Read Silimo Wahyu 17 Bible Online

Wahyu 17 - Silimo bible

Wahyu 17

¹Asogo hegirikmu en eʼberlik e, is malaikat enebe sabiren Allah olot het ik ʼgelaʼge naʼgogo woluk herleligisa aʼge mesik wagarik disogo moʼgulnesi, “Is aphwami o kota Babel aʼge, hwe ʼgain danian nil noso aʼge ʼgelaʼge ai, ik lok aʼge esaʼgoma oruakma, ap ʼgain ononuk logo aʼge ʼgwiangma aʼge en at ʼbabi tenhogulat, aphwami logon en anggur eʼgen aʼbosu noʼgwi modok welat, enede ʼbalagai ai ʼgelaʼge, aphwami ʼgwiangma aʼge en at ʼbabi tenhogwi modok welat, togwi aʼge ai, Allah en hwe ai wene ebam poluk ebe wiagap paigoluk emeʼgin ʼgabelegei aʼge moʼgulheik en e, suk o,” oluk moʼgulnesi.

³Asogo moʼgulnesimu re, Allah Arogun nebam louk lau wagama, at malaikat ano en woknoboluk, o aphwami erlakma leimu laga. Asogo woknoboluk lagama welat, yethegi ʼgal e, hwe ano mene orlomene ʼgelaʼge lok asu momi aʼge ʼgelaʼge oʼborl pam huragarik nosoma yethegi o. Mene orlomene ʼgelaʼge ai aʼgul e, sabit pam, ye, iak aʼgul pam e, 10 pam daintak, ye, ebe ebagase re, Allah onuk wik-wiak takpasu aʼge pelal ʼbetesogo wogo aʼge yethegi o.

⁴Ye, hwe ai osum mesik il momi aʼge ʼgelaʼge, ye, mesik il wibeʼgen ʼbelak aʼge ʼgelaʼge, ʼbuktak o. Ye, alli aʼge re, emas aʼge emin, helebeʼgen il op welat oʼgo aʼbik ʼbalogwi aʼge onuk permata emin, mutiara emin, wantak welat, ebabut wiak tagalat, ʼbabi tenhouwagoluk tagalat, asogo danian nil denago aʼge ai, ik eʼbe emas aʼge pam naʼgogo eʼgikmu tenakho oruakma yethegi o.

⁵Ye, wene ebe hisogo aʼge eʼberli pam pelal disogo wogo, “Aphwami ʼgwiangma aʼge danian nil noʼgwi aʼge emin, enebabut wiak modok togwi aʼge emin, ʼberlegat enia onuk Babel ʼgain yu o,” oluk pelal wogo oruakma yethegi.

⁶Ye, hwe ai en, Allah eiyagai aʼge emin, Yesus iak moʼgulentil noʼgwi aʼge emin, warenebegei aʼge enemep neʼgeitik, aphwami en anggur eʼgen aʼbosu noluk enede ʼbalagai ai ʼgelaʼge, ede ʼbalagarik oruakma yethegi o. Asogo yethegirik aʼbik erliktegis.

⁷Asogo hegirik, erliktaga legimu re, malaikat ano en disogo moʼgulnesi, “Nopaget erliktaga legen. An en, hwe ai ebe emin, mene orlomene ʼgelaʼge aʼgul sabit pam, ye, iak aʼgul pam 10 en daintak aʼge, oʼborl pam at hwe ai hweriogo oruakhwe woluk noso aʼge ai emin, eʼbirek enebaget wene hisogo oruak aʼge ʼbaksogo ʼbeliʼgogo moʼgulheik o.

⁸Mene orlomene ʼgelaʼge hegen ai re, naduk welaga aʼgeat de, yogodak orogole erlak hegen ai re, ʼgwiang ogola en orluma o. Orlu ago holuk, Allah en almerak pouwa o. Ye, Allah en ʼgwiang ʼbogorl owan walho erlak welat, suesiʼga is aphwami enelaluk modok welemagoluk obabonobua aʼge nak, ononuk pelal wogo ai pam, is logon ononuk pelal wogo erlak aʼge en mene orlomene ʼgelaʼge ai enil houwarik, is en e, Mene orlomene ʼgelaʼge yu, naduk welagarik en, orogole erlak aga aʼgeat de, pobuk enam aga yu, nogorlok o, oluk erliktua o.

