Read Silimo Wahyu 13 Bible Online

Wahyu 13 - Silimo bible

Wahyu 13

¹Asogo yethegirikmu en, eʼberlik e, mene orlomene ʼgelaʼge lok aʼge mesik iak aʼgul pam e, 10 pam en daintak, ye, aʼgul e, sabiren aʼge, ik laut yeʼgelakma en liplau wagoma yethegi o. Iak 10 ai, ebe loʼbok ebam e, ʼgare-ʼgare ap ʼgain ʼbuktak onobogwi ai ʼgelaʼge ʼbuktak, ye, aʼgul sabit aʼge ai re, ebe loʼbok e, ebam Allah onuk wik-wiaksogo takpogwi aʼge pelal wokho oruakma yethegi o.

²At mene orlomene lok aʼge liplau wagoma hegi ai ebe re, mene ʼgelaʼge onuk harimau ʼgelaʼge. Ye, oyuk e, ʼbaik num ʼgelaʼge lok aʼge onuk beruang ai oyuk ʼgelaʼge. Ye, emde re, mene orlomene ʼgelaʼge onuk singa emde ʼgelaʼge asogo enam agarikmu re, at ʼgosu lok aʼge ano en, mene orlomene ʼgelaʼge ai moʼguleselat e, “An ʼgain nanni aʼbik welat, di aʼge yu aʼge eiye welago ano ʼgelaʼge, hat an nebalema ʼgain wolorogun en edikhebegi o,” oluk moʼgulosoma hwelegis o.

³Hwelegistik yethegi ʼgal e, at mene orlomene ʼgelaʼge lok ano aʼgul ebano aʼge mesik werigisema, ebe warom aʼgeat de, op agarik sogomerli nak oruakma, aphwami ʼberlegat enil holuk erliktogulat, at eʼberlik modok lagaimu yerentegis o.

⁴At ʼgosu ano en, at mene orlomene ʼgelaʼge lok aʼge ano moʼguleselat, “Hat ʼgain hanni aʼbik welerinok o,” oluk edikpesi ai en, is aphwami enede ʼgosu ano emin, mene orlomene ʼgelaʼge lok ano emin, enebam heʼberik poluk erligonobogulat disogo ogu legesa, “ʼGosu lok aʼge yu emin hegit e, sa epegep. Emin hegit aʼge mesik erlak o. Sa ʼgelaʼge en at emin weim obu epegep. Mia o,” oluk ogumu entegis o.

⁵Asogo ogukhwe, o mo ligom, ʼbugom, osokhwe, dugwi 42 pollil lasukhwe, at mene orlomene ʼgelaʼge lok aʼge ano uʼgwarek en erlikhwerlasulat, Allah onuk wiagap pasulat, tagalat, aphwami eragam onoboluk tenentarok welemagoluk ʼgosu lok ano en eiyerak pesimu yethegi o.

⁶At asogo welat, at en Allah ebe emin, onuk emin, at owi ʼbogorl pam emin, is o ʼbogorl pam welagai aʼge emin, ʼberlegat ononuk wiagarisoma hegi o.

⁷Ai ʼgelaʼgeat, aphwami enaʼgul onuk loʼbok, eniak loʼbok, enagap loʼbok, onowi loʼbok, ʼberlegat at en eragam onoboluk tenentarok welemagoluk edikpesimu eiye agarik, Allah eiyagai enemin weim obogulat, mabenabenebasumu hegi o.

⁸At Allah en e, ʼbogorl ʼgwiang owan walho erlak welat, “Is eria enelaluk modok welemagoluk tagenebaik o,” oluk, ononuk pelal wokho at Odomba Emalik, is enebaget werigisa aʼge ano oruesiʼga pam pesi o. Is ononuk asogo pelal wokho pesi aʼge nak, mene orlomene ʼgelaʼge lok aʼge ano, erliktu erlakma en oruakhwe, aphwami ʼgwiangma welagai aʼge logon ʼberlegat enede mene orlomene ʼgelaʼge lok ano pam heʼberik poluk erliktogumu entegis o.

