Read Silimo Yudas 1 Bible Online

Yudas 1 - Silimo bible

Yudas 1

¹An Yudas, Yakobus ot, Yesus Kristus eragam aʼge ano en, his wene yu pelal wokho heneʼbek perakpou wegi ai o. Narilak norokhwi. Allah enat yoʼgo henebesirik henebe ede welat, Yesus Kristus paget tenhentarok oruak ai.

²At Allah en henebe edeaphenebiselat, henede haʼbugaphenebiselat, his-his nede-hedesogo welemagoluk takhenebasulat, loksogo takhenebasu lemak o.

³Narilak norokhwi. Henebe nede o. Wene Allah en his heneminat delnenebegei ano paget wene pelal wokho heneʼbek perakpou weigoluk nede eberak modok welegirik e, pobuk nede sebelu mia agama re, wene disogo paget perakpou wegi ai o. Ai re, is aphwami logon Allah ebe enebit aʼge nis wongat oruakhwe neneʼgerlakma ʼgu egesarik e, Allah ebabut op en woknenebiso aʼge ai, is en edenogo wene mu aʼge moʼgulhontogulat e, “Wiak aʼge yogunat togulom o,” oluk, nonue ʼgain Onuk Logo aʼge Yesus Kristus anni aʼbik ano ebe ukpoluk, togwi ai o. Asogo togwi ai en, Allah en e. “Wene disogo enebam paik,” oluk egeimu page enat pelal wokho pegesema oruak o. Wene Allah en mesik erligeat nis eiyagai woknentesimu nenede ebam heʼberik welege ai aʼge, is ai en erlagap pouwogoluk togwiam, his en erlele wokho henannisogo tenak wolorogup en henede ʼgagalogo perakpou wegi ai o.

⁵Wene moʼgulhentaik yu re, page enat henaluk aʼgeat de, pobuk henede eberak henebaik ai o. Nonue ʼgain Onuk Logo aʼge en eiyagai Israel aʼge o Mesir oruakma delenebegei aʼgeat de, pobuk is aʼge logon enede at ebam heʼberik welegesa erlak aʼge warenebegei o.

⁶Ye, at Allah en is malaikat yoʼgo ʼbelagonobou wago aʼge tu aʼge soʼbusogo wogentesi aʼgeat de, is logon en enarilak tu aʼge tugan ontoluk e, onuʼgwarek onowi pam ukpegesema, Allah en herle werak modok modok welema aʼge pam eneʼgik herle wusogo o modok hiktakma ʼgwiang ogola orogobu enebesimu oruak ai o. Asogo modok welemarik en, pobuk aphwami wene loksogo enebam pouwa ai erlige, is eneminat enebam paigoluk e, eneʼgik herle hebilonobua ai henede eberit o.

⁷Is tigisa hegitsogo re, is aphwami o Sodom aʼge emin, Gomora aʼge emin, o seli eragam oʼgwe eminat e, ʼbabi tenontogulat, ap-ap, hwami-hwami tu puk aʼge togulat, tigisa pam e, oʼgum e, odouk nasu modok welagoma eba modok welemagoluk, peragenebesimu eba oruak, oluk, nis aphwami ʼberlegat pobi togulom o.

⁸Asogoat e, is aphwami ai enabi hogwi aʼge ʼgelaʼge enede ʼbelak welat e, onuʼgwarek en enebe wiagaphorlogulat, nonue ʼgain Onuk Logo aʼge onogola en mi-miarak pogulat, ʼbogorl pam erligonobogwi aʼge ai onobok wiak ʼbalogulat, togwi ai o.

⁹At Mikhael, malaikat Allah en yoʼgo ʼbelakpou wago aʼge onue ʼgain ai en, is ap ai togwi ai ʼgelaʼge tu ogorlok welaga. At e, Musa ebe werak aʼge paget, Iblis emin wene ʼbalogulat, iak annisogo wene yagotluk wene ebam po elit aʼgeat de, ogorlok en disogo moʼgulesi, “Nenaik ʼgain Onuk Logo aʼge en wene yakhemak o,” oluk moʼgulesi.

¹⁰Asogo aʼgeat de, is aphwami ai di wene yu wene eneperlak welarat de, obok wiak ʼbalogwi ai o. Asogo ʼbalogulat, wam ede erlak aʼge en tiso ai ʼgelaʼge, enabusak enaluk agalat togwi ai pam enebabut pam enebe wiagaphorlogwi ai o.

¹¹Is ai Allah en wiagabonobua o! Naduk at Kain tegei ai ʼgelaʼge eʼberlik lagai ai o. At Bileam wiak tegei ai ʼgelaʼge, onuʼgwarek en uang sabusogo horlouwogoluk, asogoat togwi. At Korah en Allah paget, “Anat taga leik,” oluk is logon sebelogo enebaigoluk tegei ai ʼgelaʼge togwi ai pam, enebe nal agai ai o.

