Read Silimo 1 Yohanes 3 Bible Online

1 Yohanes 3 - Silimo bible

1 Yohanes 3

¹At Allah en e, “Is yu an neiyagai,” oluk daknenebegeimu demat nis nenebe at eiyagai welege. Asogo welege ai en, nenebe at ede modok welago ai hemit! Asogo aʼgeat de, is aphwami ʼgwiangma aʼge enebabut onotok aʼge ebano en Allah ebe eneperlak ai en e, nis nenebe eneperlagat o.

²Narilak norokhwi, nede o. Yogodak nis nenebe Allah eiyagai welege aʼgeat de, pobuk nenebe wolomul aʼge selakma po erlakma en owan hisogo oruak o. Asogo aʼgeat de, nis nenaluk e, Yesus ebe yogodak oruak aʼge nenil dokhumsogo hul ai en, at wema ai erlige ebe wagoam, nis nenebe at ebe oruak ai ʼgelaʼgeat omul o.

³Nis nonogola en, “Asogo omul o,” oluk, ebam eberak welege aʼge nenebe loʼbok en, at Kristus uʼgwarek degelak welago ai ʼgelaʼge, nis asogoat degelhorlogulom o.

⁴Ye, aphwami en wiak togwi ai Allah iagat sagalogwi ai en e, ap sa en wiak tiso holuk, Allah iagat sagalogo tiso yo.

⁵At Kristus uʼgwarek wiak tu erlak welat, nis wiak togu lege aʼge erlagapsogo ukpaigoluk, ebe selakmasogo waga ai henaluk o.

⁶Ai enat, nis at emin hwedik modok welege aʼge, nenebe loʼbok wiak togwi modok welege erlak o. Aʼge re, is aphwami logon wiak nak togwi modok welagai aʼge enebe loʼgok e, at ebe enil ho erlak eneperlagat oruak o.

⁷Neiyagai o. Is aphwami logon en lalhonobuano oluk henebabut heberlogo wolomup o. Sa en ebabut hegitsogo tago holuk e, at Kristus ebabut hegitsogo tago ai ʼgelaʼgeat, tago oruak o.

⁸Ye, at ap mesik en ebabut wiak tago modok welago holuk e, at Iblis ebabut edip pam enat wiak tagoma no oluk e, at ai ebe re, Iblis en aʼge oruak o. Aʼge re, at Allah omlogo selakmasogo waga ai re, at Iblis ebabut tiso aʼge ai, modok erlagap paigoluk waga o.

⁹Ye, aphwami Allah en dagenebiso aʼge enebe loʼbok, at ebabut wik-wok togwi ai en, wiak togwi modok welema erlak o. Enebe Allah eiyagai welat wiak togwi modok welagai erlak o.

¹⁰Allah eiyagai emin, Iblis eiyagai emin, nenede weʼgerlogo enebabut enagat agai ai, yuat. Sa en ebabut hegitsogo tu erlakma en, arilak orokhwi edeabenebasu erlakma en, tago holuk e, at ai ebe Allah omlogo erlak o.

¹¹Wene Allah en e, “His-his nede-hedesogo wolomup o,” oluk moʼgulnentesi aʼge, aphwami logon en moʼgulhentigisema edipmu en henesaʼgo hweligep aiat o.

¹²Nis en e, at ap Kain ebe Iblis ebabut wiak aʼge ai omlogo agarik uʼgwarek ot aʼge weregei ai ʼgelaʼge togup no yo. At en ot weregei ai re, nopaget weregei no. At taga laga aʼge ai modok wiak, ye, ot taga laga aʼge nak e, hegit modok, ai en weregei o.

¹³Holuk e, narilak norokhwi o. Aphwami ʼgwiangma aʼge en, his enebit modok takhonobogwi holuk e, “Nogorlok e,” oluk henede porogup o.

¹⁴Allah en nenebe waragaimu eba en woknonoboluk, enelaluk welagaimu nenebesimu welege oluk, nis-nis nenarilak nonorokhwi enemin nede-hedesogo welege ai en pobi togu lege o. Holuk e, sa en aphwami ado edesogo tu erlakma en, ebit welago aʼge ai ebe waragaimu ebayat oruak o.

¹⁵Enarilak onorokhwi deʼgelak onobogwi aʼge ai, is enebe loʼbok e, ap ware aʼgeat o. Ye, is aphwami ap ware aʼge ai, enebe loʼbok noburlal-hoburlal eiye om erlak modok oruak, oluk nenaluk o.

¹⁶At Kristus en naduk nis edeapnenebegeitik, ebe nis nenebaget waraga ai en, nis en is aphwami logon enedeabonobogwi wene ai, pobi togu lege. Pobi togulat, at tegei ai ʼgelaʼge, nis nenarilak nonorokhwi enebe nenede en, nenebe is enebaget warom obat o.

¹⁷Aʼge re, sa en at aʼge di aʼge yu aʼge ʼgwiangma aʼge poluk welat, are erei mesik di aʼge yu aʼge erlagaik oruakma il hasularat de, mesik wogoum erlakma en, ede ʼbete hasu holuk e, at ai ebabut e, Allah en edeapnenebiso aʼge ai ʼgelaʼge oruak epegep? Modok erlak o.

¹⁸Holuk e, neiyagai o. Nis en aphwami logon nenedeabonobogwi erlak welarat de, neniak pam en nak, “Nenedeabonobogu lomok o,” oluk ogulom mia o. At e, enebe nenedeabonoboluk, neneʼgik pam en demat lerontogu lomul o.

¹⁹Nis en nenebabut asogo togulat, nonogola en e, “Nis nenebe Allah demat aʼge eiyagai welege o,” oluk pobi tu o. Asogo pobi togulat, nis wiak tige, oluk nenede eʼgin wolomul holuk, nis nenebe mia aʼge re, at Allah nak e, ebe lok welat, di wene yu wene ʼberlegat aluk nak welago, oluk, at ilem nenede se welat nonogorlok erlaksogoat wolom o.

²¹Holuk e, narilak norokhwi. Henebe nede o. Nis nonogola en, “An wiak mesik tegis,” oluk wenemennei eberak erlak, nenede se welege holuk e, at orogolema nonogorlok erlaksogoat welat,

²²at en wene nenesaʼgo weregei wene ano hegitsogo togulat, at ilem ede opsogo nak togulat, togu lege ai en, nis di aʼge yu aʼge ʼgonu ogwiam, at en woknentasu ai o.

²³At en wene nenesaʼgo weregei ai, ebe re, “His henede an nomlogo Yesus Kristus ebam heʼberik poluk, at en moʼgulhentesi ai ʼgelaʼgeat, his-his nede-hedesogo wolomup o,” oluk nenesaʼgo weregei aiat o.

²⁴Nis Allah en wene nenesaʼgo weregei wene ai hwelakpoluk hegitsogo togu lege holuk e, at Arogun woknentesimu nonogola oruak, ai pam, nis at emin hwedik, ye, at nis nenemin hwedik welege, oluk pobi togu lege.