Read Silimo Wahyu 14 Bible Online

Wahyu 14 - Silimo bible

Wahyu 14

¹Asogo yethegirikmu en, eʼberlik e, yethegi ʼgal e, at Domba Emalik ano dom Sion pam edik oruakma yethegi. Ai re, at ebe emin, is aphwami enebe 144.000 pam, at Domba Emalik emin, aik emin, eʼbirek ononuk is ai enebe loʼbok eneʼberli pam pelal wogo aʼge emin, enemin oruakma yerentegis o.

²Asogo welat, eniak ʼbogorl pam en e, ik hurl lok aʼge iak ʼgelaʼge ogulat, orlolu iak loksogo oso ʼgelaʼge ogulat, is aphwami logon gitar worogwi aʼge en ebe worogukhwe iak oso ʼgelaʼge ogulat, eniak aʼbik ogumu nesaʼgo hwelegis o.

³Asogo eniak aʼbik ogulat, Allah ebe ʼgain welago aʼge ebalema eba oruakhwe, is at en walentesi aʼge logon enebe ugan ebano emin, ap enarlue ebano emin, enilem weni ʼget aʼge pelalogo is aphwami pema akhit moʼgolik erlakma en eneperlagat, we, is aphwami enebe 144.000 ʼgwiangma en arat delenebegei aʼge ebano nak enalukmu re, worogukhwe eniak hwelegis o.

⁴Is aphwami ai enebe re, degelak wolomogoluk, hwami enemin nogou erlak welat, enemde pam en eniak esei mesik ogwi erlagat, ye, aphwami logon en e, “Is ai wiak logon tigisema o,” oluk wene enebam po erlak aʼge welat, Domba Emalik ano ebela ʼgebane lasu holuk, eʼberlik noʼgumu, soʼboru ebe dogo erlakhwe, naduk naduk dorogwi ai ʼgelaʼge, Allah en di aphwami yu aphwami onogola en ʼgegilogo onoʼgo ʼbalogo delenebegeimu, is enebe Allah emin, Odomba emin, onuʼgwarek enebaget onoboluk, oruakma entegis o.

⁶Asogo hegirikmu en, eʼberlik e, at malaikat mesik wene op wene modok welema aʼge aphwami ʼgwiangma aʼge enaʼgul onuk loʼbok, eniak loʼbok, enagap loʼbok, onowi loʼbok, moʼgulentil ʼbogorl oʼgwe darak nosoma yethegi o.

⁷Asogo neselat, iak loksogo disogo ese laga, “Nenaik Allah en wene aphwami enebam pasulat, noʼgorliselat, tua ano, arat horok lau waga ai en e, Allah en ʼbogorl emin, ʼgwiang emin, ik laut yeʼgelak emin, ik elaruk obut ʼberlek emin, walhesi aʼge ano honogorloksogo welat, henede at ebam heʼberik poluk, erliktogu lomup o,” oluk osoma yethegi o.

⁸Asogo egeitikmu en eʼberlik e, at malaikat mesik wagarik e, disogo osoma nesaʼgo hwelegis o, “Aphwami logon en is logon enede ʼbalotluk, enebam aganhan en ʼbabi tenontogu lemagoluk, anggur eʼgen aʼbosu wogontogwi ai ʼgelaʼge, is aphwami o kota Babel aʼge enebam aganhan en aphwami enaʼgul onuk loʼbok en ʼbabi tenontogu lemagoluk, enede ʼgagalogwi aʼge ano, enebe arat wolloʼgen dagalegesa, yu hweinat!” oluk ogumu hwelegis.

⁹Is malaikat enebe ʼbiren asogo egesarikmu en, eneʼberlik malaikat mesik wagarik, iak loksogo disogo osoma hwelegis, “His logon mene orlomene ʼgelaʼge lok ai emin, ebe ʼgelaʼge heleʼgik aʼge dogwi ai emin, henede enebam heʼberik poluk erligenebigeptik, henebe silosogo at onuk ʼbelak heneʼberli pam de a? Heneʼgik pam de a, wegep aʼge nak,

¹⁰aphwami en, ik emin erlak, we anggur eʼgen aʼbosu nak esik wiaksogo naʼgogwi ai ʼgelaʼge, Allah olot het en his edeaphonobo erlakma en, wene ningsogo henebam pouwa o. Asogo henebam poluk, nis malaikat Allah paget welege aʼge emin, Domba Emalik ano emin, nenilem henebe, odouk emin, hwedali al ʼgelaʼge eʼben wiak aʼge onuk belerang emin, emin laʼbulik nasumu eba perakhonoboma, nonuk togwi modok wolorogup o.