⁹Ye, wene moʼgulheik yu paget e, enebabut heberlak oruak aʼge nak pobi tu o. At mene orlomene ʼgelaʼge ai, aʼgul ebe sabiren hegen ai ebe re, dom ebe sabiren, at hwe ai ʼgain welagama eba oruak aʼge hegen o. Ye, mesik e, ap ʼgain ononuk logo aʼge enebe sabiren oruak aʼge paget hegen o.

¹⁰Ye, is ʼgain enebe sabiren ai aʼge, enebe huaben arat ʼgoboksogo ʼbigisema re, enebe ʼbiren nak oruak aʼge ai, mesik arat ʼgain welat, aphwami eragam onoboluk tenentarok oruak. Ye, mesik pobuk holuk enam ema. Enam emarik e, at en aphwami eragam onoboluk tenentarok modok welema erlak. We, agauwa weiyat welema o.

¹¹Mene orlomene ʼgelaʼge naduk welaga aʼgeat de, orogole erlak ai ebe re, ʼgain enebe sabiren ebano arat ʼgobologo ʼbil ʼbil waga legesarik, is enebe sabit ai aʼge logon pobuk togolik ʼgain egesarik, eneʼgik wenakho 8 ʼgelaʼge egesarik, pobuk Allah en almerak pouwa aʼge hegen o.

¹²Ye, iak aʼgul pam 10 en daintak hegen ai ebe re, ap enebe 10 pam ʼgain ema aʼge owan oruak aʼge paget hegen aʼgeat de, is ʼgain edigonoboma, at mene orlomene ʼgelaʼge ano emin, we, o mo il mesigat pam nak ʼgain welat aphwami tenentarok welema aʼge paget hegen o.

¹³Is ai enede mesigat welat, at mene orlomene ʼgelaʼge ano moʼguleselat e, Nis ʼgain welemagoluk ediknenebegesema nononuk oruak aʼge welege ai, harat honuk oruak aʼge welerinogoluk eiyerak hebege o, oluk moʼgulegisa.

¹⁴Asogo eiyerak poluk, Domba Emalik ano weim emin obuogoluk tua aʼgeat de, at Domba Emalik ebe aphwami ʼgain ononuk logo aʼge emin, ononuk oruak aʼge emin, ʼberlegat onue onuk oruak aʼge logo aratma re, eiyagai poligonoboluk yoʼgo enebesimu enebabut at ebaget heʼbisogo togwi aʼge ebano, at oruak oʼgwe emarik, emin en, at mene orlomene ʼgelaʼge ano osi enemin mabenap pouwa o,” oluk moʼgulnesi.

¹⁵At malaikat ano en asogo moʼgulnesirik, mesik disogo moʼgulnesi, “At hwe danian nil noso aʼge ʼgelaʼge ai, ebe ʼgain welagoma ik hegen ai ebe re, aphwami ʼberlegat enaʼgul onuk loʼbok, enagap loʼbok, onowi loʼbok, eniak loʼbok aʼge hil entigen o.

¹⁶Ye, iak aʼgul pam 10 daintak ano emin, mene orlomene ʼgelaʼge ebe ano emin, emin e, hwe danian noso aʼge ai, ebe enebirap poluk e, di aʼge yu aʼge at enaʼge horlogulat, ebe ageʼgolom ukpogulat, toluk, ebe wusogo pema noʼgulat, pema odouk narlik pouwa o.

¹⁷Asogo tua ai re, Allah en egei aʼge hegitsogoat emagoluk, at enat ogola epasu aʼge ai, is ap ʼgain ai enede ʼgagalegeimu, is enede mesigat welat, is en e, at mene orlomene ʼgelaʼge ano moʼguleselat, Nis ʼgain nononuk oruak aʼge welege ano ʼgelaʼge, hat ʼgain honuk oruak aʼge wolorogun o, oluk eiyerak poluk, emin en, hwe danian nil noso aʼge ano ebe worua ai o.

¹⁸Ye, hwe aʼge hil hegen ai ebe re, ap ʼgain ononuk logo ʼgwiangma aʼge ʼberlegat eragam onoboluk tenentarok welago aʼge, o kota lok aʼge ogwi anoat hil hegen o,” oluk moʼgulnesi.