Read Silimo Wahyu 11 Bible Online

Wahyu 11 - Silimo bible

Wahyu 11

¹Asogo moʼgulnegisarik eʼberlik e, elit aʼge ʼbouwaʼgun ʼgelaʼge woknegisarik e, disogo moʼgulnegisa, “Allah owi werik emin, at uam wusogo narlik obogwi aʼge ebale ano emin, elit aʼge pam walhasulat, aphwami Allah owi werikmu at erliktil ʼgogwi aʼge ʼberlegat heʼgik wenagenebil lak o.

²Asogo heʼgik wenagenebil lagun aʼgeat de, o seli Allah owi werikmu abel oʼborl akhit aʼge nak e, Allah en is aphwami at ebe eneperlak aʼge wogentesimu, is en o seli etleba emin, Allah uʼgwarek owi kota ai emin, onoyuk en al ʼbesilogukhwe dugwi 42 pam, agauwa 1260 pam, welema ai en e, hat en walho modok erlak o. Is asogo oruakhwe, an en ap enebe ʼbiren sum ʼbelagwi sum ʼbuktogwi ai ʼgelaʼge ʼbuktak welat, an niak ʼbaksogo moʼgulontogu lemagoluk peragonobou weik o,” oluk moʼgulnesi.

⁴Is ap enebe ʼbiren eria re, e zaitun ʼbiren emin, esaga heberlogwi aʼge oyuk yogo ʼbiren aʼge emin, nenaik ʼgain Onuk Logo aʼge di aʼge yu aʼge ʼberlegat eiye welago aʼge ologotma welagai aʼge ano, is ap aiat o.

⁵Ye, is aphwami en, “Is wiagabonobuok,” oluk ua holuk e, odouk is ap ʼbiren eria enemdelema en liplau wagalat, is eneselei aʼge ai enebe odouk nouwayat o. Holuk e, ap sa en, is wiagabenebigoluk tua holuk e, woru hegitsogoat asogo worua.

⁶Ye, is en Allah iak moʼgulontogulat, “Moru ʼbogorl pam en ʼbuma modok erlak,” oluk elirat moʼgulontogulat, ik ʼberlegat mep emagoluk elirat togulat, ye, onogola enagai houwa pam, “Aphwami ʼgwiangma aʼge di ou yu ou enebam pouwok,” oluk elirat ou edip enebam pogulat, togu lemagoluk, Allah en eiyerak enebesimu asogo tua aʼge entegis o.

⁷Wene asogo arat moʼgulontogwi holuk e, mene orlomene ʼgelaʼge lok aʼge mesik ʼgwiang ogola orogobu en eneʼbek orlumarik, enemin weim obogulat, mabenabonoboluk enebe waronobuayat o.

⁸Asogo weragonoboluk, enebe werak e, o kota ebela lok oʼgwe nonue e pam edikpoluk werigisema eba onobouwa o. O kota ai, o Sodom emin, Mesir emin, ebam elit togwi aʼge anoat o.

⁹Asogo onoboma oruakma re, aphwami enaʼgul onuk loʼbok, eniak loʼbok, enagap loʼbok, onowi loʼbok, enebe ʼberlegat werak sebelonobu erlakma en ugonoboluk, enil yethailo wom ogukhwe, agauwa henagan wolomtik en agauwa mesik pam hwerli erlige hwerli welema o.

¹⁰Asogo oruakhwe, aphwami ʼgwiangma aʼge enebe ʼberlek en ogulat e, “Is ap ʼbiren wene moʼgulnontogu legesa aʼge yema en, di obotut yu obotut aʼbik nenebam pogu legesa aʼge ano enebe obat warenebegisa,” oluk onogola enagai aʼbik hogulat, seni sorogulat, di aʼge yu aʼge oʼgo erlak is logon en logon wogontugulat, is logon en logon wogontugulat, wogentil laga lema o.

¹¹Agauwa henagan asogo togu lemarik, agauwa mesik erlige ʼburl asogo togumu, Allah Arogun enelalugabenebiso aʼge ano is ap ʼbiren eriano onogola ʼgoluk, enelalugabonoboluk edigenebasuam e, aphwami ʼberlegat enil ontoluk e, onogorlok aʼbik ema o.

