, “Nis nak woknontouwak,” oluk ogwi aʼge ai en, his en oʼgo wogontouwagoluk, wene onuʼgwarek onogola en ʼgagalogo eniak eseiyat moʼgulhontogu lema ai o. Asogo aʼgeat de, is enebabut togu lema ai pam, at Allah en e, “Is ai wene enebam poluk enebe wiagabenebaik,” oluk pageat ʼburlat ede epesi puk. Aregensogo wolom erlakma en wiagabonobua aʼge oruak o.

⁴Is malaikat Allah en yoʼgo ʼbelagonobou wago aʼge logon wiak tigisema, Allah en ugonobo erlakma en, we, wene pobuk enebam paigoluk e, o hiktakma wiakma eneʼgik herle werak welemagoluk ʼbelebak enebesi ai o.

⁵Ai hegitsogo, aphwami pageat welegesa eria pam welat e, Allah enebit aʼge en enebabut wiak togu legesema Allah en ugonobo erlak. We, ik hettak tagalat waronobuagoluk eneʼbek perakpou wagama warenebiselat, Nuh, aphwami enebabut Allah ogola agai aʼge togu lemagoluk wene moʼgulentasu laga aʼge emin, enebe sabit pam logon emin, delenebegei ai o.

⁶Ye, ai hegitsogoat, aphwami pobuk Allah enebit agalat wiak togu lema aʼge, onogola en e, “Nis nenebabut asogo togu lomul holuk, Allah en uknonobo erlakma en, asogoat watnonobua hegi,” oluk pobi togu lemagoluk, aphwami o Sodom aʼge emin, Gomora aʼge emin, Allah en wene enebam poluk modok perlengsogo odouk pam warenebegei ai o.

⁷Asogo warenebiselat, at Lot nak e, ebabut hegit Allah agai epasu aʼge tisoam e, is aphwami eba aʼge eneʼgerli erlak wiak togu legesa pam, at ogola wiak ago modok oruakma Allah en delenebegei ai o.

⁸Is ai enebabut tu puk aʼge wiak tago oruak en, at Lot ebabut hegit aʼge eneʼgerlakma welat, il entasulat, esaʼgo hweliselat, tagalat e, hwedik-hwadigat ogola wiak ago modok welaga.

⁹Asogoat, aphwami logon Allah agai aʼge togwiam onogola ʼgaluogoluk wagaiam e, nenaik ʼgain Allah Onuk Logo aʼge en delenebiselat, ye, is logon wiak togwi aʼge holuk, wene pobuk enebam paigoluk, tenak welat, asogo tu aluk welat elirat tua o.

¹⁰Is ai logo ʼgelaʼge re, onogola en Allah mi-miarak poluk, di aʼge yu aʼge enede en nasuam wiak til noʼgwi ai, Allah en wene enebam pouwa o. Onogorlok erlaksogo enebam haro en mumlang ogulat, ʼbogorl pam aʼge erligonobogwi welagai aʼge eba, is onogorlok erlagat onobok wiak ʼbalogu lema ai o.

¹¹Is malaikat Allah en yoʼgo ʼbelagonobou wago aʼge ai, enanni modok aʼbik. Di aʼge yu aʼge is en tu elirat aʼgeat de, is ʼbogorl pam erligonobogwi aʼge ai, wene enebam pouwagoluk, nonue ʼgain Onuk Logo aʼge eʼbek wogonoboluk lagalat e, is en onobok wiak ʼbalogwi erlak o. Aʼgeat de, is ap Allah iak moʼgulontogwi aʼge ʼgelaʼge eniak eseiyat ogu lema aʼge ai, enanni modok erlak o. Is en di aʼge yu aʼge tu mia welat e, is ʼbogorl pam erligonobogwi aʼge ai onobok wiak ʼbalogu lema ai o.

¹²Is ap Allah iak moʼgulontogwi aʼge ʼgelaʼge eniak eseiyat moʼgulontogu lema aʼge ai re, wam ede erlak aʼge ebe tenak poluk woruagolugat ebe dagago ai ʼgelaʼge, is ap ai en wene pobirak erlak welat onobok wiak ʼbalogu lema ai pam, onuʼgwarek enebe wam worogwi ai ʼgelaʼgeat Allah en waronobua aiat o.

