Read Silimo 1 Yohanes 4 Bible Online

1 Yohanes 4 - Silimo bible

1 Yohanes 4

¹Narilak norokhwi. Nede o. Aphwami enebe aʼbik en e, “Nis en Allah iak moʼgulhontogu lege,” oluk eniak esei ogwi aʼge enebe arat selakma egesarik, o di owi yu owi noʼgwi ai en e, logon heneʼbek wemarik, wene moʼgulhontogwiam, his en e, “Allah Arogun ogola welat moʼgulnentasu,” oluk henede enebam heʼberik pagup o. At e, “Demat Allah Arogun ogola welat oso a? Mu aʼge ogola welat moʼgulnentasu a,” oluk enebabut naduk ʼbelakpoluk en, enebe pobirak onobogu lomup o.

²His en e, “At ai Allah Arogun aʼge ogola oruak a? Mu aʼge a,” oluk enebabut naduk ʼbalogulom ai re, disogo. Is logon wemarik e, “At Yesus Kristus ai, Allah en perakpou wagama demat abat daklau waga,” oluk ʼbaksogo ogwi aʼge en ogwi holuk e, his en e, “Is ai Allah Arogun onogola welat ogwi,” oluk, pobirak onobogulomat o.

³Asogo aʼgeat de, is logon en Yesus paget wene asogo ʼbaksogo ogwi erlak aʼge en ogwi holuk e, his en e, “Is ai onogola Allah Arogun oruak puk. Mu aʼgeat oruak o,” oluk pobirak onobogulomat o. Is ai enebaget wene Allah en pageat moʼgulnentasulat, “At mesik Kristus emin modok il ʼbelak aʼge wema ani o,” oluk moʼgulnentesi aʼge, henesaʼgo hweligep ano, yogodak ʼgwiangma yema enebe arat enam egesarik oruak aiat o.

⁴Aʼge re, neiyagai o. Is aphwami ʼgwiangma aʼge onogola welago aʼge ai anni erlak aʼgeat de, his nak e, henebe Allah eiyagai aʼgeatma re, at Arogun anni modok aʼbik aʼge honogola oruak ai en e, is ap ai mabenabonoboluk welegep ai o.

⁵Is ai enebe aphwami ʼgwiangma aʼge eneiyagaiatma no oluk e, is en wene ʼgwiangma wene ogwiam, eniak is aphwami ʼgwiangma aʼge logon en enesaʼgo hologwi ai o.

⁶Aʼge re, nis e, nenebe Allah eiyagai aʼge welat neniak ogwiam, is logon Allah ebe enaluk aʼge holuk, enesaʼgo hologulat, ye, is logon enebe Allah eiyagai aʼge puk, we mu aʼge holuk e, enesaʼgo holu erlakma en ukpogulat, togwi ai o. Asogo togwiam nis en e, “Allah demat aʼge Arogun is ai onogola oruak, ye, is logon eba muʼgat lalenebiso aʼge onogola oruak,” oluk enagat pobirak onobogu lege ai o.

⁷Narilak norokhwi henebe nede o. Aphwami logon enedeabonobogwi ai edip, at Allah at ai en e, nis-nis nede-hedesogo wolomok o. Aphwami nede-hedesogo wolomul aʼge, enebe loʼbok Allah en dagenebegeimu, at eiyagai welat, at ebe enalugat oruak o.

⁸Ye, at Allah ebabut e, nis edeapnenebiso modok welago ai en, sa en nede-hedesogo welema erlak holuk e, at ai en Allah ebe eperlak oruak o.

⁹Aʼge re, Allah en, “His henebe nede welegi o,” oluk ʼbaksogo selakmayat paigoluk, omlogo mesigat dogo ano en, nenelalugapnonobuagoluk ʼgwiangma ʼbelakpou waga ai o.