¹²His henarilak honorokhwi enebe henede en seni henemin mesikmu odoksogo noʼgwiam, is ap ai eneʼgerli erlagat heneʼbek ʼgu egesarik e, aphwami logon yerentarok wolom erlakma en onuʼgwarek enebaget nak ebam eberogulat enemin noʼgu legep ai re, wiak o. Sum pok ʼgut aʼge oruakma soduk aʼge ebam loʼbok oso ai ʼgelaʼge, enemin wiak noʼgu legep ai o. Enebe re, o hena moru nouwa erlak aʼgeat de, sogwei en anni wiak woluk noso ai ʼgelaʼge noʼgwi o. Ye, mesik e, e eʼgen ikhasu erlak en, eʼgela modok erlak agarikmu, emeʼgen emin henhogwiam modok ʼbuk ago ai ʼgelaʼge oruak o.

¹³Ye, mesik e, ik laut lok yeʼgelakma ik hererim hasulat yogun aʼge yagan aʼge erliak-ʼgwerliak hasulat, eragop nak takpasu ai ʼgelaʼge, is ai yogunat togulat, eneʼgerli erlak wiak togwi o. Hwesagal ʼgegilogo momu lasu ai ʼgelaʼge, Allah en is ai o modok hiktakma welemagoluk onobouwa aʼge oruak o.

¹⁴Nadugat Adam hwerli en dagetil waga legesarik e, hwerli sabit pam en, at Henokh dagaga aʼge en, is aphwami ai wene enebam pouwa aʼge paget disogo egei, “Yethemit. Nonue ʼgain Onuk Logo aʼge ano en osi at uʼgwarek en yoʼgo ʼbelabonobou wago aʼge enebe modok aʼbigat wogonoboluk ʼbuma o.

¹⁵ʼBumarik e, aphwami ʼberlegat wene enebam pasulat, noʼgorliselat, tiselat e, is aphwami Allah ebe enebit aʼge nak enebe ʼberlegat wene enebam pouwa o. Is Allah ebe enebit welat, di wiak yu wiak togwi aʼge loʼbok wene enebam pasulat, Allah enebit en wiak togulat eniak hurle wiak at obok wiak ʼbalogwi aʼge ai enebe loʼbok wene enebam pasulat, tua o,” oluk egei.

¹⁶Is ai aphwami onobok wiak ʼbalogulat, wene yagontogulat, togwi modogat welagai aʼge. Di aʼge yu aʼge enede en nasuam, “Nagai,” opogulat e, ai aʼgeat togulat, onuʼgwarek en erlikhorlogulat, di aʼge yu aʼge sabusogo horlouwogoluk, is logon eniak sakhosogo erligonobogulat, togwi aʼge.

¹⁷Aʼge re, narilak norokhwi. Henebe nede o. Is ap nonue ʼgain Onuk Logo aʼge Yesus Kristus en yoʼgo onoboluk peragonobou waga aʼge en wene page enat moʼgulhentigisa aʼge ai henede eberip o.

¹⁸Is en e, wene disogo oluk moʼgulhentigisa ai, “O ologun hwerli pam welat e, is aphwami logon Allah ebe enebit welat onogola en, di aʼge yu aʼge enede en nasuam, Nagai, oluk ai aʼgeat wiak modok togulat, eniak esegen yakhentauma o,” oluk moʼgulhentigisa ai o.

¹⁹Is ai re, Allah Arogun onogola erlak welat e, enebabut aphwami enebabut onotogat welat, is logon opsogo laʼbolik oruakma, meʼgisogo hwerli ʼbal-ʼbal onobou wagai aʼge aiat o.

²⁰Aʼge re, narilak norokhwi. Henebe nede o. Wene Allah uʼgwarek en woknentesimu henede Yesus Kristus ebam heʼberik poluk, henede hurlesogoat wolomup o. Asogo welat, Allah Arogun en henede ʼgagalisoam seʼban ogu lomup o.

²¹Asogo ogulat, honogola en e, “Nonue ʼgain Onuk Logo aʼge Yesus Kristus nenebe ede en, nis pobuk noburlal-hoburlal taknonobouwa,” oluk, yetharok welat e, at Allah en nenebe ede ai re, his en at emin hwedigat wolomup o.

²²Aphwami enebe o emin wi no aʼgeat de, delogo lebigonobogwi ai ʼgelaʼge, is logon enede ʼbiren aʼge henedesogo delonobogu lomup o. Ye, is aphwami logon di aʼge yu aʼge enede en nasuam wiak togwi ai re, sum ʼgut op oruakma, soduk wiak aʼge ebam loʼbok osoam orogole enebit ago ai ʼgelaʼge, is enebabut wiak togwi aʼge ai, henebit modok en honogorloksogo welat e, enebe nak e, henedesogo wolomup o.

²⁴His nenaik Allah anni oruak aʼge ano en, elirat tenhentarok wolom aʼge eʼbek lagaiam e, honoyuk ʼbeiksogo wathorlo erlakma en opsogo tenhentarok welemarik e, at ebe erliktogumu eba, wene henebam po erlakma enat, honogola henagai hogukhwe elirat edikhenebei louwa aʼge ai paget, hau worogu lomok o.

²⁵Nenaik Allah ematek en nonue ʼgain Onuk Logo aʼge Yesus Kristus tegei ai pam delnenebegei aʼge ano eiye aʼge anni aʼbigat o, oluk, at erliktogulat, logo pogulat, togu lomogoluk, edip pam di aʼge yu aʼge walho erlakma Allah emategat welaga ai pam en, yogodak ya en, pobuk modok modok welat asogo erliktogwi modok wolomok o, oluk, “Amin,” egi ai o.