Read Silimo 3 Yohanes 1 Bible Online

3 Yohanes 1 - Silimo bible

3 Yohanes 1

¹Gayus nare o. An en Allah eiyagai tenentarok welemagoluk ediknebesi aʼge honue ano nedemu en demat hebe nede welegi, oluk, wene yu pelal wokho heʼbek perakpou wegi o.

²Nare o. Hat hede Allah pam heʼberik welat op welegen ai ʼgelaʼgeat, hebam ou erlaksogo op welat di paget yu paget opsogo taga lorogun en, seʼban hat hebaget ese legi o.

³Hat en dem wene hesaʼgo hwelakpoluk opsogo taga legen ai en, is Allah eiyagai nenarilak nonorokhwi logon neʼbek wegesarik, disogo moʼgulnegisa, “At en dem wene tenak welat op hegitsogo tiso,” oluk hobok moʼgulnegisema nesaʼgo hwelegistik e, nogola nagai aʼbik hasu legi o.

⁴Asogo ogwiam e, an en di paget, yu paget nogola weiyat ʼgelaʼge nagai hasu legi aʼgeat de, his henebe an neiyagai en dem wene tenak welat, op hegitsogo togwiam nesaʼgo hweliselat e, nogola nagai aʼbik hasu legi o.

⁵Nare hebe nede o. Hat hebit om erlakma en Allah eiyagai nenarilak nonorokhwi enebe haluk aʼge heperlak aʼge ʼberlegat lerentasu legen aʼge nak en e, “At en nis edeapnonoboluk disogo woknentesi,” oluk Allah eiyagai yema aʼge moʼgulentau wegesema nesaʼgo hwelegis o. Asogo tigen ai ʼgelaʼge, is ai en Kristus paget aphwami logon wene eneperlak aʼge moʼgulentai lagaiam, is en di aʼge yu aʼge logon wogonto erlak aʼge re, hat en Allah ede opsogo lerontoluk peragonoboma re, op o.

⁸Is ai dem wene Allah iak ano paget togwi ai, nis nenemin enat tu ʼgelaʼge togu lemagoluk, lerontogu lomogat o.

⁹An en his Allah eiyagai aʼge enebaget pelal horoksogo wokho heneʼbek perakpou wegi aʼgeat de, at Diotrefes ogola en e, “An Allah eiyagai onue ʼgain eik o,” oluk epasu aʼge ai nak e, an niak hwelakpoluk tago erlak ai o.

¹⁰Asogo tago ai, mesik e, iak eseiyat nis nonobok wiak oso. Asogo eselat, at ede en e, “An taga legi ai re, weiyat. Nogola mia. Pobuk logon eminsogo tigat o,” oluk epasulat e, is Allah eiyagai logon wagaiam, at ebe en wogonobu erlakma en welat, is logon en wogonobuogoluk togwiam wene yagontoluk, enebe Allah eiyagai odoktogumu en mukho lebigenebasu ai en, an nebe weiktik en, at tago aʼge ai pobi tuagoluk eʼgerli werik o.

¹¹Nare o. Hebe nede o. Hat en e, is aphwami enebabut wiak togwi aʼge ai, enebabut wagun o. We, is enebabut op togwi aʼge holuk, enebabut wasu lomup o. Ap sa en ebabut op nak tiso aʼge ai ebe Allah eiyagai aʼgeat de, sa en ebabut wiak nak tiso aʼge holuk, at en Allah ebe il hasu erlakma en, eperlagat o.

¹²Asogo aʼgeat de, at Demetrius paget nak e, aphwami ʼberlek emin, at Allah demat nak oso aʼge ano emin, an emin, “At op tiso,” oluk obok op ogu lege. At obok ogu lege ai, demat op ogu lege ai his henaluk o.

¹³An en wene aʼbigat heʼbek perakpou wom oruak aʼgeat de, odo aʼbosu pam pelal wokho heʼbek perakpou wom e, nebit o.

¹⁴We, an nebe perleneat hiau weiktik weneane neneʼberli yet-yet ul o, oluk epasu legi o.

¹⁵At Allah ebabut op aʼge ano en hede haʼbugaphebasu lemak o. Nare. Ye, is nenarilak nonorokhwi yema aʼge nemin hwedik aʼge en hau wathebigisayat o. Ye, nis nenarilak nonorokhwi enemin hwedik aʼge o eba oruak aʼge, “At en hau wathenebegeiyat o,” oluk enebe loʼbok ononuk ʼgwelakhegeik moʼgulontomup o. Nare.