¹⁰Is logon enedeabonobogwi ai ebe re, nis en Allah nenedeap pege puk. Erlak o. We, at Allah en nis edeapnenebegeitik, at en nis wiak togu lege aʼge erlagapsogo ukpoluk hononobuagoluk, omlogo neneʼbek ʼbelakpou waga ai.

¹¹Narilak norokhwi henebe nede o. At Allah en nis asogo edeapnenebegei ai en, nis ogo re, nis-nis nede-hedesogo wolomok o.

¹²Ye, Allah ebe ai re, aphwami logon en enil modok ho erlak. Aʼgeat de, nis-nis nede-hedesogo wolomul holuk e, Allah emin hwedik modok wolomul o. Asogo oruakma, naduk Allah en edeapnenebiselat, ede epesi ai hegitsogoat, di aʼge yu aʼge opsogo ologun ʼbalogo togwi ai ʼgelaʼge, nis-nis nede-hedesogo welemagoluk ologun ʼbelaknenebasu ai o.

¹³Allah en Arogun woknentesi ai pam, nis en opogulat e, “At nis nenemin hwedik oruak. Ye, nis at emin hwedik welege,” oluk pobi togu lege o.

¹⁴Nis en e, “Allah en omlogo nenil hogu lege aʼge ai en, nis aphwami ʼgwiangma aʼge delnonobuagoluk perakpou wagama,” oluk obok ʼbaksogo moʼgulhontogu lege o.

¹⁵Ye, ap sa en, “Yesus ai Allah omlogo,” oluk ʼbaksogo moʼgulentasu holuk, at Allah en at emin hwedik modok, ye, at en Allah emin hwedik modok, welagai o.

¹⁶Nis en e, “Allah en edeapnenebiso ai pobirak pegerik e, demat,” oluk opogu lege o. At ebabut e, edeapnenebiso modok welago ai en, sa en ebabut e, aphwami edeabenebiso modogat welago holuk e, Allah en at emin hwedik modok, ye, at en Allah emin hwedik modok, welagai o.

¹⁷At Kristus welago ai ʼgelaʼge, nis ʼgwiangma asogoat welege ai en, pobuk Allah en nis nenemdema wokho wene nenebam pasulat, noʼgorliselat, tua ai erlige neneʼgerli erlaksogo wolomul ani o. Neneʼgerli erlaksogo welemagoluk e, naduk Allah en edeapnenebiselat, ede epesi ai ʼgelaʼgeat, di aʼge yu aʼge opsogo ologun ʼbalogo tiso ai ʼgelaʼge, nis-nis nede-hedesogo welemagoluk ologun ʼbalogo taknenebasu ai o.

¹⁸Aphwami logon en is logon enemin nede-hedesogo welat, onogorlok erlaksogo welagai ai en, di aʼge yu aʼge ologun ʼbalogo togwi ai ʼgelaʼge, nis-his nede-hedesogo togu lege aʼge ai modok ologun ʼbalagalat e, nenebabut nonogorlok aʼge ai erlak ago yo. Aʼge re, is aphwami logon enebabut onogorlok aʼge ai, enede en e, “Eige! Pobuk Allah en wene nenebam pouwa hwi a,” oluk enebabut yuktak welagai ai. Asogo welagai ai en, nede-hedesogo togwi aʼge ai enede opsogo ologun ʼbalogo togwi modok erlak o.

¹⁹Page enat Allah en naduk edeapnenebegeimu re, nis ogo re, nis-nis nede-hedesogo wolomok o.

²⁰Asogo aʼgeat de, aphwami en enarilak onorokhwi enil ontogwi aʼge enede erlak welarat de, Allah enil hogwi erlak aʼge enede wolom epegep? Mia o. Holuk e, at mesik arilak orokhwi deʼgelak ebasu aʼge en, “An Allah nede o,” oluk oso holuk e, iak eseiyat oso yo.

²¹Ai en, at Kristus en nenesaʼgo weriselat, “Allah henedesogo welat, henarilak honorokhwi henedesogoat wolomup o,” oluk moʼgulnentesi ai o.