Read Silimo 2 Yohanes 1 Bible Online

2 Yohanes 1 - Silimo bible

2 Yohanes 1

¹An en, Allah eiyagai tenhentarok welemagoluk, at en ediknebesi aʼge honue ano en, his Allah eiyagai dakhenebegei aʼge nak henebe re, hwe mesigat aʼge ebe Allah en polik pesi aʼge emalik enemin ʼgelaʼgeatma re, wene yu hau wusogo pelal wokho heneʼbek perakpou wegi ai o. Henebe demat nede o. An nematek nak en henebe nede welegi puk. We, is logon enemin dem wene yogodak nonogola wolomtik pobuk modok-modogat welema aʼge ai wegesarik enaluk egesa aʼge en enedeaphenebegesayat o.

³Ai en, narilak norokhwi. Nis dem wene wik-wok, nis-nis nede-hedesogo oruakma, nenaik Allah omlogo Yesus Kristus eʼbirek enebabut op ano en op aʼge woknontogulat, enedeapnonobogulat, nenede haʼbugapnonobogulat, togu lemak o.

⁴His henebe re, hwe mesigat aʼge emalik ʼgelaʼge welat, henebe logon nenaik Allah en dem wene nenesaʼgo weregei ano hegitsogoat togu legep aʼge henebabut ʼbalegistik, nogola nagai aʼbik hasu legi o.

⁵Ai en e, nerei o. Wene ʼget aʼge pelal wokho hemalik enemin oruakma heneʼbek perakpou wegi puk. Erlak o. We, page nis dem wene ai nenesaʼgo hwelak oruakma, at Allah en nis-nis nede-hedesogo welemagoluk edipmu enat nenesaʼgo weregeimu nenaluk aʼge ano pelal wokho heneʼbek perakpou wegi ai o.

⁶Nis-nis nede-hedesogo wolom ai ebe re, wene Allah en nenesaʼgo weregei wene ano hegitsogo togulom aiat o. Wene nenesaʼgo weregei ai re, ebe yu, “His-his nede-hedesogo togu lomup,” oluk edipmu en nenesaʼgo weregeimu hwelige ai ʼgelaʼgeat togulom o.

⁷Asogo togulom ai re, is aphwami enebe aʼbik en, “Yesus Kristus ai abat daklau wom erlak,” oluk, lalonobogwi aʼge enebe selakma egesarik ʼgwiangma o di owi yu owi ʼberlegat noʼgwi ai en, nede-hedesogo togulom egi ai o. Is ai enebe re, Kristus emin modok il ʼbelak welat aphwami lalonobogwi aʼge anoat o.

⁸Ye, nis en his takhonobogu lege ano paget, his logon oʼgo wo erlakma en nal emano oluk, ʼberlegat wagup en e, henebabut heberlogo wolomup o. Welat e, Allah en, “His oʼgo wokhentaik,” oluk wene weraknenebesi ano, his logon nalom erlakma en ʼberlegat hwerlagup en e, henannisogo togu lomup o.

⁹Sa en wene Kristus en moʼgulnentesi wene ai pam louktak togwi erlak welat, mu aʼge de, tiso holuk e, Allah ebe eiye om erlakma en oruak o. Asogo aʼgeat de, sa en wene Kristus en moʼgulnentesi aʼge ai pam louktak modok til lasu lema holuk e, nenaik Allah emin, omlogo Yesus emin, eʼbirek eiye agarik oruak o.

¹⁰Aphwami logon en wene Kristus en moʼgulnentesi wene erlak, we, wene mu aʼge moʼgulhentau wagaiam, sa en aphwami enebabut ategenik aʼge hau wusogo owi pam wasuam e, at ebabut wiak tiso aʼge ai ebabut hwerlasu ai en e, his en aphwami enebabut ategenik aʼge hau wusogo honowi pam wogonobu modok mia o.

¹²Wene aʼbigat heneʼbek perakpou wom oruagat aʼgeat de, odo aʼbosu suesiʼga pam pelal wo re, nebit o. We, nonogola nenagai hogu lege aʼge ai ebenagaikmu nenagai houwogoluk e, nenemin mesikmu weneane neneʼberli yet-yet uogoluk, an nebe heneʼbek weik epasu legi o.

¹³Hwe mesik Allah en polik pesi aʼge, emalik en enia hwe ebe hau woru ʼgelaʼge, is Allah eiyagai yema aʼge en e, his hau wathenebigisa o.