¹³Is en is logon wiagabonobogu lema ai pam, Allah en oʼgo wiagabonobua ai o. Is e, enede sebelu pukmu en, erligeat wiak tu enagai en togu lema ai o. Enagap op aʼge petne, sip-sip dageselat, yebil dugenebiselat, tiso ai ʼgelaʼge, his seni sakho noʼgwiam, is ai enede sebelu pukmu en, di aʼge yu aʼge enede en nasuam di wiak yu wiak togularat de, heneʼbek ʼgumarik, enemin mesikmu noʼgu lorogup ani o.

¹⁴Is ap ai, enil e, hwami ʼbabi tenonto aʼge nak ʼbeterak welat, enebit ho erlakma en wiak togwi modok welema ai o. Asogo togulat, aphwami Allah iak ʼgerat wik-wok, enede oborlogouk oruak aʼge lalonobogu lema ani o. Enebabut e, “Di aʼge yu aʼge nis nak woknentelep e,” oluk ogu lomogoluk page enat moʼgulegisarik e, ai aʼgeat enaluk welat togu lema ai o. Asogo togu lema ai en, Allah en heman onoboluk wiagabonobua aʼge oruak o.

¹⁵Is ai re, ebela hegitsogo lagai oʼgwe ai ukpoluk e, pageat at Bileam Beor omlogo ebela ʼgwi-ʼgwani laga ai ʼgwe laga lema ai o. At Bileam ede en e, “An wiak tagoam oʼgo woknemak,” oluk ede agai en epesimu,

¹⁶Allah en e, “Hat wiak togun o,” oluk esaʼgo weregei. Wam keledai oʼborl pam huragarik lasumu, wam iak erlak aʼgeat de, at en Bileam moʼguleselat e, “Hat Allah iak moʼgulentasu legen aʼge yu re, modok wiak tigen o,” oluk aphwami eniak pamat wene yagesi ai o.

¹⁷Is ap ai enebabut e, o hebi pam ik elaruk deng oso ai ʼgelaʼge, deng eselat, o hena sogwei en woluk lasu ai ʼgelaʼge, yogunat wogonoboluk lasulat, togu lema o. Allah en is ai o hiktakma eba welemagoluk, enebale heliʼgogo enebesimu oruak o.

¹⁸Aphwami logon enarilak onorokhwi wiak togukhwe re, ugonoboluk liplau womogoluk togumu, enede nasuam pobuk wiak tuagoluk, is ap ai onuʼgwarek erlikhorlogulat, we ʼburlat eniak eseiyat enede ʼgagalogu lema o.

¹⁹Aphwami ʼberlek e, di aʼge yu aʼge anni agalat mabenap pasuam, anni ema aʼge ai eragam aʼge welagai ai en e, is ai, onuʼgwarek enebe wiagabenebiso aʼge ai eragam aʼge welarat de, is aphwami logon moʼgulontogulat, “His nis nenebabut wagup holuk e, pobuk henematekma orogup o,” oluk we ʼburlat moʼgulontogu lema ai o.

²⁰Aphwami re, ʼgwiangma wiak togwi aʼge yema ugonoboluk, hweiye liplau wotluk, nonue ʼgain Onuk Logo aʼge Yesus Kristus en delnenebegei aʼge ebe enaluk agalarat de, pobuk togolik wiak togwi aʼge ai pam ʼgogwiam e, huphep arlegesa pam inaʼge ʼgwisoam eʼgirlogo tenak pasu ai ʼgelaʼge, tenagonoboma re, mabenat ema ai o. Mabenat emarik, naduk wiak welegesa ai re, weiyat op ʼgelaʼge. Aʼge re, pobuk wiak ema ai re, modok lok ʼgelaʼge wiak emarik welema o.

²¹Is ai dem wene hegitsogo motluk lagai ai enaluk om erlakma en wellepma re, op ʼgelaʼge wellep. Aʼgeat de, enaluk omtik, wene Allah en nenesaʼgo weregei wene ai ukpoluk e, ʼgwi-ʼgwani lagai ai en, modok wiak ema o.

²²Is ai, aphwami en eniak lagaksogo disogo oluk ogwi ai ʼgelaʼge togu lema, “Mene en eme lukho poluk, pobuk togolik nai lasu ai o.” [2] Ye, “Wam asu opsogo emerak aʼge pobuk seberlepma sirap wa ʼgwiso ai o,” oluk ogwi ai ʼgelaʼgeat, is asogo demat togu lema ai o.