Read Silimo 1 Yohanes 5 Bible Online

1 Yohanes 5 - Silimo bible

1 Yohanes 5

¹Aphwami en e, “Yesus ai Allah en yoʼgo poluk perakpou waga aʼge demat Kristus anoat o,” oluk enede at ebam heʼberik pogwi aʼge nak enebe loʼbok e, Allah en dagenebegeimu, at eiyagai oruak o. Ye, nis nenaik Allah nenedesogo welat holuk e, at eiyagai dogo aʼge ai nenedesogo wolom o.

²Asogo wolom oluk, pobirak poluk e, Allah ebe nenedesogo welat, wene at en nenesaʼgo weregei wene ai hwelakpoluk hegitsogo togulat, at eiyagai dagenebegei aʼge ai nenedesogo wolomat o.

³Nis Allah en daknenebegei aʼge nak nenebe loʼbok en e, “Allah iak ai demat,” oluk nenede at ebam heʼberik pogu lege ai pam, is aphwami ʼgwiangma aʼge enebabut onotogat welat wiak togwi aʼge ai mabenap poluk nenanni aga lege ai o. Asogo mabenap poluk nenanni aga lege ai en, wene Allah en nenesaʼgo weregei aʼge ai eʼgin erlak, selangtak o. Ai en e, nis en, “Allah ebe nenede welege,” oluk u ʼgelaʼge re, at en wene nenesaʼgo weregei wene ai hwelakpoluk hegitsogo togu lomok o.

⁵Aphwami enebabut onotogat welat wiak togwi aʼge mabenap poluk enanni agai ai salak en no? Ai re, nis en, “Yesus ai Allah omlogo,” oluk nenede at ebam heʼberik pogu lege aʼge nak enat o.

⁶At Yesus Kristus ʼgwiangma ʼbu agarik oruakma ik olomu nak ʼbelabigisa puk o. Ik olomu ʼbelabogulat, emep namogo worogulat, tigisa o. Asogo tigisa oluk, at Allah Arogun wene demat nak moʼgulnentasu aʼge ano en ʼbaksogo moʼgulnentasu welago yo.

⁷Yesus ai Kristus at o, oluk, aphwami enebe henagan en eniak mesigat aʼge ʼbaksogo u ʼgelaʼge re, Allah Arogun en ʼbaktagalat, Yesus ebe ik olomu ʼbelabigisa ai pam ʼbageselat, emep namogo werigisa ai pam ʼbageselat, ʼbaksogo selakma aga ai o.

⁹Wene aphwami en ʼbaksogo moʼgulnontogwiam, “Demat,” oluk pobi togu lege ai mia o. Asogo aʼgeat de, at Allah ebe omlogo obok ʼbaksogo moʼgulnentesi ai nak e, “Modok demat,” oluk pobi tuat o.

¹⁰Aphwami enede Allah omlogo pam heʼberik pogwi ano nak en e, “Wene ai demat o,” oluk onogola en pobi togwi. Asogo aʼgeat de, aphwami logon enede Allah pam heʼberik pogwi erlak aʼge nak e, “Wene Allah uʼgwarek en omlogo paget obok egei aʼge ai demat,” oluk opo erlakma en welat, Allah iak esei oso aʼge ʼgelaʼge takpogwi o.

¹¹At Allah en omlogo paget wene ʼbaksogo moʼgulnentasulat e, “Enebe enelaluk modok welagai ai, edip e, an nomlogoatma re, an en Yesus ebe wokhentasulat, noburlal-hoburlal demat aʼge wokhentegis ai o,” oluk moʼgulnentesi.

¹²Aphwami en Allah omlogo ebe wogwi holuk e, noburlal-hoburlal wik-wok eiye egesarik oruak o. Aʼge re, is logon en Allah omlogo ebe wo erlak holuk e, noburlal-hoburlal wo erlakma en eiye om erlagat oruak o.

¹³His henede Allah omlogo pam heʼberik welegep aʼge nak honogola en e, “Noburlal-hoburlal eiye egerik welege,” oluk, henaluk orogup en, wene ʼberlegat yu pelal wokho heneʼbek perakpou wegi o.

¹⁴Ye, nis di aʼge yu aʼge Allah ogola agai epasu aʼge hegitsogo, at en woknontouwagoluk ʼgonu moʼgulogwiam neniak esaʼgo hwelisoat ai o, oluk pobirak poluk, at ilem nonogorlok erlaksogoat ʼgonu moʼgulogulom o.

¹⁵Ai en e, nis en, “We, noʼgwe aʼge Allah ʼgonu moʼgulogwiam, at en neniak esaʼgo hweliso ai,” nenaluk holuk e, “Nis di aʼge yu aʼge ʼgonu moʼgulige ano arat woknentesimu eiye egerik welege,” oluk nenaluk o.

¹⁶Is aphwami logon modok wiak togulomtik e, enebabut pam enebe modok-modok warema aʼge oruak ai paget, his en Allah yoʼgo po yo, oluk moʼgulhentegis erlak o. At e, enebabut hegitsogo tu aʼge oruakhweat de, di-dagan aʼge wiak togwi ai ʼberlegat onuk wiak aʼgeat de, is logon en wiak togumu enebabut pam enebe modok-modok warom puk aʼge togwi aʼge oruagat o. Aʼge re, his Allah eiyagai aʼge henarilak honorokhwi mesik wiak tagoma ebabut pam ebe modok-modok warom puk aʼge tiso holuk, at ebaget Allah yoʼgo poma, at en noburlal-hoburlal demat aʼge wogema oruak o.

¹⁸Nis Allah eiyagai daknenebegei aʼge at omlogo naduk deregei aʼge ano en tennentarok oruakma, at ebabut wiak aʼge ano en eʼgik tennontouwa erlak o. Holuk e, nis wiak hwedik modok togulom mia, oluk nenaluk o.

¹⁹Is aphwami ʼgwiangma aʼge enebabut onotok aʼge ai ʼberlek e, at ebabut wiak aʼge ano eʼgik pam welagai o. Asogo aʼgeat de, nis nak e, demat Allah eiyagai aʼge welege o, oluk nenaluk o.

²⁰At Allah omlogo neneʼbek ʼbu agarik, Allah demat aʼge nenaluk emagoluk nenede ʼgagalogo moʼgulnentesi. Asogo moʼgulnentesimu, nis e, Allah demat aʼge omlogo Yesus Kristus eʼbirek emin hwedik modok welege o. Ye, at Yesus e, ebe Allah demat aʼge welat noburlal-hoburlal edip arat welago yo.

²¹Holuk neiyagai o. At demat aʼge welago ai ukpoluk, dogwi asua pam heʼberik welat wiak togwi ai ʼgelaʼge, togupno oluk e, ogoiye togulat, henebabut heberlogo wolomup o.