Read Silimo 1 Yohanes 2 Bible Online

1 Yohanes 2 - Silimo bible

1 Yohanes 2

¹Ye, neiyagai o. His wiak togu lorogupno oluk, wene yu pelal wokho heneʼbek perakpou wegi o. Asogo aʼgeat de, sa en wiak tiso holuk, nenaik Allah oruakma nis letnentasu aʼge ap mesik ʼburl heirakma oruak o. At ai ebe Yesus Kristus ebabut hegitsogo tiso aʼge anoat o.

²At ebe asogo welat, nis di wiak yu wiak togu lege aʼge erlagapsogo ukpoluk, honenebiso yo. Asogo tiso ai re, nis wiak togu lege aʼge paget nak puk. At e, di aphwami yu aphwami ʼgwiangma aʼge ʼberlegat wiak togwi aʼge paget eneminat honenebiso yo.

³Wene Allah en nenesaʼgo weriso wene ai, hwelakpoluk hegitsogo togu lege holuk e, at ebe nenaluk o, oluk ai pam en nenede weʼgerlogo pobi togu lege o.

⁴Aʼge re, sa en, “An e, Allah ebe naluk,” oluk eselarat de, at en wene nenesaʼgo weriso wene ai hwelakpoluk hegitsogo tago erlak holuk e, at iak eseiyat oso ai o. Holuk e, dem wene ai ogola modok erlak o.

⁵Asogo aʼgeat de, sa en Allah iak hwelakpoluk hegitsogo tiso holuk e, di aʼge yu aʼge ʼgaroksogo togwi ai ʼgelaʼge, at ai Allah modok edesogo welago yo. Ye, nis asogoat welege holuk, nis Allah emin hwedik welege o, oluk ai pamat nenede weʼgerlogo pobi togu lege o.

⁶Ye, sa en, “An Allah emin hwedik welegi o,” oluk oso holuk e, ebabut at Kristus taga laga ai ʼgelaʼgeat tagalom o.

⁷Narilak norokhwi. Henebe nede o. Wene ʼget aʼge henesaʼgo wusogo pelal wokho heneʼbek perakpou wegi puk. We, pageat Allah en henesaʼgo wusogo moʼgulhentesimu edip pam enat tenak welegep aʼge o. Wene ai re, at Allah en pageat henesaʼgo weregeimu hweligep aʼge anoat o.

⁸Asogo aʼgeat de, o hiktak oruakma dakha etil lasu ai ʼgelaʼge, o dakharak demat aʼge dakharak nonobou wagama mo yeriso ai en e, wene ʼget aʼge henesaʼgo wusogo heneʼbek perakpou wegi ai o. At Yesus en wene ai hegitsogo tisoam demat aga ai ʼgelaʼgeat, his en ogo re, asogoat, wene ai hegitsogo togwiam, demat ago ai o.

⁹Ye, ap sa en, “An nebe o dakharakma welegi,” oluk eselarat de, arilak orokhwi modok ebit holuk e, o page en ʼbekhit yogodak ya, at ebe o hiktakma oruak o.

¹⁰Asogo aʼgeat de, ap sa en arilak orokhwi edesogo welago holuk e, at ebe modok o dakharakma welat, aphwami en is logon wathorlouwagoluk enepenen en ebelaʼgwe ʼbalogwi ai ʼgelaʼge, is logon wiak tuagoluk lalenebiso erlak o.

¹¹Asogo aʼgeat de, ap sa en arilak orokhwi modok ebit welago holuk e, at ebe o hiktakma oruak o. Asogo oruakma, o hiktak aʼge en il hopnik pesimu ebe o hiktak oʼgwe neselat, “ʼGeba lasu legi ʼgelaʼgeat,” eperlagat ebagase ʼbelak oruak o.

¹²Neiyagai o. Wiak togu legep aʼge Allah en omlogo Kristus tegei ano pam erlagapsogo ukpesi ai en, an en pelal wokho heneʼbek perakpou wegi o.

¹³Naiklak o. At naduk edipmu en welago aʼge ano ebe henaluk egeptik welegep ai en e, pelal wokho heneʼbek perakpou wegi o. Ye, ap souwe aʼge nosi o. His en at ebabut wiak aʼge ano arat mabenap pegeptik welegep ai en, pelal wokho heneʼbek perakpou wegi o.

¹⁴Malik wei aʼge neiyagai o. Nenaik Allah henaluk egeptik welegep ai en, pelal wokho heneʼbek perakpou wagalat, his naiklak, at naduk edip pam en welago aʼge ano ebe henaluk egeptik welegep ai en pelal wokho heneʼbek perakpou wagalat, his ap souwe aʼge nosi, his henanni oruakma Allah iak honogola oruakma re, at ebabut wiak aʼge arat mabenap pegep ai en, pelal wokho heneʼbek perakpou wagalat, tegis ai o.

