Read Silimo 2 Petrus 3 Bible Online

2 Petrus 3 - Silimo bible

2 Petrus 3

¹Narilak norokhwi. Henebe nede o. Wene naduk mesik pelal wokho heneʼbek perakpou wegi ai emin, pobuk perakpou wegi ai emin, his wene ebe henaluk aʼgeat de, henede hegitsogo eberogup en, perakpou waga legi ai o.

²Wene ai, is ap pageat Allah en yoʼgo enebesimu at iak moʼgulontogu legesa aʼge en egesayat. Ye, nonue ʼgain Onuk Logo aʼge nenebe delnenebiso aʼge ano en wene nenesaʼgo weregei aʼge, nis yoʼgo nonoboluk heneʼbek peraknonobou wagama moʼgulhentigeat o.

³Wene ebe yu naduk pobi tu o. O ologun pam e, aphwami logon eniak esegen wiak aʼge enede en nasuam onogola en ʼgagalogo wiak togulat, heneʼbek wemarik, eniak esegen yakhontogulat e,

⁴“Honue ʼgain Onuk Logo aʼge en e, An pobuk weik, oluk wene werakhenebesi aʼge ano ebe ʼge waga. Wom erlak oruakhwe nenaiklak arat waregesa aʼgeat de, di aʼge yu aʼge Allah en edam walhesimu welaga hegitsogoat otok modok oruak yema re,” oluk eniak esegen yakhentauma o.

⁵Asogo ogulat, wene yu memerak pogwi. Edamat Allah iak pam ʼbogorl walhesirik e, ʼgwiang ik emin mesikmu laʼgumtak oruakma, ik erabu akhit pei lasulat, orogobu akhit pei lasulat, tegei ai pam ʼgwiang walhesi, oluk wene ai enaluk welarat de, eneperlak-eneperlak ogwi ai o.

⁶Asogo walhesirik e, pobuk ik lok aʼge lekhouwagoluk egeimu, ʼgwiang ai ik ai pamat wiagap pesi ai o.

⁷Aʼge re, ʼbogorl ai emin, ʼgwiang ai emin, pobuk odouk pam wiagap paigoluk Allah iak ai pamat we lodu paget tenak welemarik e, aphwami Allah ebe enebit welat enebabut wiak togwi aʼge ai, wene enebam poluk wiagabenebiselat, ʼbogorl ʼgwiang wiagap tagalat, o agauwa mesik erligeat tigoluk epenen enat eʼgik tenak oruak o.

⁸Aʼge re, narilak norokhwi. Henebe nede o. Wene mesigat nak yu memerak pagup. Nonue ʼgain Onuk Logo aʼge ede epasulat, o agauwa mesigat welege ai re, 1.000 tahun ʼgelaʼge epasu. Ye, 1.000 tahun ai re, o agauwa mesigat welege ai ʼgelaʼgeat epasu. Holuk e, emin hegit nak epasu o.

⁹Is aphwami logon en e, “Nonue ʼgain Onuk Logo aʼge en wene weraknenebesi aʼge ano, ebe wom erlakma en aregen oruak,” oluk opogwi ai re, aregen oruak puk. His henebe ede en, at ede en e, “Is logon nal emano,” oluk aphwami ʼberlegat enebabut wiak togwi aʼge ukpoluk enebabut heberlemagoluk, epenen enat ede opoluk aregen oruak ai o.

¹⁰Asogo oruak aʼgeat de, aphwami wongat oruakhwe di aʼge yu aʼge yogorlia wa ʼgogwi ai ʼgelaʼge, nonue ʼgain Onuk Logo aʼge wema ai, asogoat wema o. Ai erlige, ʼbogorl ebe mesik erligeat sogwei oborlogouk ʼgelaʼge il il erlak agalat, di aʼge yu aʼge ʼbogorl pam welago aʼge edip eminat odouk nasulat, ʼgwiang ebe emin, di aʼge yu aʼge ʼgwiangma welago aʼge emin, ʼberlegat erlak agalat, tua o.

¹¹Di aʼge yu aʼge ʼberlegat asogo erlak ema ai en, his henebabut noʼgosogo togulom epegep. Allah en tua ai erlige ʼbogorl odouk narlik poma re, magale en perlengsogo nasulat, di aʼge yu aʼge edip emin damul-demalsogo nasulat, tua ai en, wiak tu erlakma en degelak welat, henebe Allah paget poluk, at ebe yetharok welat, ebe perlene wemagoluk aʼgoluksogo togu lomup o.

¹³Asogo togulat, nonogola en e, “Allah en wene weraknenebasulat e, ʼBogorl ʼget aʼge heleʼgiselat, ʼgwiang ʼget aʼge heleʼgiselat, tuema eba ʼgoluk hegitsogo nak togu lomul o,” oluk, wene weraknenebesi ano yetharok welege o.

¹⁴Narilak norokhwi. Henebe nede o. Asogo wema oluk, yetharok welat e, wene henebam erlagat, wiak om erlakma enat, Allah emin obat oruakma at ebe hentaumagoluk, at ebaget aʼgoluksogo togu lomup o.

¹⁵Asogo togulat, honogola en e, “Nonue ʼgain Onuk Logo aʼge perlene wom erlakma en epe mosogo oruak ai re, delnenebigoluk epenen enat owan tenentarok oruak,” oluk henede opomup o. At nonue Paulus ebe nenede aʼge ano Allah en ede ʼgagalegeimu wene asogo oluk pelal wokho heneʼbek perakpou waga ai o.

¹⁶At en wene nin hwedik nan hwedigat pelal wokho heneʼbek perakpou wagalat, wene ai aʼge paget oso modogat welago yo. Aʼge re, wene at en pelal wokho heneʼbek perakpou wago aʼge ai re, wene logon pobi tu mia ʼgelaʼge oruak o. Oruakma re, is logon enede ʼbiren oborlogouk oruak aʼge en, wene ai eneperlak welat, wene Allah en egeimu Paulus en pelal wasu aʼge ai emin, is logon en pelal wegesa aʼge ai emin, wene hegirat oruak aʼgeat de, hebeksogo wiagap pogwi ai o. Wene hebeksogo wiagap pogulat, onuʼgwarek enat enebe wiagap pagathorlogwi ai o.

¹⁷Narilak norokhwi. Henebe nede o. Wene ai owan om erlak oruakhwe, henaluksogo wolorogup en seʼgeksogo moʼgulhentegis ai o. Henaluk welat, honuʼgwarek en henede hurlesogoat wolomup o. Is aphwami logon enesaʼgo werak erlak welat togwi aʼge ai en, wene wiak wene moʼgulhontogulat e, his en e, “Demat,” oluk epegeptik henede hurle welegep aʼge ai ʼgoboksogo ukpogwiam henebe nalorogupno oluk, henebabut heberlogo wolomup o.

¹⁸Nonue ʼgain Onuk Logo aʼge delnenebiso aʼge ebabut op ano en woknentasu aʼge ai wogulat, ebe henaluk agalat, togulat e, henede hurle oroguptik wolomup o. Yogodak ya emin, pobuk emin, at Yesus Kristus emategat erliktogwi modok wolomok o, oluk “Amin,” egi ai o.