Read Silimo 1 Yohanes 1 Bible Online

1 Yohanes 1 - Silimo bible

1 Yohanes 1

¹Wene pelal wokho heneʼbek perakpou wege ai ebe re, dem wene nenelalugapnenebiso aʼge naduk edipmu en welago ano aʼge. Wene ai, nis arat nenesaʼgo hologulat, nenil domok hogulat, yetharok welat, neneʼgik tenhogulat, tige aʼge anoat o.

²Ye, at elaluk modok welago aʼge ai, ebe aik emin elaluk modok welagarik en, aik en nis nenil houwagoluk selakma pesimu nenil hegerik enat obok moʼgulhontogu lege o.

³Ebe nis nenil hogulat, nenesaʼgo hologulat, tige aʼge ai, nenaik Allah omlogo Yesus Kristus eʼbirek emin hwedik welege ai ʼgelaʼge, his nis nenemin opsogo hwedik wolomogoluk moʼgulhontogu lege o.

⁴Ye, wene yu paget nonogola nenagai hogu lege aʼge ai, pobuk nonogola loksogo demat nenagai houwogoluk pelal wokho heneʼbek perakpou wege ai o.

⁵Allah omlogo en moʼgulnentasulat e, “Allah ebe re, o dakharak aiatma re, at ebam o hiktak modok welago erlak o,” oluk moʼgulnentesi aʼge, nis nenesaʼgo arat hwelige aʼge moʼgulhontogu lege ai o.

⁶Ye, nis e, neniak pam en, “At emin hwedik welege,” oluk ogularat de, o hiktakma welat enebabut togwi aʼge ai ʼgelaʼge togu lege holuk e, demat aʼge togu lege erlak, we, neniak eseiyat ogu lege o.

⁷Asogo aʼgeat de, Allah ebe o dakharakma welago ai ʼgelaʼge, nis ogo re, o dakharakma welat, op togu lege holuk nis-nis nare-hare nenemin hwedik oruakma, nis wiak togwiam at omlogo Yesus emep pam honenebiso modok welago yo.

⁸Asogo aʼgeat de, nis en ogulat e, “Nis wiak logon tu erlak,” oluk ogu lege holuk e, neniak eseiyat nonuʼgwarek lalogu lege ai en, dem wene nonogola modok erlak o.

⁹Aʼge re, nis wiak togwi aʼge ʼbaksogo ukpul holuk, at Allah ebabut hegit modok welat, wene weraknenebasu ʼgelaʼgeat tisoma re, nis wiak togu lege aʼge erlagapsogo ukpoluk, wiak tuogoluk nenede ʼgagalogwi aʼge emetnenebiso yo.

¹⁰Asogo aʼgeat de, nis en e, “Wiak mesik tu erlak welege,” oluk ogu lege holuk e, nis en e, “Allah iak esei oso,” oluk u ʼgelaʼgeat ogu lege ai en, Allah iak nis nonogola modok erlak o.