Read Silimo Wahyu 10 Bible Online

Wahyu 10 - Silimo bible

Wahyu 10

¹Asogo entegistikmu en eʼberlik e, at malaikat anni aʼbik aʼge mesik osum ʼgelaʼge o hena aʼge ʼbuktak. Ye, aʼgul pam e, warloʼguk waleʼgik. Ye, orogole re, mo ʼgelaʼge. Ye, oyuk e, odouk magale ʼbekhit ligago aʼge ʼgelaʼge, pelal wogo eʼgerlik wei aʼge eʼgikmu en hebilogo woluk ʼbogorl pam en ʼbu agarik, oyuk ʼbekhit akhit e, ik laut yeʼgelak aʼge pam pasulat, ye, oyuk hware akhit e, ʼgwiangma pasulat, tagalat e,

³mene orlomene ʼgelaʼge onuk singa ai aʼge iak nga oso ai ʼgelaʼge iak loksogo osoam, wene oʼgo re, orlolu iak sabit pam en moʼgulogu legesa.

⁴Orlolu iak asogo osoam e, an pelal waigoluk tegis aʼgeat de, ʼbogorl pam en disogo moʼgulnegisa, “Orlolu iak sabit pam osokhwe hesaʼgo hweligen aʼge ai, pelal wagun no yo. We, hogolasogo mo ip o,” oluk moʼgulnegisema hwelegistik e, mo egi o.

⁵Asogo moʼgulnegisema mo egirik yethegi ʼgal e, malaikat oyuk pema akhit ik laut yeʼgelakma, ye, pema akhit e, ʼgwiangma, poluk, edik oruakma yethegi aʼge ano eʼgik ʼbekhit akhit ʼbogorl pam lagabak poluk e,

⁶Allah en ʼbogorl ebe emin, ebam welago aʼge emin, ʼgwiang ebe emin, ebam welago aʼge emin, ik laut yeʼgelak aʼge emin, ogola welago aʼge emin, ʼberlegat walhesirik elaluk modok welago aʼge onuk pam disogo oluk hoʼbuk ʼbalisoma hwelegis o, “Allah en tua aʼge ai, di erlige eselat, yu erlige eselat, aregen welema erlak o.

⁷We, malaikat enebe hebarligen en eneʼbiʼgong iak inghegesarikmu en, mesik eʼbiʼgong iak inghouwa aʼge ai iak inghasuam e, at Allah en wene ogola aʼge ai is ap at eragam aʼge, iak moʼgulontogu legesa aʼge ebano moʼgulontogulat e, Pobuk an disogo tik, oluk wene weragenebesi hegitsogoat arat ema o,” oluk hoʼbuk ʼbalegei.

⁸Asogo hoʼbuk ʼbalegeitikmu en, eʼberlik e, ʼbogorl pam en, eniak moʼgulnegisa aʼge ano en pobuk disogo moʼgulnegisa, “Pelal wogo eʼgerlik hebelik aʼge anoat, malaikat oyuk pema akhit ik laut yeʼgelak aʼge pam, ye, pema akhite, ʼgwiang pam poluk edik oruak aʼge ano, eʼgikmu tenak oruak aʼge ai wai lak o,”

⁹oluk moʼgulnegisema, woknemagoluk ʼgonu eʼbek lasuam e, at en disogo moʼgulnesi, “Waguntik e, monup o. Asogo nasuam e, hemdema en e, ʼgin aʼbosu ʼgelaʼge oduk op aʼge nagun aʼgeat de, hogola ʼbelabisoam e, hogola en e, erle nak ema ani o,” oluk moʼgulnesi.

¹⁰Moʼgulnesimu, pelal wei aʼge ʼbelak ano eʼgikmu en wegirik, ebe ano nasumu re, nemdema ʼgin aʼbosu ʼgelaʼge oduk op aʼgeat de, nogola ʼbelabisoam e, esik modok wiak agoma hegi o.

¹¹Asogo hegirikmu en, pobuk ʼbogorl pam en, wene disogo moʼgulnegisa, “Hat en wene Allah en aphwami enaʼgul onuk loʼbok, onowi edip loʼbok, eniak loʼbok, onuelak ʼgain ononuk logo aʼge esanat enebe loʼbok pobuk tagonobouwa wene ai, moʼgulentasu lomup o,” oluk moʼgulnegisa o.