¹²Asogo onogorlok emarik oruakhwe, ʼbogorl pam en iak loksogo is ap ʼbiren wene moʼgulontogu lema aʼge ano disogo moʼgulontouwa, “Orlu manis o,” oluk moʼgulentasuam, is ap ebano eneselei aʼge ebano enil yerentarok oruakhwe ʼbogorl pam o hena ogola ligagaimu entegis o.

¹³O ai erlige re, mouk lok onogorlok aʼge mesik erlang-perlang hasulat, o kota ai ebe 10 pam meʼgisogo poluk, lok akhit ukpasulat, mesigat nak modok moluk-melaksogo pasulat, aphwami enebe 7.000 pam warenebisoam, is pema akhit waronobu erlak aʼge onogorlok aʼbik emarik, is en e, “Allah ʼbogorl pam aʼge, nogorlok o,” oluk erliktogumu entegis o.

¹⁴Asogo togumu entegis ai, yethemit! Wiagabonobua aʼge ano re, agauwa ʼbiren pam arat wiagabenebigisarik, eʼberlik mesik perleneat wiagabonobua aʼge oruagat o.

¹⁵Asogo entegistikmu en, is malaikat enebe sabiren ebano, enebe hebarlik pam eneʼbiʼgong arat iak inghegesarikmu en, eʼberlik e, mesik eʼbiʼgong iak inghasuam e, ʼbogorl pam en eniak loksogo disogo ogumu hwelegis, “Naduk aphwami ʼgwiangma aʼge en eneragam onoboluk tenentarok welegesa aʼge re, yogodak nenaik ʼgain Onuk Logo aʼge Allah en nonue Kristus en delnonobuagoluk edikpesi aʼge ano eʼbirek en arat eneragam nenebegesarik, at Kristus en tennentarok modok-modok welema o,” oluk ogu legesa.

¹⁶Ye, is enarlue aʼge enebe 24 en Allah eragam ʼgain enebalema welagai aʼge ebano onorogole sakhunsogo Allah eragam ʼgoluk erliktugulat e, disogo ogu legesa,

¹⁷“Allah Nenaik, ... Hat hanni aʼbik, ... Naduk welegentik yogodak modogat welegen ai pam, ... Yogodak hat hebe ʼgain Honuk Logo aʼge welat, .. Aphwami ʼberlegat arat heragam enebegentik, .. Tenentarok wolorogun ai en, ... Hau wathobogu lege, ... Aphwami enaʼgul onuk loʼbok ʼberlek en, ... Onolot het hebam pogu legesa aʼge, ... Hat en ogo holot het enebam arat pagun ai, ... Asogo enebam pasulat, ... Aphwami waregesa aʼge logon, ... Wene enebam pasulat, ... Is logon wene enebam noʼgorlogun aʼge, ... Hat hiak moʼgulontogwi aʼge emin, ... Heiyagai ononuk oruak aʼge emin, ononuk erlak aʼge emin, ʼberlegat, ... Hat onogorloksogo welat, ... Hiak wogulat oruak aʼge enebaget, ... Oʼgo arat wogentagun ai, ... Is logon o ʼgwiangma wiagap pegesa aʼge, ... Hat en is arat wiagabonobogun ai, ... Asogo togun ai en, ... Hau wathobogu lege,” ... oluk weni worugukhwe hwelegis o.

¹⁹Asogo ogukhwe entegistik yethegi ʼgal e, ʼbogorl pam Allah owi werikmu ʼgoduk husogo lasuam e, Allah en wene nenesaʼgo weregei wene pelal wogo peti ogola yagarak welaga aʼge ano enam aga o. Asogo enam agoam e, obinal pobuk naduk yebekhasulat, orlolu iak ʼbaktak poluk en orlu eselat, mouk erlang-perlang hasulat, moru hagarleʼgen lok aʼge derleʼgik nasulat, tisoma yethegi o.