¹⁵Aʼge re, aphwami ʼgwiangma aʼge enebabut togwi aʼge ai emin, di aʼge yu aʼge ʼgwiangma welago aʼge ai emin, henede hwedik wolom modok erlak o. Ap sa en is aphwami ʼgwiangma aʼge enebabut togwi aʼge ai, ede hwedik welago holuk e, nenaik Allah ede hwedik welago modok erlak o.

¹⁶Ye, aphwami ʼgwiangma aʼge enebabut togwi re, enebam aganhan agalat, di aʼge yu aʼge enil en holuk nenagai opogulat, ʼgwiangma aʼge paget erliktogulat, togwi ai ʼberlek e, edip nenaik Allah puk. Edip e, ʼgwiangmayat o.

¹⁷Aphwami ʼgwiangma aʼge enebabut togwi ai emin, di aʼge yu aʼge nenagai oluk togwi ai emin, erlak etil wago aʼgeat de, aphwami Allah ogola agai epasu aʼge togwi aʼge ai nak e, enelaluk modok welema o.

¹⁸Neiyagai o. O yogodak e, ologun hwerli pam welege o. Aphwami logon en e, “Pobuk ap logon Kristus emin modok il ʼbelak aʼge wema o,” oluk moʼgulhentigisema, henesaʼgo hweligep ai ʼgelaʼge, o yogodak e, Kristus emin il ʼbelak aʼge enebe aʼbik arat enam egesarik oruak ai en e, nis en, “O yogodak demat ologun hwerli pam welege,” oluk nenede weʼgerlogulat pobi togu lege o.

¹⁹Is aphwami ai enebe re, nis ʼbelak aʼgeat de, is enebe demat nis oruak oʼgwe aʼge erlak o. Is enebe demat nis oruak oʼgwe wellepma re, enebe nis nenemin modogat wollo yo. Aʼge re, Allah ede en e, “Is ai, enebe ʼberlegat his aʼge erlak, mu aʼge oruak, oluk, enagat emak,” oluk epesi ano pam is asogo libegesa ai o.

²⁰Asogo aʼgeat de, his nak e, Yesus Kristus Allah en uʼgwarek pagathwerlesi aʼge ano en, Allah Arogun wokhentesimu dem wene henebe ʼberlegat henaluk egeptik welegep o.

²¹An en wene pelal wokho heneʼbek perakpou wegi ai re, dem wene heneperlak en puk. Henaluk welegep ai enat perakpou wegi o. Ye, eniak esei ogwi ai edip e, Allah demat aʼge en puk. Edip muat, oluk henalugat o.

²²At iak esei oso aʼge ai ebe sa epegep. At ai en, “Yesus ebe re, Kristus erlak o,” oluk heʼberlogo ukpasu aʼge ai erlak no? Aiat o. At Kristus emin modok il ʼbelak aʼge ebe re, nenaik Allah omlogo Yesus eʼbirek enebe heʼberlogo ugenebasu aʼge aiat o.

²³Ap sa en, “Allah omlogo ai, ebe nebit,” oluk heʼberlogo ukpasu holuk e, aik Allah ebe wo erlagat o. Ye, sa en, “Allah omlogo ebe aiat o,” oluk iak ʼbaksogo oso holuk, aik Allah ebe wesiat o.

²⁴Ye, his e, wene nadugat henesaʼgo hweligep aʼge ai, honogola waguptik e, eberak modogat wolomup o. Asogo wolorogup holuk e, henebe nenaik Allah omlogo Yesus eʼbirek emin hwedik wolorogup o.

²⁵Ye, at uʼgwarek en, “Wokhentaik,” oluk obok moʼgulnentesi ano re, nenebe noburlal-hoburlal taknenebaigoluk egei o.

²⁶Wene yu ʼberlek e, is aphwami his lalhonobuogoluk walhogwi aʼge paget pelal wokho heneʼbek perakpou wegi ai o.

²⁷At Kristus en Allah Arogun wokhentesimu honogola welat, di aʼge yu aʼge paget, iak esei moʼgulhonto erlak, demat nak moʼgulhentasu ai en e, aphwami logon en wene his moʼgulhonto mia o. Wene at Allah en moʼgulhentasu aʼge ai hegitsogoat togulat, Kristus emin hwedik modogat wolomup o.

²⁸Neiyagai o. Kristus wema ai erlige ebe wagoam e, nis neneʼgerli om erlakma en, nonogorlok erlaksogoat, at orogolema eragam ʼguogoluk, his at emin hwedik modok wolomup o.

²⁹At Kristus Allah omlogo ebabut op hegitsogo nak tago aʼge ano henaluk holuk e, his honogola en e, “Is aphwami logon enebabut op hegitsogo togwi aʼge enebe loʼbok Allah eiyagai pobuk dagenebegeimu oruak,” oluk henaluk emagat o.