Read Silimo Wahyu 1 Bible Online

Wahyu 1 - Silimo bible

Wahyu 1

¹Wene ebe re, disogo. Di wene yu wene hisogo welago aʼge pobuk perleneat ema aʼge ai, Allah eragam aʼge pobisogo moʼgulontuowagoluk Allah en at Yesus Kristus ʼbaksogo moʼgulesimu, at Kristus en malaikat perakpou wagama, wene ai at Allah eragam aʼge mesik en, an Yohanes moʼgulnesi.

²Asogo moʼgulnesimu, Allah iak ai Yesus Kristus en obok moʼgulnosokhwe wene ʼberlegat an nil hegi aʼge ai obok ʼbaksogo pelal wokho pegi ai o.

³Wene ai ʼberlegat e, perleneat ema ai en e, is aphwami logon wene pelal wogo aʼge yu onuk tualua aʼge emin, is logon wene ai enesaʼgo hwelakpoluk, wene ai hegitsogo togu lema aʼge emin, Allah en enebe obabenebisoam onogola enagai houwa o.

⁴An Yohanes en his o propinsi Asia gereja sabit pam odoktogu legep aʼge ebano narilak norokhwi o. Nenaik Allah ebe otok modok welat, page welaga, yogodak oruagat, pobuk modok welema aʼge wema ai emin, Allah ebe ʼgain welago aʼge ebalema oruakhwe Arogun ebe modok ʼgaroktak oluk sabiren aʼge ologotma welagai ai emin, at Yesus Kristus ebabut heʼbisogo welat Allah obok ʼbaksogo moʼgulnentasu aʼge ano emin, enebabut op ano en tenhentarok welat op aʼge wokhontogulat, henede haʼbugaphonobogulat, togu lemak o, oluk hau wathenebegi. At Yesus ebe waragarikmu re, aik Allah en malik naduk dagonobogwi ai ʼgelaʼge, at naduk togolik elalugap pesimu, aphwami ʼgain ononuk logo ʼgwiangma aʼge yema enebe mia aʼgeat de, at nak e, logo welago yo. Asogo weleigoluk, nis wiak togu lege ai en, nenebe herle werak ʼgelaʼge tennentarok oruakma, at en nis edeapnenebegeitik, emep namogo waraga ai pam herle hebilnenebegei ai o.

⁶Asogo hebilnenebegeitik, nis at aik paget togu lemagoluk, nenebe ʼgain Allah eiye ediknenebesimu welege o. Asogo ediknenebesimu welat e, nonogola en e, “At Yesus Kristus ai, anni aʼbik oruak,” oluk nis at ebe demat erliktogwi modok wolomok o, oluk, u ʼgelaʼge, “Amin,” egi ai o.

⁷Yethemit! At ebe o hena ogola wagoam, aphwami ʼberlegat enebe loʼbok emin, is at waʼgun dainsogo werigisa aʼge emin, enemin en enil yethogulat, enaʼgul onuk loʼbok ʼberlegat nge tua o, oluk moʼgulhentegis ai, “Demat emak,” oluk u ʼgelaʼge, “Amin,” egi ai o.

⁸Nenaik Allah Onuk Logo anni aʼbik aʼge ai, otok modok welat, pageat welaga, yogodak oruagat, pobuk modok welema aʼge wema ano en eselat e, “Edip emin, edeʼbi emin, anat o,” oluk oso yo.

⁹An henare henerei Yohanes nemin nenebe Yesus osi mesigat aʼge, di obotut yu obotut taknonobogukhwe, nonogola en e, “Pobuk at Allah en eragam nonobouwa,” oluk nenepe mosogo welege ai o. Oruakma, Allah iak Yesus en ʼbaksogo moʼgulnentesi wene ano an en moʼgulentil nese legi ai en, neʼgik herle wusogo o onuk Patmos ik eʼgenma ʼgwelaknobou wegesema welegi ai o.

¹⁰Asogo oruakma, o nonue ʼgain Onuk Logo aʼge owi dakha egeimu re, Allah Arogun nebam louk egeimu, noʼborlma en at mesik iak ʼbiʼgong lok aʼge iak ʼgelaʼge pam disogo moʼgulnosoma nesaʼgo hwelegis o.

¹¹“Hat hil hagun aʼge ai, pelal womup o. Wokho re, is Allah eiyagai gereja sabit pam odoktogwi aʼge, o onuk Efesus emin, Smirna emin, Pergamus emin, Tiatira emin, Sardis emin, Filadelfia emin, Laodikia emin, eneʼbek perakpomup o,” oluk moʼgulnesi.

¹²Asogo moʼgulnesimu, “Iak ai sa en moʼgulnoso,” oluk noʼborlma nil yethegi ʼgal e, esaga ʼgwialogwi aʼge ebe sabiren oyuk yogo re, emas aʼge pam heliʼgogo oruakma nil hegi o.

¹³Ye, esaga ai ʼburl eʼgerlakma abat dagaga aʼge ano orogole ʼgelaʼge, sum yat oʼborl oʼgwe aʼge hwerli oyuk pam ʼbekhit ʼbuktak, ye, emik pam e, ʼbagaluk emas aʼge ʼbuktak.

¹⁴Ye, asu re, domba asu ʼgut wiak aʼge ʼgelaʼge. Ye, il e, odouk magale ʼgelaʼge.

¹⁵Ye, oyuk e, tembaga odouk olomu werarogwiam amolit deleng oso ai ʼgelaʼge o. Ye, iak e, ik hurl lok aʼge iak ʼgelaʼge.

¹⁶Ye, eʼgik ʼbekhit akhit e, hwesagal ebe sabiren tenak welaga. Ye, emde pam e, ʼgarok eʼgat pema-pema merak aʼge liplau waga laga. Orogole amolit e, o erlige ʼburl mo sellip-wallip yeriso ai ʼgelaʼge oruakma nil hegi o.

¹⁷Asogo oruakma nil hegirik e, nogorlok en norogole sogup werak aʼge ʼgelaʼge, at orogolema eragam ʼbou ti lasuam e, at eʼgik ʼbekhit akhit en tenniesirik e, disogo moʼgulnesi, “Hogorlok erlak emen o. An nebe re, edipmu en ʼbekhit edeʼbimu notok modok welat e,

¹⁸nelaluk modok welegi aʼge re, anat o. An nebe arat waregi aʼgeat de, yethemen! Nelaluk egirik e, nelaluk modogat weleik o. Waragai ai emin, warotluk lagaimu eba emin, ʼgoduk horogwi aʼge an neʼgikmu oruak o.

¹⁹An asogo welegi ai en e, hat hil hegen aʼge emin, di wene yu wene yogodak ya ago aʼge emin, pobuk ema aʼge emin, ʼberlegat pelal ʼbalip o.

²⁰Ye, hwesagal ebe sabiren neʼgik ʼbekhit akhit tenak oruakma hegen ano emin, esaga ʼgwialogwi aʼge ebe sabiren oyuk yogo emas aʼge heleʼgik aʼge emin, hil hegen ano re, wene hisogo ai en e, ʼbaksogo moʼgulheik o. Hwesagal ebe sabiren hegen ai ebe re, is malaikat Allah eiyagai gereja sabiren odoktogwi aʼge ai, tenentarok welagai aʼge ai de, entigen o. Ye, esaga ʼgwialogwi aʼge ebe sabiren ai ebe re, is Allah eiyagai gereja sabiren odoktogwi aʼge aiat de, entigen o,” oluk moʼgulnesi.