Read Silimo Wahyu 16 Bible Online

Wahyu 16 - Silimo bible

Wahyu 16

¹Asogo yethegirikmu en, pobuk e, Allah owi werikmu ano en, at iak loksogo is malaikat enebe sabit pam ebano disogo moʼgulentasumu nesaʼgo hwelegis, “An Allah nolot het ik ʼgelaʼge ik eʼbe sabiren neʼgak aʼge ai herlilogo aphwami ʼgwiangma aʼge enebam ʼbelabi lit o,” oluk moʼgulosoma hwelegis o.

²Moʼgulesimu, is malaikat enebe sabit ebano aʼge mesik naduk Allah olot het ik ʼgelaʼge neʼgak ano aʼge mesik herlilogo aphwami ʼgwiangma aʼge enebam ʼbelabu agoam e, is aphwami pema akhit logon ʼberlegat enede weʼgerlogo, mene orlomene lok ano onuk pelal wogo aʼge ano wasulat, enede dogwi at ebe ʼgelaʼge, ogut heleʼgik aʼge ano pam heʼberik pogulat, tigisa aʼge nak, ʼbot wiak aʼge enebetne duk tagoma yethegi o.

³Asogo hegirikmu en, eʼberlik e, is malaikat enebe sabiren ebano aʼge mesigat en asogo ʼbelabu agarikmu en, mesik en Allah olot het ik ʼgelaʼge neʼgak ano aʼge mesik herlilogo ik laut yeʼgelakma ʼbelabisoam e, ik il aphwami waronobogwiam enemep ʼgelaʼge takpasulat e, di aʼge yu aʼge ik laut yeʼgelak ogola elaluk welago aʼge ʼberlegat waretil lasumu yethegi o.

⁴Asogo hegirikmu en, eʼberlik e, is malaikat ebano aʼge enebe ʼbiren en asogo ʼbelabu egesarikmu en, mesik en e, Allah olot het ik ʼgelaʼge neʼgak aʼge ano mesik herlilogo ik elaruk oʼgwe emin, ye, ik ebe lok lau wagoʼgwe emin, ʼbelabisoam e, ik ʼberlegat il mep agoma yethegi.

⁵Asogo agoma re, at malaikat ik eiye aʼge en Allah disogo moʼgulesi, “Allah hebe naduk welegentik, yogodak hotok modogat welat, ʼgektak welegen aʼge en, aphwami wene hegitsogoat enebam pegen o.

⁶Is ap ai en, hat heiyagai aʼge emin, hat hiak moʼgulontogwi aʼge emin, enemep enamogo warenebegisema re, mep nouwagoluk wogentigen ai re, enebabut pamat hegitsogo wogentigen o, naik,” oluk osoma hwelegis.

⁷Asogo egeitikmu en, eʼberlik e, Allah uam wusogo narlogumu ebano en disogo osoma hwelegis. “Allah hanni modok aʼbikmu re, di aʼge yu aʼge tu elit nak welat e, wene enebam pasulat, noʼgorliselat, demat hegitsogo taga legen ano en, asogo tigen o, naik,” oluk ese lagama hwelegis.

⁸Is malaikat ebano aʼge enebe henagan pam asogo ʼbelebak polukmu mesik en Allah olot het ik ʼgelaʼge neʼgak aʼge ano mesik mo pam herlelik pasuam e, mo orlouk en aphwami enebam odouk ʼgelaʼge nasu lemagoluk, mo orlouk aʼbik takpesimu, aphwami enebam odouk ʼgelaʼge nasumu hegi o.

⁹Asogo orlouk en odouk ʼgelaʼge enebam loksogo nasuam nonouk aʼbik togulat, Allah olot het enebam poluk wiagabonobu hegitsogoat wiagabenebise laga aʼgeat de, at ebe erliktuagoluk wiak togu legesa aʼge ukpoluk, enebabut heberlom erlakma en welat, is en e, “Allah ebe noʼgorelep e,” oluk, onuk wiagaptogwi modok oruakma entegis o.

¹⁰Is malaikat ebano aʼge enebe ugan asogo ʼbelakpou wegesarikmu en mesik en e, Allah olot het ik ʼgelaʼge neʼgak ano mesik herlilogo mene orlomene ʼgelaʼge lok aʼge ano ʼgain welago aʼge ebalema ʼbelabisoam e, o at ʼgain welat tenentarok welagoma ebano ʼberlegat hik ese laga. Asogo hik osoam e, is aphwami nonouk togulat, enemage eniak en hedin takpoluk, disogo ogu legesa, “Nenebam yebil obotut wiak yema nebit e,” oluk,

¹¹enebabut onotogat welat wiak togu legesa aʼge ukpoluk, enebabut heberlom erlak welat, is en e, “Allah ebe noʼgorelep e,” oluk Allah ʼbogorl pam aʼge onuk wiagap togwi modogat oruakma entegis o.