¹¹Ai re, his henede mene orlomene ʼgelaʼge ai emin, dogwi at ebe ʼgelaʼge heleʼgik ai emin, enebam heʼberik poluk erligenebigeptik, henebe silosogo onuk ʼbelak wegep aʼge nak asogo perakhonoboma, hup modok, erlige modok, set hwalogo op mesik wolom erlakma en, henebam odouk obotut en nonouk togukhwe, henagap hobu ligago modok welema o,” oluk osoma hwelegis.

¹²Wene yu paget tu aʼge logo re, Allah eiyagai at iak hwelakpoluk hegitsogo togulat, henede Yesus ebam heʼberik welegep aʼge ai, henepe mosogo wolom o.

¹³Wene asogo osoma hwelegistikmu en, eʼberlik e, ʼbogorl pam en iak disogo moʼgulnosoma nesaʼgo hwelegis, “Yogodak aphwami nonue ʼgain Onuk Logo aʼge emin hwedik welat, at ebaget op togumu waronobua aʼge, onogola modok enagai houwa o, oluk pelal wokho pomup o,” oluk moʼgulnosoma Allah Arogun ʼbogorl pam en iak loksogo disogo moʼgulnesi, “Ai demat o. Is aphwami ai Yesus ebaget set wik-wiaksogo togu legesa aʼge ai, ebe tigisa aʼge woluk louwa ai en e, set opsogo hwalua o,” oluk moʼgulnosoma nesaʼgo hwelegis o.

¹⁴Asogo moʼgulnesirikmu en, eʼberlik e, o hena ʼgut aʼge oruakma, ap ebe abat daklau waga aʼge ano ʼgelaʼge ʼgare-ʼgare emas aʼge aʼgul pam ʼbuktak, ye, ʼgarok ʼgwanitak aʼge en e, eʼgat aʼbik aʼge eʼgikmu tenak welat, ebe o hena ano pam hweriogo oruakma yethegi o.

¹⁵Ai eʼberlik e, at malaikat mesik Allah owi werikmu en liplau wagarik, iak loksogo, at o hena pam hweriogo welaga aʼge ano disogo moʼgulesi, “ʼGwiangma eʼgen arat hurle agama ebe ʼbalu hegit lau waga ai en e, heʼgarok ai wik-wok e, yogodak eʼgen ʼbali ʼbin o,” oluk moʼgulesimu,

¹⁶at o hena pam hweriogo welaga aʼge ano eʼgarok ano wik-wok e, ʼgwiangma eʼgen ʼbaloʼbu wagoma yethegi o.

¹⁷Asogo hegirikmu en, eʼberlik e, at malaikat mesik ʼbogorl pam Allah owi werikmu en, eʼgarok ʼgwanitak aʼge en e, eʼgat aʼbik aʼge woluk liplau wagoma yethegi o.

¹⁸Asogo hegirikmu en eʼberlik e, at malaikat mesik odouk eiye aʼge Allah uam wusogo narlik obogumu ebano en wagarik, at malaikat eʼgarok eʼgat aʼbik ʼgwanitak aʼge woluk ʼbegei aʼge ano iak loksogo disogo moʼgulosoma hwelegis, “ʼGwiangma anggur eʼgen arat hurle agama ʼbalu hegit aga ai re, heʼgarok ai wik-wok ʼbali ʼbin o,” oluk moʼgulesi.

¹⁹Asogo moʼgulesimu, at ano eʼgarok woluk ʼgwiangma ʼbu agarik, anggur eʼgen ʼgwiangma aʼge ano uak pam en ʼbalogo eʼgen sagalogwi aʼge ebale lok aʼge ogola hwikhai lasumu hegi o. Eʼgen sagalogumu ai ebe re, Allah en olot het loksogo enebam pasu aiat o.

²⁰Ye, anggur eʼgen ʼbelak ai yagarak e, o seli abel pema akhit sagalogumu re, eʼgen sagalogwi aʼge ai ogola en, mep ik elaruk ʼgelaʼge ʼbulogo hwerli 2 meter ʼgelaʼge yeʼgelogo lagarik e, husogo re, hwerli 300 kilometer walegat lasumu yethegi o.