⁹Ai en e, wene moʼgulhentaik aʼge yu, his henesaʼgo oruak holuk e, opsogoat hwelit o. At mesik ebe herle wusogo po hegitsogoat, herle wusogo pouwa o. Ye, at mesik ʼgarok pam woru hegitsogoat, ʼgarok pam worua o. Asogo tua ai en, ebe logo re, Allah eiyagai aʼge holuk, enede at ebam heʼberik poluk enepe mosogo wolom aiat o.

¹¹Asogo hegirikmu en, eʼberlik yethegi ʼgal e, mene orlomene ʼgelaʼge lok mu aʼge mesik iak aʼgul pam domba iak ʼgelaʼge ʼbiren daintak, ye, iak osoam e, ʼgosu iak ʼgelaʼge, ʼgwiangma en enam agoma yethegi o.

¹²Enam agarik, mene orlomene ʼgelaʼge naduk aʼge ano eiye welat taga laga aʼge, at mene orlomene ʼgelaʼge pobuk aʼge ai eiye agarik, at en aphwami moʼgulentasulat e, “Aphwami ʼgwiangma welegep aʼge ʼberlegat, at mene orlomene ʼgelaʼge naduk aʼge ano werigisema re, ebe warom aʼge op aga aʼge aiat henede ebam heʼberik poluk erliktu o,” oluk iak ningsogo moʼgulosoma hwelegis o.

¹³At mene orlomene ʼgelaʼge lok pobuk enam aga aʼge ano, aphwami en at ebe pobi tuagoluk, is enil pam elalin aʼge tagalat, ʼbogorl pam en odouk ʼbelabu agoma yethegi o.

¹⁴Asogo mesik taga laga ai, at mene orlomene ʼgelaʼge naduk lok aʼge ano en, elalin aʼge at ilem taga lemagoluk eiye takpesi aʼge ano ebe tagalat, aphwami ʼgwiangma welagai aʼge iak eseiyat lalenebise laga. Asogo lalenebiselat, is aphwami ebano en, mene orlomene ʼgelaʼge lok aʼge ano ebe ʼgarok pam werigisema ebe warom aʼgeat de, togolik op aga aʼge ano ebe ʼgelaʼgeat heliʼgogo dogwi mesik woruagoluk moʼgulesimu dogwi ebe werigisema yethegi o.

¹⁵Asogo werigisema, at mene orlomene ʼgelaʼge pobuk aʼge ano en dogwi ano en elalugap pasuam iak osoma yethegi o. Asogo eselat, is aphwami enede dogwi ano pam heʼberik po erlak aʼge holuk nak enebe modok warenebiogoluk weim yoʼgo pesimu warenebil lagaimu yerentegis o.

¹⁶Asogo waronobogukhwe, at mene orlomene ʼgelaʼge pobuk aʼge ano en e, aphwami ʼgain ononuk oruak aʼge emin, erlak aʼge emin, enilmu oruak aʼge emin, enerlagaik aʼge emin, eneragam aʼge emin, is enematekma aʼge emin, aphwami en enede weʼgerlogo silo ʼgelaʼge saleʼgen erleligonobogwi ai ʼgelaʼge, is ʼberlegat enebe loʼbok disogo moʼgulentasu laga, “Dogwi onuk pelal wogo aʼge yu, heneʼberli pam de a? Heneʼgik ʼbekhit akhit de a, wantogup en wemit o.

¹⁷His en, at onuk pelal wogo aʼge de a? At e, onuk paget eneʼgik wonogo aʼge de a, wegep aʼge holuk, di aʼge yu aʼge oʼgo ʼbalogulat, is muon enebam oʼgo wogulat, togulom o. Asogo aʼgeat de, is aphwami logon wo erlak aʼge holuk e, asogo wogulom modok mia o,” oluk iak ningsogo moʼgulentasumu yethegi o.

¹⁸Ai en e, wene ai paget, his henebabut heberlak erlak wolom modok mia o. At e, sa en ebabut heberlak holuk e, mene orlomene ʼgelaʼge ai onuk paget, eneʼgik 666 pam wenarigisa ai, ebe re, ap mesik onuk aʼge wenarigisa ai en e, pobi tu o.