Read Silimo Wahyu 15 Bible Online

Wahyu 15 - Silimo bible

Wahyu 15

¹Nil asogo yethegirikmu en, eʼberlik e, aphwami en pobi tuagoluk, elalin lok aʼge mesik onogorlok aʼge ʼgelaʼge disogo ʼbogorl pam enam agoma yethegi o. Allah olot het ologun pam aphwami enebam poluk wiagabonobua ai en e, agauwa sabit aʼge pam wiagabonobua aʼge, malaikat enebe sabirenat enam agaimu yerentegis o.

²Asogo hegirikmu en, eʼberlik e, ik laut il lalu napunak ʼgelaʼge odouk emin mesik oʼgwe yeʼgelak oruakma yethegi. Asogo hegirik pobuk yethegi ʼgal e, aphwami logon enede mene orlomene ʼgelaʼge ano emin, dogwi at ebe ʼgelaʼge ogut heleʼgik aʼge ano emin, enebam heʼberik poluk erligonobu erlakma en, ye, onuk eneʼgik wenakho pelal wogo aʼge ano wo erlagat, togu legesa pam enanni egesarik, ʼbiʼgong gitar ʼgelaʼge Allah en wogentesimu eneʼgikmu wik-wok, ik laut yeʼgelak ai esaʼgoʼgwe edik oruakma yerentegis o.

³Asogo welat, weni at Musa Allah eragam aʼge ano emin, Domba Emalik ano emin, eʼbirek onoweni worogulat disogo ogu legesa, “Nenaik Allah, ... Hat hanni aʼbikmu re, ... Di aʼge yu aʼge tu nakma re, ... Elalin loksogo onogorlok aʼge nak taga legen, ... Hat di aphwami yu aphwami enaik ʼgain Honuk Logo aʼge welat, ... Hegitsogo nak tagenebasu legen, ... Op nak tagenebasu legen, ... Nenaik o, ... Nenaik ʼgain Honuk Logo aʼge hat hematek nak ʼgeksogo welat, ... Aphwami wene enebam pasulat, noʼgorliselat, tagalat, ... Aphwami ʼberlegat enilem, ... Demat modok taga legen, ... Aphwami enaʼgul onuk loʼbok ʼberlegat, ... Heragam ʼgu otluk, ... Ondogorlu pam huragalat, ... Erlikhobogulat, hau wathobogulat, togumu, ... Is aphwami salak ʼgelaʼge en hat onogorlok erlak welat, ... Erlikhobu erlakma en mo u, ... Erlak,” ... oluk weni worogumu hwelegis.

⁵Asogo yethegirikmu en eʼberlik e, ʼbogorl pam Allah owi werikmu ʼgoduk huragoam ogola re, at Allah ebe welago oluk, o sum aʼge werik ano oruakma yethegi o.

⁶Asogo ʼgoduk hwerik oruakma re, is malaikat enebe sabiren onosum meinya sum ʼgelaʼge onuk lenan il ʼgut nogorlok aʼge ʼbuktak, ye, sing ʼbuktogwi ʼgelaʼge, emas aʼge enemik pam ʼbuktak aʼge, Allah en eʼgik sabit pam aphwami wiagabonobua aʼge woluk liplau wagaimu yerentegis o.

⁷Asogo liplau wegesema re, is Allah en walentesimu enelaluk welagai aʼge enebe ugan ebano aʼge mesik en ik eʼbe sabit aʼge emas heleʼgikmu Allah elaluk modok welago aʼge olot het ik ʼgelaʼge neʼgak aʼge, Allah en is malaikat enebe sabiren ebano wogentasumu yethegi o.

⁸Wogentasumu, Allah owi werikmu ano Allah olot het aʼbik erliktogwi aʼge onogorlok aʼge ʼgelaʼge ano odouk hobu ʼgelaʼge ʼbete egeimu re, is malaikat enebe sabiren ebano Allah en aphwami wiagabonobua ano ologun pam wiagabonobu erlakma en oruakhwe, aphwami logon Allah owi werikmu ai ʼgogumu yerentegis modok erlak o.