Read Silimo Wahyu 12 Bible Online

Wahyu 12 - Silimo bible

Wahyu 12

¹Asogo hegirikmu en, eʼberlik yethegi ʼgal e, aphwami en pobi tuagoluk ʼbogorl pam elalin tu puk aʼge loksogo tisoma disogo yethegi o. Hwe aʼge mesik dugwi pam oyuk poluk osum ʼgelaʼge mo aʼge ʼbuktak, ye, hwesagal 12 aʼge aʼgul pam ʼgare-ʼgare ʼgelaʼge ʼbuktak aʼge yethegi o.

²Hwe ai emalik ogola aʼge arat dakhorlo hegitmu no oluk e, nonouk tagalat, iak nga ese laga.

³Asogo nonouk tagokhwe, aphwami en pobi tuagoluk ʼbogorl pam elalin tu puk aʼge loksogo tisoma mesik yethegiat o. ʼGosu ʼgelaʼge lok aʼge agap momi aʼge aʼgul e, sabit pam, ye, aʼgul pam e, iak 10 pam daintak, ye, ʼgare-ʼgare re, sabit pam ap ʼgaindek ʼbuktak onobogwi ai ʼgelaʼge en aʼgul pam loʼbok ʼbuktak aʼge welaga.

⁴Asogo welat, age aʼgum pam hwesagal ʼbogorl pam aʼge henagan meʼgisogo poluk, ʼbiren ukpoluk, mesik lisogo ʼgwiangma ʼbelakpou wagarik e, hwe ano emalik derisoam haumsogo naigoluk orogolema ʼgagalak welaga.

⁵Asogo oruakhwe, aphwami en ʼbouwaʼgun wik-wok wam oʼgonogwi ai ʼgelaʼge, at hwe ano emalik e, ʼbouwaʼgun ʼbesimeʼgen aʼge woluk aphwami enaʼgul onuk loʼbok ʼberlegat eragam onoboluk annisogo tenentarok welema aʼge deregei. Asogo derisokhwe, erianoat emalik ano dil-del woluk Allah ʼgain welago aʼge ebalema ano orogolema pei lasumu yethegi o.

⁶Asogo woluk lasukhwe, at hwe ano o leimu aphwami erlakma wolomma, Allah en ebale mesik degelogo pesimu ebano hweiye lagarik oruakma tenak oruakhwe, agauwa 1.260 pam oruakma yethegi o.

⁷Asogo lagarik oruakhwe, ʼbogorl pam weim ʼgagalagama yethegi o. Malaikat Mikhael osi enemin en ʼgosu ano woruagoluk togukhwe, at ʼgosu lok aʼge ano osi malaikat at oruak oʼgwe aʼge akhit egesarik weim obogu legesa.

⁸Asogo obogulat e, at ʼgosu lok aʼge ano mabenap pegesarik, at ebe emin, malaikat at osi aʼge emin, “O ʼbogorl pam yema wolorogup modok erlak o,” oluk ʼgwiangma ʼbelabonobou wagaimu entegis o. ʼGosu lok ai, onuk e, Iblis ogulat, Setan ogulat, ogwi aʼge page enat aphwami lalenebiso aʼge anoat o.

¹⁰Asogo mabenap poluk, ʼbelakpou wagama, ʼbogorl pam en eniak loksogo disogo ogumu hwelegis, “At ai en Allah ilem iak eseiyat is nenarilak nonorokhwi hup erlige wene enebam pasu modok welago aʼge ano arat mabenap poluk ebe lebikpegesa ai obat o. Nenaik Allah ʼgain Onuk Logo aʼge welat, delnonobuagoluk Kristus edikpesi ano, di aʼge yu aʼge ʼberlegat eiye welat, eʼbirek enannisogo delnonobogulat, arat eneragam nenebegesa yu i o.

¹¹Is nenarilak nonorokhwi ai onuʼgwarek enebe enede om erlakma en, Watnonobogwi holuk e, obat o, oluk noʼgumu warenebegisa. Is ai re, Domba Emalik emep namogo werigisa ai pam emin, is en Allah iak dem wene ai ʼbaksogo moʼgulentil noʼgu legesa ai pam emin, Iblis ano arat mabenap pegesa ai o.

¹²Ai en e, his ʼbogorl pam welegep aʼge ʼberlek yema logwe! Honogola henagai hogu lomup o. Honogola henagai hogukhwe re, his ʼgwiangma aʼge emin, ik laut yeʼgelakma aʼge emin, nak e, Iblis ano heneʼbek ʼbelakpou wagama, at agauwa wolom aʼge pobirak pesirik, at en e, Agauwa wei nak weleik ai nopaget, oluk olot het agarik wiagaphonobua ai en e, eige! Nede o,” oluk osoma hwelegis o.

¹³Asogo ʼbelakpou wagama welat, “An disogo ʼgwiangma ʼbelaknobou wagama welegi o,” oluk pobi tegeitikmu no oluk e, hwe emalik ap deregei aʼge ano weriogoluk motluk denago yo.

¹⁴Asogo denago ai en, at ogoiyesogo o aphwami erlakma welemagoluk, Allah en ebale degelogo pesimu ano dasogo louwagoluk, sue pedi-pedi lok aʼge agapsaburl wogesimu dasogo eba lagama, Allah en tenharok oruakhwe, o mo ligom, ʼbugom osokhwe, 3 tahun setengah delnasogo oruakhwe hegi o.

¹⁵Asogo oruakma, at ʼgosu lok aʼge ano en, at hwe ano ik ebe en woluk louwagoluk, ik emdelema en elaruk lok aʼge ʼbukhalogo, hwe ano ebe oruak oʼgwe hegitsogo obok hasu laga.

¹⁶Asogo obok hesi aʼgeat de, aphwami en, hwe ano ebe delu ʼgelaʼge, ʼgwiang en omuat ʼbakholuk ik ano ogola ʼbelabisoam e, erlak agokhwe hegi o.

¹⁷Asogo ʼbelabisoam e, ʼgosu lok aʼge ano olot het hwe ano ebam poluk, aphwami hwe ano en dogoʼgwe aʼge pema akhit Allah en wene nenesaʼgo weregei wene ano hwelakpoluk hegitsogo tugulat, Yesus en tegei wene ʼbaksogo moʼgulontogulat, togwi aʼge warenebigoluk enemeʼgin ʼgabelegeitik,

¹⁸ebe ik laut lok yeʼgelak aʼge ano esaʼgoma, eba lagarik edik oruakma yethegi o.