¹²Asogo oruakhwe, is malaikat ebano aʼge enebe huaben en asogo tigisarikmu en, mesik en Allah olot het ik ʼgelaʼge neʼgak aʼge ano mesik herlilogo, is ap ononuk logo aʼge o mo orlu agoma aʼge wemagoluk, ik lok aʼge onuk Efrat ai pam ʼbelabisoam e, is wom oʼgwe ik ebe deng ese laga.

¹³Asogo deng egeirikmu en, eʼberlik e, ʼgosu lok aʼge emin, mene orlomene ʼgelaʼge lok aʼge emin, Allah iak moʼgulentasu aʼge ʼgelaʼge iak eseiyat oso aʼge ano emin, enemdema en muʼgat enebabut wiak aʼge enebe henagan yagaye ʼgelaʼge liplau waga laga.

¹⁴Muʼgat ai enebe re, Iblis osi aʼge aphwami enebam louk lau wagoam tu puk aʼge elalin togwi aʼge anoat o. Is asogo liplau wegesarik e, Allah anni aʼbikmu di aʼge yu aʼge tu elit nak aʼge ano owi dakha ua ai pam weim enemin obuogoluk, ap ononuk logo aʼge o di owi yu owi odogonobuogoluk, weim yoʼgo lagaimu entegis o.

¹⁵Asogo legesarikmu en, at Yesus en disogo moʼgulnesi, “Hesaʼgo hwelin o. Aphwami yogot wouwogoluk hisakho wagai ai ʼgelaʼge, an asogoat weik o. Asogo wagoam e, aphwami enageʼgolom oruakma eneʼgerli ago ai ʼgelaʼge, his asogoat heneʼgerli emano oluk honosum perleneat ʼbukhorlouwogoluk degelogo poluk wolorogup holuk e, Allah en obaphenebisoam honogola henagai hagup o,” oluk moʼgulnosoma hwelegis o.

¹⁶Ye, is Iblis osi enebabut wiak aʼge ebano en, is ap ʼgain ebano o is aphwami Ibrani eniak pam onuk Harmagedon ogumu ai odoksogo enebasumu yerentegis o.

¹⁷Asogo hegirikmu en, eʼberlik e, is malaikat ebano aʼge enebe hebarlik pam asogo tigisarikmu en, at mesik en, Allah olot het ik ʼgelaʼge neʼgak ano aʼge mesik herlilogo ʼbogorl abel olukhwe akhit o hena ebalema ʼbelabisoam e, Allah owi werikmu at ʼgain welago aʼge ebalema en iak loksogo disogo egei, “Arat ologun wusogo aga o,” oluk egei.

¹⁸Asogo osoam e, ebinal pobuk naduk yebekhasulat, orlolu iak ʼbak oluk en, iak orlu lasulat, mouk onogorlok aʼge aphwami Allah en walentesi aʼge hwerli yogodak hwerli, mouk ai ʼgelaʼge mesik erlang-perlang ho erlak aʼge aiat erlang-perlang hasulat, tagoma yethegi o.

¹⁹Asogo osoam e, o seli lok ano ʼgwiang ʼbaksogo henagan pam mogoliselat, aphwami enaʼgul onuk loʼbok Allah ebe eneperlak aʼge onowi seli loʼbok ʼberlegat moluk-melaksogo wolloʼgen dagalagalat, tisoma, Allah en e, “An nolot het aʼbik anggur aʼbosu neʼgak aʼge ʼgelaʼge ano, at o Babel lok aʼge ano wogeik o,” oluk, obok moʼgulesi aʼge ai ede eberegeitik, wogosoma hegi o.

²⁰Ye, ʼgwiang ik eʼgen oʼgwe ʼberlegat emin, dom ʼberlegat emin, erlak agalat,

²¹ʼbogorl pam en moru hagarleʼgen lok aʼge ebe loʼbok eʼgin e, 50 kilo aʼge ʼbu agalat, aphwami enebe warenebiselat, taga laga. Asogo warenebisokhwe, is en ogulat e, “Moru hagarleʼgen wiak watnenebiso yu re, Allah ebe noʼgorelep e,” oluk onuk wiagap pogwi modok oruakma yerentegis o.